އިނގިރޭސި ފުޓްބޯޅައިގެ އެންމެ ކާމިޔާބު އެއް ޓީމު، މެންޗެސްޓަރ ޔުނައިޓެޑުގެ ވަގުތީ ކޯޗުކަމާ ހަވާލުވި މައިކަލް ކެރިކްގެ އިރުޝާދުގެ ދަށުން ލީގުގެ ހަތަރުވަނަ މެޗުން އެ ޓީމު މޮޅުވެއްޖެއެވެ.
މިއަދު މެންޗެސްޓަރ ޔުނައިޓެޑުގެ އަމިއްލަ ދަނޑުގައި ޓޮޓޮންހަމްއާ ދެކޮޅަށް ކުޅުނު މެޗަކީ މައިކަލް ކެރިކް ޔުނައިޓެޑުގެ ކޯޗުކަމާ މި ސީޒަން ނިމެންދެން ހަވާލުވިފަހުން ކުޅެވުނު ހަތަރުވަނަ މެޗެވެ. މިއަދުގެ މެޗު ޔުނައިޓެޑު ކާމިޔާބުކުރީ 2-0 ގެ ނަތީޖާއަކުންނެވެ. ގިނަ ވަގުތު ބޯޅަ ހިފައިގެން ގިނަ ހަމަލާތަކެއް މުޅި މެޗުގައިވެސް އުފެއްދީ ޔުނައިޓެޑުންނެވެ. ޓޮޓޮންހަމްވެސް ދޭތެރެދޭތެރެއިން ހަމަލާ އުފެއްދިނަމަވެސް، އެޓީމުގެ ކެޕްޓަން ކްރިސްޓިއަން ރޮމެރޯ ޔުނައިޓެޑުގެ މިޑްފީލްޑަރ ކަސެމީރޯއަށްކުރި ނުރައްކާތެރި ފައުލަކަށް ރެފްރީ ސީދާ ރަތްކާޑު ދައްކާ ދަނޑުން ފޮނުވާލުމާއެކު މެޗުގެ ކޮންޓްރޯލް ޔުނައިޓެޑުން ނެގިއެވެ. އޭގެ ފައިދާ ނަގައި ޔުނައިޓެޑުން ލީޑު ނެގީ މެޗުގެ 38 ވަނަ މިނެޓުގައި ނެގި ކޯނަރަކުން ކޯބީ މައިނޫ ތަނަވަސްދިން ފުރުޞަތެއްގައި އެމްބޫމޯއެވެ. ދެވަނަ ހާފު ފަށައިގެން ޓޮޓޮންހަމް ހަމަޖެހިލައިގެން މެޗުތެރެއަށް އަނބުރާ ވަދެވޭތޯ ވަރަށް މަސައްކަތްކުރިއެވެ. ނަމަވެސް އެއް ކުޅުންތެރިޔަކު މަދުކޮށް ކުޅެމުންދިޔަ ޓޮޓޮންހަމްގެ ރިހޭ ފައިމައްޗަށް ފޮއި ވެއްޓުނީ ޑެލޮ ނަގައިދިން ހުރަހަކުން ޔުނައިޓެޑުގެ ކެޕްޓަން ބުރޫނޯ ފެނާންޑޭޒް ލަނޑުޖަހައި ލީޑު ފުޅާކުރުމުންނެވެ.
މި ނަތީޖާއާއެކު ކުޅުނު 25 މެޗުން 44 ޕޮއިންޓާއެކު ޔުނައިޓެޑު އޮތީ ތާވަލުގެ ހަތަރުވަނާގައެވެ. 29 ޕޮއިންޓާއެކު ޓޮޓޮންހަމް އޮތީ ތާވަލުގެ 14 ވަނާގައެވެ. ޔުނައިޓެޑު ދެން ކުޅޭނީ ވެސްޓްހަމްއާ ދެކޮޅަށެވެ.