ދުނިޔޭގައި އެކަކު އަނެކަކާއި ވާދަކޮށް ކުރިއަރައިދިއުން މި ވަނީ އިންސާނުންގެ ކަށީގައި ހިފާފައެވެ. ކޮންމެ ކަމެއްގައިވެސް އަނެކާއަށްވުރެ ތިމާ "މޮޅުވުން" އަބަދުވެސް މި އިންސާނާ އެދެއެވެ. ކަންކަމުގައި މޮޅުކަމާއި ބޮޑުކަން މި އިންސާނާ އެދެއެވެ. ނަމަވެސް މި ވާދަވެރިކަމުގައި ހަސަދަވެރިކަމާއި ރުޅިވެރިކަން އިސްވާނަމަ އެއީ ހުތުރުކަންބޮޑު އަމަލެކެވެ.

ކަންކަމުގައި ބަސްކިޔަން ތިބޭ މީހުންގެ މެދުގައި ހިޔާލު ތަފާތުވާނަމަ އެކަން ހައްލު ކުރުމަކީ ވަރަށްވެސް މުހިންމު ކަމެކެވެ. މިކަން މިހެން ކުރުމުގައި ކޮންމެވެސް ބަޔަކު ގޮތް ދޫކުރަން ޖޭނެއެވެ. މިއީ އެ ގޮތް ދޫކުރާ މީހާއަށް ދެރަކަމެއް ނުވަތަ ލަދުކަމެއް ކަމުގައި ދެކިގެން ނުވާނެއެވެ. ހަގީގަތުގައި ތިބާ ބުނާ ބަހުގެ ތެދުކަން، އަނެކުންނަށް ބުނެދިނުމަށް، ގޮތް ދޫކުރުމަށްވުރެ ވަކި މޮޅުގޮތެއް ނެތްކަން ދުނިޔެ ހެކިދެއެވެ. މި ލިއުމުގައި މި ބަލާލަނީ ގޮތް ދޫކުރުމާއި ގޮތް ދޫކުރުމުން ތިބާއަށް ލިބޭނޭ ކުރިއެރުމަށެވެ.

އެއްވެސް ކަމެއްގައި ތިބާ އާއި އަނެކުންގެ ހިޔާލު ތަފާތުވީނަމަވެސް ތިބާގެ ހިޔާލު ތިބާއަށް ހާމަ ކުރެވިދާނެއެވެ. ނަމަވެސް އަނެކާވެސް އޭގެ މައްޗަށް ގަދަ ބަސްބުނާނަމަ، އެންމެ މޮޅުވެގެން ވާނީ ތިބާ ގޮތްދޫކުރުމެވެ. މި ކަމުގައި ވަރަށްވެސް ބޮޑު ހިކުމަތެއް ފޮރުވިފައި އެބައޮތެވެ.

ދަންނާށެވެ! ތިބާ އެދޭ ގޮތް ދޫކޮށް، އަނެކާ އެދޭގޮތަށް ކަންތައް ކުރަމުން ދާއިރު، އެކަމުން ނުކުންނަ ހިތި ނަތީޖާތަށް ތިބާ ފާހަގަ ކުރާށެވެ. މިގޮތަށް ފާހަގަ ކުރިނަމަވެސް، އެ ކަމެއްގައި ތިމާގެ އެއްބާރުލުން ފުރިހަމައަށް ދޭންވާނެއެވެ. އަދި އެކަމެއް، އެ ކުރާ ގޮތަކަށް އެކަމެއް ކުރުމަށް މަގުފަހިވެސް ކޮށްދޭންވާނެއެވެ. މިގޮތުގައި އެކަމެއް ކޮށް ނިމެންދެން ތިބާ އެކަމުގައި އުޅޭށެވެ.

ކުރާ މަސައްކަތެއް ނިމި އަވަދިވުމުން، އެކަމުގެ ތެރޭގައި ތިބާއަށް ފާހަގަކުރެވުނު "ހިތި ރަހަ" ދޭ ތަންތަން، ތިބާ އަނެކުންނަށް ބުނެދޭށެވެ. އަދި ތިބާގެ ހިޔާލުގައި އޮތްގޮތަށް އެ މަސައްކަތެއް ކުރިނަމަ، އެ ކަންކަން އެހެން ގޯސްނުވާނެކަން ތިބާ ހާމަކޮށްދީ ބުނެދޭށެވެ. އޭރުން ދެން ތިބި މީހުންނަށް ތިބާގެ ހިޔާލުމޮޅުކަން އިނގޭނެއެވެ. މިއީ ދެވަނަ ފަހަރަށް ތިބާގެ ބަސް ވިކުމަށް ވަރަށްވެސް ފަސޭހަވާނޭ މަގެކެވެ. މިއީ މި ދުނިޔެ ތަމްސީލު ކުރަމުންދާ ހަގީގަތެއްވެސްމެއެވެ.

ހިޔާލުތަފާތުވާ ކޮންމެ ވަގުތެއްގައި އަނެކުންގެ ހިޔާލަށް އިހްތިރާމު ކުރަންވާނެއެވެ. އަދި ތަފާތުވާ ހިޔާލުގެ "ގިނި" ގަދަވާނަމަ، އަވަހަށް ގޮތްދޫކޮށްލާށެވެ. ކެތްތެރިކަމާއެކު ނަތީޖާއަށް އިންތިޒާރު ކުރާށެވެ. ތިބާ ދޫކޮށްލި ހިޔާލަކީ މޮޅު ހިޔާލެއްނަމަ، އެކަމުގައި މޮޅުކަމާއި، ކުރިއެރުން އޮތީ ތިބާއަށެވެ. އަބަދުމެ ހަނދާނުގައި ބަހައްޓަންވީ މުހިންމު ނުކުތާއަކީ، ކަންކަމުގައި ގަދަފައި ވިއްދުމާއި، ހަސަދަ އާއި ރުޅިވެރިކަން އިސްކުރުމާއި ނަފްރަތާއި ފިތުނަވެރިކަން އާންމު ވުމަކީ އެކަމެއްގައި އުޅޭ ބަޔަކަށް ނޭދެވޭ އެތަކެއް އަސަރު ކުރުވާނޭ ކަމެއްކަމެވެ. އަދި ގޮތްދޫކުރުމަކީ ދެރަކަމެއް ނުވަތަ ލަދުކަމެއްވެސް ނޫންކަމެވެ.  އަދި އެއީ އޭގައި "ދިރުމެއް" ވާ ކަމެކެވެ.