ދުޅަހެޔޮ ސިއްހަތެއްގައި ހުރުމަށްޓަކައި ކެއުމުގެ އާދަތަކަށް ބަދަލު ގެނައުމަކީ ވަރަށް މުހިންމު ކަމެކެވެ. ގިނަ ފަހަރަށް މީހުން ހީކުރަނީ ހަށިގަނޑުގެ ބަރުދަން ލުއިކުރުމަށް ނުވަތަ ކެލޮރީ މަދުކުރުމަށްޓަކައި ކާ މިންވަރު މަދުކޮށް، ބަނޑުހައިކަންމަތީގައި ހުންނަން ޖެހޭނެ ކަމަށެވެ. ނަމަވެސް، އިނގިރޭސިވިލާތުގެ ޔުނިވަރސިޓީ އޮފް ބްރިސްޓަލްއިން ހެދި އާ ދިރާސާއަކުން ދައްކާގޮތުގައި، ކާ މިންވަރު މަދުނުކޮށްވެސް، ކާނާގެ ބާވަތްތަކަށް ގެނެވޭ ކުޑަ ބަދަލަކުން ދުވާލަކު 330 ކެލޮރީއާ ހަމައަށް މަދުކޮށްލެވިދާނެއެވެ.
މި ދިރާސާއިން ހާމަވި ގޮތުގައި، މީހަކު ކާން ބޭނުންކުރާ "އަލްޓްރާ-ޕްރޮސެސްޑް" ނުވަތަ ކާރުޚާނާތަކުން ތައްޔާރުކޮށްފައިވާ ކާނާތައް ދޫކޮށްލައި، ގުދުރަތީ ގޮތުން ލިބޭ ޕްރޮސެސް ނުކުރާ ކާނާއަށް ބަދަލުވުމުން، އެމީހުންގެ ކެއުމުގެ ވައްޓަފާޅި މުޅިން ބަދަލުވެގެންދެއެވެ. މިގޮތަށް ބަދަލުވާ މީހުން ހަމައެކަނި ކާނާގެ ބާވަތް ބަދަލުކުރަނީކީ ނޫނެވެ. އޭގެ ބަދަލުގައި އެމީހުން ކާން އިޚްތިޔާރުކުރާ ގޮތް ކުރިއަށްވުރެ ބުއްދިވެރިވެއެވެ.
ދިރާސާގެ ނަތީޖާތަކަށް ބަލާއިރު، ޕްރޮސެސް ނުކުރާ ކާނާ ބޭނުންކުރާ މީހުން އެމީހުންގެ ކެއުމުގައި މޭވާ އާއި ތަރުކާރީ ހިމަނާ މިންވަރު %50 އަށްވުރެ އިތުރުވެގެންދެއެވެ. މީގެ މާނައަކީ، ބަރުދަނުގެ ގޮތުން ބަލާއިރު ކުރިއަށްވުރެ ގިނައިން ކާނާ ކެވުނު ކަމުގައި ވިޔަސް، ހަށިގަނޑަށް އެތެރެވާ ކެލޮރީގެ މިންވަރު އެތައް ސަތޭކައަކުން މަދުވެގެން ދިއުމެވެ. މިއީ މައިގަނޑު ގޮތެއްގައި ގުދުރަތީ ކާނާގައި ހުންނަ ފައިބަރާއި ފެނުގެ ބައި ގިނަވުމުގެ ސަބަބުން، އަވަހަށް ބަނޑުފުރޭތީ ދިމާވާ ކަމެކެވެ.
ޔުނިވަރސިޓީ އޮފް ބްރިސްޓަލްގެ ދިރާސާވެރިން މިކަން ސިފަކުރައްވަނީ "ނިއުޓްރިޝަނަލް އިންޓެލިޖެންސް" ނުވަތަ ކާނާގެ ބުއްދިވެރިކަމުގެ ގޮތުގައެވެ. މިއީ ގުދުރަތީ ކާނާ ބޭނުންކުރަން ފެށުމުން، ހަށިގަނޑަށް ބޭނުންވާ މުހިންމު ނިއުޓްރިއެންޓްސް ގިނަ އަދި ކެލޮރީ މަދު ބާވަތްތަކަށް އިންސާނާގެ ޝައުގުވެރިކަން އަމިއްލައަށް އަނބުރާލާކަމެކެވެ. މީގެ ސަބަބުން އެއްވެސް ތުރާލެއް ނެތި، ދުވާލަކު އެވްރެޖްކޮށް 330 ކެލޮރީ މަދުކުރެވޭކަން ވަނީ ފާހަގަކުރެވިފައެވެ.
ދުޅަހެޔޮ ސިއްހަތެއްގައި ހުރުމަށްޓަކައި ބަނޑުހައިކަންމަތީގައި ހުރުމަކީ ހައްލެއް ނޫނެވެ. އޭގެ ބަދަލުގައި، ބްރިސްޓަލް ޔުނިވަރސިޓީގެ ދިރާސާއިން އެނގިގެންދަނީ، ޕްރޮސެސްކޮށްފައިވާ ކާނާއާ ދުރުވެ، މޭވާ އާއި ތަރުކާރީ ފަދަ ގުދުރަތީ ކާނާއަށް އިސްކަންދިނުމުން، ގިނައިން ކައިގެންވެސް ހަށިގަނޑުގެ ބަރުދަން ލުއިކޮށް ބެހެއްޓިދާނެ ކަމެވެ. މިއީ އަޅުގަނޑުމެންގެ ދިރިއުޅުމުގެ އާދަކާދައަށް ގެނެވިދާނެ ވަރަށް ފަސޭހަ އަދި އެހާމެ ނަތީޖާ ރަނގަޅު ބަދަލެކެވެ.
ހަވާލާ: ސައިންސް ޑެއިލީ 2026