ދިރާގު ދިވެހި ޕްރިމިއަރ ލީގުގެ ތަށި ހަވަނަ ފަހަރަށް މާޒިޔާ ރެކްރިއޭޝަން ކުލަބު ހޯދައިފިއެވެ.
މިއީ ލީގުގެ އައްޑަނަ ޖެހިޖެހިގެން މާޒިޔާ ހޯދި ފަސްވަނަ ފަހަރެވެ. އަދި ލީގު ކާމިޔާބުކުރި ހަވަނަ ފަހަރެވެ. ރޭ މާޒިޔާ ތަށި އުފުލާލީ ފަހު މެޗުގައި އޮޑި ސްޕޯޓްސް ކުލަބު 1-0 އިން ބަލިކުރުމަށްފަހުއެވެ. ރޭ ތަށި އުފުލާލި ނަމަވެސް، މީގެ ދެހަފްތާކުރިން މާޒިޔާއަށްވަނީ ލީގު ކަށަވަރުވެފައެވެ. އެއީ ލީގުގައި މާޒިޔާއާ އެންމެ ވާދަވެރި އޮޑިއަށް ޕޮއިންޓްތަކެއް ގެއްލުމުގެ ސަބަބުންނެވެ.
ރޭ އޮޑިއާ ދެކޮޅަށް ކުޅުނު މެޗުގައި ވަރަށް ކުރީކޮޅު މާޒިޔާއިންވަނީ ލަނޑުޖަހާ ލީޑު ނަގާފައެވެ. މި ލަނޑު ޖަހައިދިނީ އަހުމަދު އައިހަމް (ފަތޯ) ފަހިކޮށްދިން ފުރުސަތެއްގައި ސާޖިއޯ މެންޑިގުޗިއާއެވެ.
މިއަހަރުގެ ލީގު ޗެމްޕިއަންކަން މާޒިޔާ މިހޯދީ ކުޅުނު އެއްވެސް މެޗަކުން ބަލިނުވެ 47 ޕޮއިންޓް ހޯދައިގެންނެވެ. އެޓީމު އެއްވަރުވެފައިވަނީ 3 މެޗުންނެވެ.