އަލް ހިލާލްއަށް ކަރިމް ބެންޒެމާ ބަދަލުވުމާއި ގުޅިގެން އުފެދުނު ނުތަނަވަސްކަމުގައި އަލް ނަސްރުއިން މިރޭ އަލް އިއްތިހާދާ ދެކޮޅަށް ކުޅޭ މެޗުގެ ސްކޮޑުގައި ނުހިމެނި ރޮނާލްޑޯ ބާކީވެއްޖެއެވެ.
އުމުރުން 41 ގެ މަޝްހޫރު ފޯވާޑު، ބެންޒެމާގެ ޓްރާންސްފަރ އާމެދު ވަރަށް ބޮޑަށް ހިތްހަމަ ނުޖެހުން ފާޅުކޮށް ސައުދީ ޕްރޯ ލީގަށްވެސްވަނީ ފާޑުކިޔާފައެވެ. އަދި އެކަމުގެ ރުޅިވެރިކަމުގެ ތެރޭގައި އަލް ނަސްރު ހޯމަ ދުވަހު އަލް-ރިޔާދު ކައިރިން 1-0 އިން މޮޅުވި މެޗުގައިވެސް ކުޅެފައެއްނުވެއެވެ.
ބީބީސީން ރިޕޯޓުކޮށްފައިވާ ގޮތުގައި، ރޮނާލްޑޯ ހިތްހަމަ ނުޖެހުން އުފެދިގެން އުޅެނީ ސައުދީ އަރަބިއްޔާގެ ޕަބްލިކް އިންވެސްޓްމަންޓް ފަންޑުން ކުލަބު ހިންގާ ގޮތާމެދުއެވެ. އަލް-ނަސްރުގެ އިތުރުން އަލް-ހިލާލަކީވެސް ޕަބްލިކް އިންވެސްޓްމަންޓް ފަންޑުން (ޕީ.އައި.އެފް އިން) ހިންގާ ދެކުލަބުކަމަށްވެފައި، ލީގުގެ އެއްވަނައިގައި މިވަގުތުވެސް އޮތް އަލް ހިލާލަށް އަނެއްކާ ބެންޒެމާ ގެނައުމުން އެކަމުގެ ނޭދެވޭ އަސަރު އަލް-ނަސްރަށް ކުރާނެކަމަށްބުނެއެވެ. މިދެކުލަބުގެ އިތުރުން ނިއުކާސަލް ޔުނައިޓެޑުގައިވެސް ޕަބްލިކް އިންވެސްޓްމަންޓް ފަންޑުގެ ހިއްސާ އޮވެއެވެ.
2023 ވަނަ އަހަރު މެންޗެސްޓަރ ޔުނައިޑުން އަލް-ނަސްރަށް 177 މިލިއަން ޕައުންޑުގެ ބޮޑު މުސާރައަކަށް ބަދަލުވި، ދުނިޔޭގެ މޮޅު ކުޅުންތެރިޔާގެ މަގާމު 5 ފަހަރު ހޯދާފައިވާ ރޮނާލްޑޯ އެކުލަބަށް ބަދަލުވިފަހުން އަދި ކާމިޔާބު ކުރެވުނީ އަރަބް ކުލަބް ޗެމްޕިއަންސްކަޕް އެކަންޏެވެ. އަލް-ނަސްރަކީ އަލް ހިލާލްއާއެކު ސައުދީ ޕްރޯ ލީގުގެ އެންމެ ކާމިޔާބު އެއް ޓީމެވެ.