އެމެރިކާގެ ފްލޮރިޑާއަށް ނިސްބަތްވާ އަންހެނެއްގެ އެކައުންޓަށް އެއް ބިލިއަން ޑޮލަރު، މީހަކަށް އޮޅިގެން ޖަމާކުރެވުމުން، އެ ފައިސާގެ ވެރިފަރާތް ހޯދުމުގެ މަސައްކަތް އެ އަންހެން މީހާ ފަށައިފިއެވެ.
ޖޫލިޔާ ޔޮންކޯސްކީ ނަމަކަށް ކިޔާ މި އަންހެން މީހާއަށް ދިމާވި މި ހާދިސާގައި އޭނާ ބޭނުންވީ، އެފައިސާތަކުގެ ވެރިފަރާތަށް އެ ފައިސާ އަނބުރާ ހަވާލުކުރާށެވެ. ރިޕޯޓުތައް ބުނާގޮތުން އޭނާ އޭޓީއެމް އަށް ދިޔައީ އެންމެ 20 ޑޮލަރު ނަގާށެވެ. ނަމަވެސް އެކައުންޓުގައި ހުރީ ޖުމުލަ ފައިސާގެ އަދަދު ބަލާލިއިރު އޭނާވެސް ހައިރާންވިއެވެ.
އޭނާގެ އެކައުންޓުގައި ބިލިއަން ޑޮލަރު ހުރުމުގެ ސަބަބުން، އޭނާ ވެގެންދާނީ އެމެރިކާގެ 615 ވަނަ ބިލިއަނަރަށްކަމަށް ބައެއް ރިޕޯޓުތައް ބުނެއެވެ.
ގިނަ އަދަދެއްގެ ފައިސާ ޔޮންކޯސްކީގެ އެކައުންޓަށް ޖަމާވެފައިވުމާ ގުޅިގެން އޭނާ ވަނީ ބޭންކަށްވެސް ގޮސްފައެވެ. އަދި މިހާތަނަށްވެސް ފައިސާ ހޯދުމަށް މީހަކު ނުގުޅާކަމަށް އޭނާ ވަނީ ބުނެފައެވެ.
ޔޮންކޯސްކީ ބުނީ އޭނާގެ އެކައުންޓަށް ޖަމާވެފައިވާ ފައިސާ އަކީ އޭނާގެ ފައިސާ އަށް ނުވާތީ އޭގައި ނުޖެހޭނޭ ކަމަށެވެ. އަދި ފަހުން އެކަމުގެ ޒިންމާ އުފުލަން އޭނާއަށް ނުކެރޭނޭ ކަމަށްވެސް އޭނާ ވަނީ ބުނެފައެވެ. މީގެ ސަބަބުން ޔޮންކޯސްކީ އަކީ އަމާނާތްތެރި ކަމުގެ މިސާލެއް ކަމަށް ބުނެ ގިނަ ބަޔަކު އަންނަނީ އޭނާ އަށް ތައުރީފުކުރަމުންނެވެ. މިއަދުގެ މުޖުތަމައުތަކުގައި މިފަދަ އަމާނާތްތެރިންނަކީ ވަރަށްވެސް މަދު ބައެކެވެ.