ބިބިއާނޯ ފެނާންޑޭޒްގެ އިރުޝާދުގެ ދަށުން ތަމްރީނުވަމުން އަންނަ އިންޑިޔާގެ 17 އަހަރުން ދަށުގެ ފުޓްބޯޅަ ޓީމު ތުރުކީގެ 17 އަހަރުންދަށުގެ ފުޓްބޯޅަ ޓީމާ ދެކޮޅަށް އެކުވެރިކަމުގެ މެޗުތަކެއް ކުޅުމަށް ތާވަލުކޮށްފިއެވެ.
ކުރިޔަށް އޮތް 17 އަހަރުންދަށުގެ އޭސިއަން ކަޕަށް ތައްޔާރުވުމުގެ ގޮތުން ކުޅެވޭ މިމެޗުތައް ކުޅޭނީ 10 އަދި 12 ފެބުރުވަރީގައި ތުރުކީގެ އެންޓަލްޔާގައެވެ. މިމެޗުތަކަށް މިހާރުވަނީ 24 ކުޅުންތެރިންގެ ސްކޮޑެއް ކޯޗު އެކުލަވާލާފައެވެ.
ސައުދީ އަރަބިއްޔާގައި މިއަހަރު އޮންނަ އޭސިއަންކަޕަށް ތައްޔާރުވުމުގެ ގޮތުން މީގެކުރިންވެސް އެޓީމުންވަނީ ތަޖިކިސްތާނުގެ އެއުމުރުފުރައިގެ ޓީމާ ދެކޮޅަށް ދެމެޗެއް ކުޅެފައެވެ. އެއް މެޗު 4-2 އިން މޮޅުވިއިރު އަނެއް މެޗު ނިމުނީ އެއްވެސް ކޮޅަކަށް ލަނޑެއްނުޖެހި ދެޓީމު އެއްވަރުވެގެންނެވެ.
ތުރުކީގެ 17 އަހަރުންދަށުގެ ޓީމު މީގެ ކުރިންވަނީ ޔުއެފާ ޔޫރަޕިއަން އަންޑަރ 17 މުބާރާތް ދެފަހަރު ކާމިޔާބު ކޮށްފައެވެ. އަދި 2005 ވަނަ އަހަރު އެޓީމުވަނީ ފީފާ އަންޑަރ 17 ވޯލްޑްކަޕްގެ ސެމީ ފައިނަލަށް ދަތުރުކޮށްފައެވެ.