ދިރާގު ދިވެހި ޕްރިމިއަރ ލީގުގައި ނިއުރޭޑިއަންޓް ސްޕޯޓްސް ކުލަބާއި ކުލަބް ގްރީން ސްޓްރީޓްސް ބައްދަލުކުރަން އޮތް މެޗަށް ގްރީން ސްޓްރީޓްސް ހާޒިރުނުވެ މެޗު ދޫކޮށްލި މައްސަލަ އޭ.އެފް.ސީ އަށާއި ފީފާއަށް ހުށަހަޅާނެކަމަށް ކުލަބް ވެލެންސިއާއިން ބުނެފިއެވެ.
ބުރާސްފަތި ދުވަހު ނިއުރޭޑިއަންޓް ސްޕޯޓްސް ކުލަބާއި ކުލަބް ގްރީން ސްޓްރީޓްސް ބައްދަލުކުރަން އޮތް މެޗަށް ގްރީން ސްޓްރީޓްސް ހާޒިރުނުވެ މެޗު ދޫކޮށްލި މައްސަލަގައި ކުލަބު ވެލެންސިއާއިންވަނީ ނޫސް ބަޔާނެއް ނެރެފައެވެ. މި ނޫސް ބަޔާނުގައި ހާމަކޮށްފައިވާ ގޮތުގައި ގްރީން ސްޓްރީޓްސްއިން މެޗު ދޫކޮށްލައި އެކަމުގެ ނާޖާއިޒުފައިދާ އެކުލަބުން ނަގާފައިވާކަމަށެވެ. އެގޮތުން، ކުލަބު ވެލެންސިއާއިން ކުޅެންޖެހޭ ހުރިހާ މެޗެއް 4 ފެބްރުވަރީ ވަނަ ދުވަހު ކުޅެ ނިމިފައިވާއިރު، ލީގުގެ ނުވަ ވަނައަށް ދާ ޓީމު ކަނޑައެޅޭނީ ނިއު އާއި ގްރީން ސްޓްރީޓްސް މެޗުންކަމަށެވެ. މެޗު ދޫކޮށްލުމުން 2 ލަނޑުގެ ތަފާތަކުން ނިއުއަށް މެޗު ލިބޭއިރު، ގޯލުގެ ތަފާތުން ލީގުގެ ނުވަ ވަނަ ކުލަބް ވެލެންސިއާއަށް ލިބި އޮޓޮމެޓިކުން ރެލިގޭޓްވާނެއެވެ. މިކަން ކުލަބު ވެލެންސިއާއިން ސިފަ ކޮށްފައިވަނީ އަމިއްލައަށް ނަތީޖާ ކަނޑައަޅައި ވެލެންސިއާ ރެލިގޭޓު ކޮށްލުމަށް ގްރީން ސްޓްރީޓްސްއިން ހިންގި އަމަލެއްގެ ގޮތުގައެވެ. އަދި މެޗް ފިކްސިންގެ ސަބަބުން ކުލަބު ވެލެންސިއާ އަށާއި ލީގުގައި ވާދަކުރާ އެހެން ޓީމުތަކަށްވެސް އެކަމުގެ އަސަރުކުރާނެތީވެ އެކަމުގެ ހައްގު ހޯދުމަށް ފުޓްބޯލް އެސޯސިއޭސަނަށްވަނީ ގޮވާލާފައެވެ. އަދި އެ މައްސަލަ އޭ.އެފް.ސީއަށާއި ފީފާއަށް ހުށަހަޅާނެކަމަށްވެސް އެ ބަޔާނުގައި ހާމަކޮށްފައިވެއެވެ.
ދިރާގު ދިވެހި ޕްރިމިއަރ ލީގުގެ މެޗުތައް ނިމުމަކަށް އައިސްފައިވާއިރު، ލީގުގެ ޗެމްޕިއަންކަން ހޯދާފައިވަނީ މާޒިޔާ ސްޕޯޓްސް އެންޑް ރެކްރިއޭޝަން ކުލަބެވެ.