މިހާރު ކުރިޔަށްދާ އެޗް.ޑީ ހައުންޑާއި ގޯލްޑެން ފުޓްސަލް ޗެލެންޖްކަޕްގެ ކުއާޓާ ފައިނަލަށް ދުވާފަރާއި، އޭދަފުއްޓާއި، ތިމަރަފުއްޓާއި ދެއްވަދޫ ދަތުރުކޮށްފިއެވެ.

ރ. ދުވާފަރު ކުއާޓާގެ ޖާގައެއް ކަށަވަރުކުރީ އިއްޔެ ހަވީރު ސ. ހިތަދޫއާ ބައްދަލުކޮށް 5-3 އިން މެޗު ކާމިޔާބު ކޮށްގެންނެވެ. ދުވާފަރުގެ ލަނޑުތައް ޖަހައިދިނީ މުޙައްމަދު ނޫޙް އިބްރާހިމާއި، މުޙައްމަދު ޖުމާން މުޙައްމަދާއި، އިބްރާހިމް އަނާން އަލީއާއި، އަބްދުﷲ ލޫތު އިބްރާހިމާއި، ހަސަން އަޒޫމް އަލީއެވެ. ހިތަދޫ ޓީމުގެ 3 ލަނޑު ތެރެއިން ދެ ލަނޑު އެ ޓީމުގެ ޝާސް އިބްރާހިމް ޖެހިއިރު، އަނެއްލަނޑު ޖަހައިދިނީ މުޙައްމަދު ސަބާހް މަންސޫރެވެ. މި މެޗުގެ މޮޅު ކުޅުންތެރިއަކަށް ހޮވުނީ ދުވާފަރު ޓީމުގެ ޖާރޒީ ނަމްބަރ 30 މުޙައްމަދު އިސާމެވެ.

ހަވީރު ކުޅުނު ދެވަނަ މެޗުގައި އޭދަފުއްޓާއި މައްޗަންގޮޅި ބައްދަލުކުރި މެޗު އޭދަފުށި ކާމިޔާބުކުރީ 1-0 އިންނެވެ. މި މެޗުގައި ޖެހި ހަމައެކަނި ލަނޑު އެޓީމަށް ޖަހައިދިނީ މެޗުގެ މޮޅު ކުޅުންތެރިޔާގެ މަޤާމުވެސް ހޯދި އޭދަފުށީ ޓީމުގެ ޖާޒީ ނަމްބަރ 23 އިޝާން އިބުރާހިމެވެ.

ގއ. ދެއްވަދޫއާއި ވ. ކެޔޮދޫ ބައްދަލުކުރި މެޗު ދެއްވަދޫ ކާމިޔާބުކުރީ 4-2 އިންނެވެ. ދެއްވަދޫގެ އަހުނަފް ރަޝީދު ދެލަނޑު ޖެހިއިރު އަހުމަދު އާހިލް ރަޝީދާއި އަލީ ހައިޝަމްވެސް ލަނޑު ޖަހައިދީފައެވެ. ކެޔޮދޫގެ ލަނޑުތައް ޖަހައިދިނީ ނާއިލް މުޙައްމަދު ނަސީރާއި އަހުމަދު ރައްޔާން އާދަމެވެ. މި މެޗުގެ މޮޅު ކުޅުންތެރިޔަކަށް ހޮވުނީ ދެއްވަދޫ ޓީމުގެ ޖާޒީ ނަމްބަރ 77 އަލީ ހައިޝަމެވެ.

ރޭގަނޑު ކުޅުނު ދެވަނަ މެޗުގައި ތިމަރަފުށި މާރަންދޫ ކައިރިން މޮޅުވީ 3-0 އިންނެވެ. ތިމަރަފުށީގެ އަބްދުﷲ ޒިޔާން ދެލަނޑު ޖެހިއިރު އަނެއް ލަނޑަކީ މާރަންދޫ ޓީމުގެ ހުމައިދު ހުސައިން އަތުން ބައިކޮޅަށް ވަތް ގޯލެކެވެ. މި މެޗުގެ މޮޅު ކުޅުންތެރިއަކަށް ހޮވުނީ ތިމަރަފުށި ޓީމުގެ ޖާޒީ ނަމްބަރ 11 އަބްދުﷲ ޒިޔާންއެވެ.

ދ. ކުޑަހުވަދޫއާއި ށ.ކަނޑިތީމް ބައްދަލުކުރި މެޗު ކުޑަހުވަދޫ ކާމިޔާބުކުރީ 3-1 ގެ ނަތީޖާއަކުންނެވެ. ކުޑަހުވަދޫގެ މުހައްމަދު އަޔާޒު 2 ލަނޑު ޖެހިއިރު އެޓީމުގެ އަނެއް ލަނޑު ޖަހައިދިނީ ޖުމައިލް ޖަމީލެވެ. ކަނޑިތީމުގެ ހަމައެކަނި އެޓީމަށް ޖަހައިދިނީ އިސްމާއިލް ނިހާނެވެ. މެޗުގެ މޮޅު ކުޅުންތެރިއަކަށް ހޮވުނީ ކުޑަހުވަދޫ ޓީމުގެ ޖާޒީ ނަމްބަރ 13 ޖުމައިލް ޖަމީލެވެ.

ފަހު މެޗުގައި ވިލިމާލެއާއި ކ.ގާފަރު މެޗު ފުރިހަމަ ވަގުތު ހަމަވިއިރުވެސް އެއްވަރުވެފައި އޮތުމުން ނަތީޖާ ނެރެންޖެހުނީ ޕެނަލްޓީ ޖަހައިގެންނެވެ. ޕެނަލްޓީއިން 9-8 ގެ ނަތީޖާއިން ކުއާޓާގެ ޖާގަ ހޯދީ ވިލިމާލެއެވެ. މެޗުގެ މޮޅު ކުޅުންތެރިއަކަށް ހޮވުނީ ވިލިމާލޭ ޓީމުގެ ޖާޒީ ނަމްބަރ 17 އަލީ ޝިޔާހެވެ.

ރޭގަނޑު ކުޅެން ހަމަޖެހުނު ދެ މެޗެއް ވިއްސާރައިގެ ސަބަބުންވަނީ ހުކުރު ދުވަހުގެ ރެއަށް ފަސްކުރެވިފައެވެ. އެއީ ހދ. ނައިވާދޫ އާއި މ. ދިއްގަރު ބައްދަލު ކުރާ މެޗާއި އއ. މަތިވެރިއާއި ލ. އިސްދޫ ބައްދަލު ކުރާ މެޗެވެ. އެ މެޗުތައް ފަށާނީ ހުކުރު ދުވަހުގެރޭ 8 ޖަހާއިރުއެވެ.