އިނގިރޭސި ޕްރިމިއަރ ލީގުގައި ރޭ ކުޅުނު މެޗުގައި ފަހަތުންއަރައި ލިވަޕޫލް އަތުން މެންޗެސްޓަރ ސިޓީ މޮޅުވެއްޖެއެވެ.
ލިވަޕޫލުގެ އަމިއްލަ ދަނޑުގައި އެތައް ހާސް ސަޕޯޓަރުންގެ ކުރިމަތީގައި ކުޅުނު މިމެޗަކީ ލީގު ހޯދުމުގެ ރޭހުގައި ދެމިއޮތުމަށް ސިޓީއަށް ނުހަނު މުހިންމު މެޗެކެވެ. ރޭގެ މެޗު ސިޓީއިން ކާމިޔާބުކުރީ 2-1 ގެ ނަތީޖާއިންނެވެ.
މެޗުގެ ފުރަތަމަ ހާފު ނިމުނީ ދެޓީމުންކުރެ އެއްވެސް ޓީމަކަށް ލަނޑެއްނުޖެހި އެއްވަރުވެގެންނެވެ. މެޗުގެ ފުރަތަމަ ލަނޑު ފެނިގެންދިޔައީ 74 ވަނަ މިނެޓުގައި ލިބުނު ހިލޭ ޖެހުމަކުންނެވެ. ސިޓީގެ ހާފުގެ މެދުތެރެއިން ކަހަލަ ގޮތަކަށް ލިވަޕޫލުގެ މިޑްފީލްޑަރ ޑޮމިނިކް ސަބޯސްލާއީ ފޮނުވާލި ބާރު ހަމަލާ ގޯލަށްވަނީ އަރިމަތީ ދަނޑީގައި ޖެހިލާފައެވެ.
މިއާއެކު ލިވަޕޫލަށް މެޗު ކާމިޔާބު ކުރެވުނީކަމަށް ތިއްބާ ސިޓީއަށް އުއްމީދެއް ގެނުވީ މެޗުގެ 84 ވަނަ މިނެޓުގައި އެޓީމުގެ ކެޕްޓަން ބެނާޑޯ ސިލްވާ ޖެހި ލަނޑުންނެވެ.
އޭގެފަހުން، މެޗު ނިމެންދަނިކޮށް ލިބުނު ޕެނަލްޓީއަކުން ހާލަންޑުވަނީ ސިޓީއަށް ލީޑު ނަގައިދީފައެވެ. އެލަނޑަށްފަހު ލިވަޕޫލުން ލަނޑެއް ޖެހޭތޯ މުޅި ޓީމު ކުރިއަށް އަރައިގެން ކުޅެމުންދިޔަ ދަނޑިވަޅެއްގައި ރަޔަން ޗާކީ ފޮނުވާލި ބޯޅައެއް ގޯލަށް ވަދެވަދެ އޮއްވާ ހިނގާދިޔަ ހާދިސާއެއްގެ ސަބަބުން ސަބޯސްލާއީ އަށް ރަތްކާޑު ދައްކާ ދަނޑުން ފޮނުވާލިއެވެ. އެ ބޯޅަ ގޯލަށް ވަތްނަމަވެސް، ވަނުމުގެ ކުރިން ހާލަންޑަށް ސަބޯސްލާއީ ވަނީ ފައުލް ކޮށްފައެވެ.
މިނަތީޖާއާއެކު ސިޓީ ދެވަނައިގައި އޮތީ 50 ޕޮއިންޓާއެކުއެވެ. އެއީ އެއްވަނައިގައި އޮތް އާސެނަލްއަށްވުރެ 6 ޕޮއިންޓް މަދުންނެވެ. މި މެޗުން ބަލިވި ލިވަޕޫލު އޮތީ 39 ޕޮއިންޓާއެކު ތާވަލުގެ ހަވަނައިގައެވެ.