ގޯލްޑެން ފުޓްސަލް ޗެލެންޖް 2026 ގެ ސެމީ ފައިނަލަށް ހދ. ނައިވާދޫ ދަތުރުކޮށްފިއެވެ.
ރޭ ކުޅެވުނު ކުއާޓާ ފައިނަލް މެޗުގައި ނައިވާދޫ ބައްދަލުކުރީ އއ.މަތިވެރި ޓީމާއެވެ. ފޯރިގަދަ މިމެޗު ނައިވާދޫއިން ކާމިޔާބުކުރީ 4-2 ގެ ނަތީޖާއިންނެވެ.
މި މެޗުގައި ފުރަތަމަ ލަނޑުޖަހައި ލީޑު ނެގީ ނައިވާދޫއިންނެވެ. މެޗުގެ ވަރަށް ކުރީކޮޅު މިލަނޑު ކާމިޔާބުކޮށްދިނީ އެޓީމުގެ ކެޕްޓަން ޔާމިން މުހައްމަދެވެ. މިލަނޑަކީ ނައިވާދޫ ޓީމުގެ ގޯލް އޭރިއާ ތެރެއިން ބޯޅަ ހިފައިގެން ކުރިއަށް އަރާ ފޮނުވާލި ބާރު ހަމަލާއެއް ގޯލު އަރިމަތި ދަނޑީގައާއި ކީޕަރު އަތުގައި ޖެހިފައި ވަތް ލަނޑެކެވެ. މި ލަނޑަށްފަހުވެސް ނައިވާދޫ ޓީމުން ގިނަ ހަމަލާތަކެއް އުފެއްދިއެވެ. ނަމަވެސް ގިނަ އިރުތަކެއްނުވެ މަތިވެރި ޓީމުން އެޓީމުގެ ކަނާތު އަރިމަތިން ފޮނުވާލި ބާރު ހަމަލާއެއް ކީޕަރު ދިފާޢު ކުރުމުން ވެއްޓުނު ވަގުތު މަތިވެރީ ޓީމުގެ މުޙައްމަދު ޝަފްރާޒް ގޯލަށް ފޮނުވާލައިގެން ނަތީޖާ ހަމަހަމަކުރިއެވެ.
ނައިވާދޫއިން ޖެހި ދެވަނަ ލަނޑު ހާފު ނިމެން ހަތަރު މިނެޓަށްވެފައި އޮއްވާ ޖަހައިދިނީ ހުސައިން މައިޝަންއެވެ. މިއީ އަހުމަދު ހަމީދާއި، ޔާމިން މުޙައްމަދާއި، އަބްދުﷲ ޝާފިއު އާއި ހުސައިން މައިޝަން އެކުވެގެން އުފެއްދި ވަރަށް ޓީމް ގޯލެކެވެ. ނައިވާދޫގެ ތިންވަނަ ލަނޑަކީ ލިބުނު ހިލޭ ޖެހުމަކުން އަހުމަދު ހަމީދު ޖެހި ލަނޑެކެވެ. ހަތަރުވަނަ ލަނޑު ޖަހައިދިނީ މުޙައްމަދު އަސްލަމްއެވެ. މަތިވެރިޓީމުގެ ދެވަނަ ލަނޑު ޖަހާފައިވަނީ މެޗު ނިމެން ކުޑަ ވަގުތުކޮޅަކަށް ވެފައިވަނިކޮށް އަބްދުﷲ ފިޒާން އަބްދުލް ގަފޫރެވެ.
މި މެޗުގެ މޮޅު ކުޅުންތެރިޔާގެ މަގާމު ހޯދީ ނައިވާދޫ ޓީމުގެ ޖާޒީ ނަމްބަރ 98 އަހުމަދު ހަމީދެވެ.