ގޯލްޑެން ފުޓްސަލް ޗެލެންޖް 2026 ގެ ކުއާޓާ ފައިނަލުގައި ޕެނަލްޓީ ޖަހައިގެން މުބާރާތުގެ އެންމެ ކާމިޔާބު ޓީމު ކަމަށްވާ، ތ. ތިމަރަފުށި ބަލިކޮށް ގއ. ދެއްވަދޫ ސެމީއަށް ދަތުރުކޮށްފިއެވެ.
ރޭ ކުޅެވުނު ކުއާޓާ ފައިނަލުގައި ދެއްވަދޫ އާއި ތިމަރަފުށި ބައްދަލުކުރި މެޗުގެ ފުރިހަމަ ވަގުތު ހަމަވިއިރު އޮތީ 3-3 އިން އެއްވަރުވެފައެވެ. ދެއްވަދޫ ޓީމުގެ މުޙައްމަދު އިމްރާން ދެ ލަނޑު ޖެހިއިރު އެޓީމުގެ ތިންވަނަ ލަނޑު ޖަހައިދިނީ އަލީ ހައިސަމްއެވެ. ތިމަރަފުށީ ޓީމުގެ ލަނޑުތައް ޖަހައިދިނީ އަހުމަދު އަފްލާޒާއި، އަބްދުﷲ ޒިޔާނާއި އިބްރާޙިމް ސިނާހެވެ. ޕެނަލްޓީ ޖަހައިގެން ދެއްވަދޫ ކާމިޔާބުކުރީ 8-6ގެ ނަތީޖާއިންނެވެ.
ކުއާޓާ ފައިނަލު މެޗުތަކަށް އައިއިރު އެންމެ ގިނަބަޔަކު އިންތިޒާރުކުރީވެސް މި މެޗަށެވެ. ސަބަބަކީ ކުއާޓާއަށް ދެއްވަދޫ ދަތުރުކުރީ މުބާރާތުގެ އެންމެ ފެވަރިޓުންގެ ގޮތުގައި ހިމެނުނު ގދ. ވާދޫވެސް ކަޓުވާލުމަށްފަހުއެވެ. އަދި ތިމަރަފުއްޓަކީ މިމުބާރާތުގެ އެންމެ ކާމިޔާބު ޓީމެވެ.
މިމެޗުގެ މޮޅު ކުޅުންތެރިޔާގެ މަގާމު ހޯދީ ދެއްވަދޫ ޓީމުގެ ޖާޒީ ނަމްބަރު 7 މުޙައްމަދު އިމްރާނެވެ.