ދިވެހިންނަކީ ބަސްމޮށެ އުޅުމުގައި ހުނަރުވެރި ބައެކެވެ. އެގޮތުން ފާހަގަކޮށްލެވޭ އެއް ޖުމުލައެއް އެބަ އޮތެވެ. "ބިރުން ފިތް ކަނޑައިގެން ގޮއްސި"! ބިރުގަނެގެން "ފިތް" ކަނޑައިގެން ދާންވީ ކީއްވެ ހެއްޔެވެ؟ ފިތަކީ ކޮބައި ހެއްޔެވެ؟
އިންސާނާގެ ހަޖަމުގެ ނިޒާމަށް އެހީތެރިވެދޭ އެއް ގުނަވަނަކީ ފިތެވެ. އިނގިރޭސި ބަހުން ފިތަށް، ގޯލްބްލެޑާރ އޭ ކިޔައެވެ. ފިތް އިންނަނީ ފުރަމެއާއި ގުޅިގެން ފުރަމޭގެ ތިރީގައެވެ. ފުރަމެއިން އުފައްދާ ރީނދޫކުލައިގެ ދިޔަވަރެއް (ބައިލް) ފިތުގައި ރައްކާ ކުރެވެއެވެ. ފުރަމެއިން، ފިތާއި ގުޅިފައިވާ ހޮޅިން މި ދިޔަވަރު ފިތުގެ ތެރެއަށް ޖަމާވެއެވެ.
ކެއުމުގެ ކުރިން ފިތުގެ ތެރޭގައި ހުންނަ ދިޔަވަރުތައް ފިތުގެ ތެރޭގައި ޖަމާވެފައި ހުންނާނެއެވެ. ނަމަވެސް ކައި ނިމުމުން، ފިތުގެ ތެރޭގައި ހުންނަ މި ދިޔަތައް ކުޑަ ގޮހޮރުގެ ތެރެއަށް ފޮނުވާލަ އެވެ. މިކަން މި ނިޒާމުން ތަރުތީބު ވަނީ ހިއްސު ދެނެގަންނަ ނާރު ތަކުން ފޮނުވައިދޭ މެސެޖުތަކެއްގެ ސަބަބުންނެވެ.
ފިތަކީ ކުޑަ ފުއްޕާހަމެންހެން މަސައްކަތްކުރާ ގުނަވަނެކެވެ. އެގޮތުން ފިތުގެ ތެރެއަށް އެ ދިޔަވަރު އެޅިފައި ހުންނައިރު ހުންނާނީ ފުފިލާފައެވެ. ނަމަވެސް، ކުޑަ ގޮހޮރަށް އެ ދިޔަވަރު ހުސްކޮށްލުމުން، ފިތް އޮންނާނީ ހިނދިފައެވެ.
ފުރަމެއިން މި އުފައްދާ ދިޔަވަރުތަކުގެ ހަގީގީ ބޭނުމަކީ ކޮބައިހެއްޔެވެ؟ މި ދިޔަވަރަކީ ކާ ތަކެތީގައި ހުންނަ ތެލުގެ ބާވަތްތައް ނުވަތަ "ފެޓުގެ" ބައިބައިތައް ހަޖަމުކުރުމަށް އެހީވެދޭ އެއްޗެކެވެ. ބޮޑުކަމުދާ ތަކެތީގައި ހުންނަ ރީނދޫ ކުލައިގެ އަސަރަކީ މި ދިޔަވަރު ތަކުގެ އަސަރެވެ.
ފިތުގަައި އާންމުކޮށް ދިމައިވާ މައްސަލަތަކުގެ ތެރޭގައި ފިތުގެ އިންފެކްޝަނާއި ފިތުގައި ހިލަ އުފެދުން ހިމެނެއެވެ. މިފަދަ ކަމެއް ދިމައިވުމުގައި ފިތުގެ ކޮންމެވެސް ހޮޅިއެއް ބެދުން ހިމެނެއެވެ.
ދުޅަހެޔޮ ފިތެއް ދެމެހެއްޓުމަށްޓަކައި ރަނގަޅު ކާނާ ކެއުމާއި ހެލިފެލިވެ އުޅުން މުހިންމެވެ. އަދި ކެއުމުގައި އެއްފަހަރާ މާ ގިނައިން ނުކެއުމާއި، ކެއުމުގައި ހަމަ އަކާއި އުސޫލެއް ބެހެއްޓުން މުހިންމެވެ. އަދި ހަމައެއާއިއެކު ގަވައިދުން ގަޑިން ގަޑިއަށް ކެއުން ވެސް ވަރަށްވެސް މުހިންމު ކަމެކެވެ. މީގެ އިތުރުން ގިނައިން ފެން ބުއިމަކީވެސް ދުޅަހެޔޮ ފިތަކަށް މަގުފަހި ކުރުވާނޭ ކަމެކެވެ.
ދުޅަހެޔޮ ސިއްހަތެއްގައި ދެމިހުރުމަކީ ކޮންމެ މީހެއްގެ ވެސް އަމިއްލަ ޒިންމާއެކެވެ. ފަރުވާކުޑަ ކުރުމާއި އިހުމާލު ވުމަކީ އޭގެ ސަބަބުން ސިއްހަތުގެ ދުޅަހެޔޮކަމަށް އަސަރު ކުރުވާނޭ ކަމެކެވެ.