ސްޕެނިޝް ލީގުގައި ރޭ ކުޅުނު މެޗުގައި އެތުލެޓިކޯ މެޑްރިޑް އަތުން ރެއާލް ބެޓިސް މުހިއްމު މޮޅެއް ހޯދައިފިއެވެ.
ރޭ އެތުލެޓިކޯގެ ދަނޑުގައި ކުޅުނު މިމެޗު ބެޓިސް ކާމިޔާބުކުރީ މެންޗެސްޓަރ ޔުނައިޓެޑުން ބޭނުން ނުވެގެން ދޫކޮށްލި ފޯވާޑު އެންޓޮނީ މެތިއުސް ޑޮސް ސަންތޯސް (އެންޓޮނީ) ކާމިޔާބުކުރި ގޯލުންނެވެ. މި ލަނޑު އެންޓޮނީ ޖެހީ މެޗުގެ 28 ވަނަ މިނެޓުގައި އަބްދޭ އެޒަލްޒޫލީ ތަނަވަސްކޮށްދިން ފުރުޞަތެއްގައެވެ.
މިމެޗުން އެތުލެޓިކޯ ބަލިވުމުން އެޓީމު ލަލީގާ ހޯދުމަށް ކުރަމުން އަންނަ މަސައްކަތަށް މިވަނީ ހިޔަނި އެޅިފައެވެ. ތާވަލުގެ ތިން ވަނައިގައި 45 ޕޮއިންޓާއެކު އެތުލެޓިކޯ އޮތްއިރު، ދެވަނައިގައި އޮތް ރެއާލް މެޑްރިޑާ ދެމެދު އޮތް ފަރަގު 12 ޕޮއިންޓަށް އަދި އެއްވަނައިގައި އޮތް ބާސެލޯނާއާ 13 ޕޮއިންޓަށް މިވަނީ ބޮޑުވެފައެވެ.
ލީގުގައި ކުޅުނު އެހެން މެޗުތަކަށް ބަލާއިރު، އެލްޗޭގެ މައްޗަށް 3-1 އިން ރިއަލް ސޮސިއެޑާޑް ކުރި ހޯދިއިރު ޑިޕޯޓިވޯ އަލަވެސް އަތުން ގެޓަފޭ މޮޅުވީ 2-0 އިންނެވެ. ލެވަންޓޭ އަތުން އެތުލެޓިކް ކުލަބު މޮޅުވީ 4-2 އިންނެވެ. އަދި ސެވިއްޔާއާއި ޖިރޯނާ ބައްދަލުކުރި މެޗު ނިމުނީ 1-1 އިން އެއްވަރުވެގެންނެވެ.