އިނގިރޭސި ޕްރިމިއަރ ލީގުގައި މިއަދު ލީޑްސް ޔުނައިޓެޑް އަތުން ބަލިވެ ނޮޓިންހަމް ފޮރެސްޓް ރެލިގޭޓުވެދާނެކަމުގެ ބިރު ހީވެއްޖެއެވެ.
މި ދެޓީމު ބައްދަލުކުރި މެޗު ލީޑްސް ކާމިޔާބުކުރީ 3-1 ގެ ނަތީޖާއިންނެވެ. ލީޑްސްއަށް ލަނޑުތައް ޖަހައިދިނީ ބޮގްލް، އޮކަފޯ އަދި ޑޮމިނިކް ކެލްވަރ-ލެވިންއެވެ. ފޮރެސްޓުގެ ހަމައެކަނި ލަނޑު މެޗު ނިމުމަކާ ގާތްވެފައިވަނިކޮށް ޖަހައިދިނީ ލޮރެންޒޯ ލުއްކާއެވެ.
މި ނަތީޖާއާއެކު ލީޑް ޔުނައިޓެޑު އޮތީ ލީގުގެ 16 ވަނާގައެވެ. އެއީ 25 މެޗުން ލިބުނު 29 ޕޮއިންޓާއެކުއެވެ. ޖެހިގެން ފޮރެސްޓް އޮތީ 3 ޕޮއިންޓް މަދުން 26 ޕޮއިންޓާއެކު ލީގުގެ 17 ވަނާގައެވެ. ލީޑްސް ޔުނައިޓެޑް ދެން ބައްދަލުކުރާނީ މިމަހުގެ 11 ވަނަ ދުވަހު ޗެލްސީއާއެވެ. ފޮރެސްޓް ވުލްވްސްއާ ދެކޮޅަށް ނުކުންނާނީ 12 ވަނަ ދުވަހުއެވެ.