އިނގިރޭސި ޕްރިމިއަރ ލީގުގެ އެއްވަނާގައި އޮތް އާސެނަލް މިރޭ ކުޅުނު މެޗުން މޮޅުވެ އެއްވަނާގައި ނުވަ ޕޮއިންޓްގެ ލީޑަކާއެކު ހަމަޖެހިލައިފިއެވެ.
ސަންޑަލޭންޑާ ދެކޮޅަށް ކުޅުނު މި މެޗު އާސެނަލްއިން ކާމިޔާބުކުރީ 3-0 އިންނެވެ. މި މެޗުގައި އާސެނަލްގެ ސްވިޑުން ފޯވާޑު ވިކްޓޯ ޔޯކެރެސް ދެލަނޑު ޖެހިއިރު އަނެއް ލަނޑު ޖަހައިދިނީ މާޓިން ޒުބިމެންޑިއެވެ.
މެޗު ފެށިގެން ގިނަ ވަގުތު ވަރަށް ހަމަޖެހިލައިގެން ރޭވުންތެރިކަމާއެކު ޑިފެންސް ކުރަމުންދިޔަ ސަންޑަލޭންޑްގެ ޑިފެންސް ފޫއަޅުވާލުމަށް އާސެނަލް ކުރަމުންދިޔަ މަސައްކަތަށް ނިމުމެއް އައީ ފުރަތަމަ ހާފު ނިމެން 3 މިނެޓަށް ވެފައި ވަނިކޮށް މާޓިން ޒުބިމެންޑި ޖެހި ލަނޑުންނެވެ. ޔޯކެރެސްގެ ފުރަތަމަ ލަނޑު 66 ވަނަ މިނެޓުގައި ފެނިގެންދިޔައިރު، ފަހު ލަނޑު ފެނިގެންދިޔައީ މެޗުގެ އިތުރުވަގުތުގައެވެ.
ސަންޑަލޭންޑުންވެސް ރަނގަޅު ހަމަލާތަކެއް އުފެއްދިއެވެ. އެގޮތުން ބްރަޔަން ރޮބޭ ފޮނުވާލި ހަމަލާ ގޯލު ހުރަސް ރޮނގުމަތިން ދިފާޢުކުރީ އާސެނަލްގެ ކައި ހަވާޓްޒްއެވެ.
ރޭ ކުޅުނު އެހެން މެޗުތަކަށް ބަލާއިރު، ލީގަށް ވާދަކުރާ އެސްޓަންވިލާވަނީ އޭފްސީ ބޯންމައުތުއާ 1-1 އިން އެއްވަރުވެފައެވެ. ސިޓީގެ މެޗު މިއަދު ކުޅޭއިރު، މިނަތީޖާއާއެކު އާސެނަލްއަށް މިވަގުތު ތާވަލުގެ ދެވަނާގައި އޮތް ސިޓީއާ 9 ޕޮއިންޓްގެ ފަރަގެއް އެބަ އޮތެވެ.