މިހާރު ކުރިޔަށްދާ ގޯލްޑެން ފުޓްސަލް ޗެލެންޖްގެ ކުއާޓާ ފައިނަލުގެ ފަހު ޖާގަތައް ނައިވާދޫއާއި މަތިވެރި ޓީމު ހޯދައިފިއެވެ.
މިރޭ ކުޅުނު ގަދަ 16 ގެ ފަހު މެޗުތަކުގައި ހދ.ނައިވާދޫ ބައްދަލުކުރީ މ.ދިއްގަރާއެވެ. މިމެޗު ނައިވާދޫ ކާމިޔާބުކުރީ 2-1 ގެ ނަތީޖާއިންނެވެ. ފޯރިގަދަ ކުޅުމެއް ފެނިގެންދިޔަ މިމެޗުގައި ފުރަތަމަ ލީޑު ނެގީ ނައިވާދޫއިންނެވެ. ހުސައިން މައިޝަން ޖެހި ލަނޑުން މެޗުގެ ބޮޑުބައި ނައިވާދޫއިން އެއް ލަނޑުގެ ލީޑެއްގައި ކުޅެމުން އަންނަނިކޮށް ދިއްގަރު ޓީމުގެ ހުސައިން ފާރިޝް ލަނޑެއްޖަހައި މެޗުގެ ނަތީޖާ ހަމަހަމަކުރިއެވެ. ނަމަވެސް، މެޗު ނިމެން ކުޑަ ވަގުތުކޮޅަކަށްވެފައިވަނިކޮށް ނައިވާދޫގެ ދެވަނަ ލަނޑު ޖަހައިދިނީ މެޗުގެ މޮޅު ކުޅުންތެރިޔާގެ މަގާމު ހޯދި ފުޓްސަލް ގައުމީޓީމުގެވެސް މުހިންމު ކުޅުންތެރިޔާ އަބްދުﷲ ޝާފިއުއެވެ.
އއ. މަތިވެރިއާ ލ.އިސްދޫ ބައްދަލުކުރި މެޗުގެ ފުރިހަމަ ވަގުތު ހަމަވިއިރު 2-2 އިން އެއްވަރުވެފައި އޮތުމުން ނަތީޖާ ނެރުނީ ޕެނަލްޓީ ޖަހައިގެންނެވެ. ޕެނަލްޓީއިން މަތިވެރި ކުރިހޯދީ 6-4 ގެ ނަތީޖާއިންނެވެ. މި މެޗުގެ މޮޅު ކުޅުންތެރިއަކަށް ހޮވުނީ މަތިވެރި ޓީމުގެ ޖާޒީ ނަމްބަރ 79 އިސްމާއިލް ނަސީމެވެ.
ކުއާޓާ ފައިނަލުގައި ނައިވާދޫ ނުކުންނާނީ މަތިވެރިއާ ދެކޮޅަށެވެ. ކުއާޓާގެ ދެން ހުރި މެޗުތަކަށް ބަލާއިރު ދުވާފަރު އޭދަފުއްޓާ ދެކޮޅަށް ނުކުންނައިރު، ތިމަރަފުށި ނުކުންނާނީ ދެއްވަދޫއާ ދެކޮޅަށެވެ. އަދި ކުޑަހުވަދޫ ނުކުންނާނީ ވިލިމާލެއާ ދެކޮޅަށެވެ. ކުއާޓާ ފައިނަލުގެ މެޗުތައް ކުޅެވޭނީ 8 ފެބްރުވަރީ ވާ އާދިއްތަ ދުވަހުގެރެއެވެ.