މިއީ އޭނާގެ ހަޔާތުގައިވެސް ހޭދަކުރަމުންދާ އެންމެ އުނދަގޫ ސީޒަންކަމުގައި ލިވަޕޫލުގެ ކޯޗު އާނޭ ސްލޮޓް ބުނެފިއެވެ.
ސަންޑަލޭންޑާ ދެކޮޅަށް މާދަމާރޭ ކުޅޭ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ސްލޮޓް ބުނީ މިއީ އޭނާ ކޯޗިން ކެރިއަރުގައިވެސް ހޭދަކުރަމުންދާ އެންމެ އުނދަގޫ ދުވަސްތައްކަމަށާއި، އޭނާގެ ކުލަބު ލިވަޕޫލު، އަސްލު ލިވަޕޫލު ކުޅެންޖެހޭ މިންވަރާ ގާތަށްވެސް ކުޅެމުން ނުދާކަމަށެވެ. ނެދަލޭންޑަށް ނިސްބަތްވާ ކޯޗު އިތުރަށް ބުނީ، އަންނަ ސީޒަނުގައި ޗެމްޕިއަންސްލީގު ކުޅެން ބޭނުންވާނަމަ، އެންމެ ފުރިހަމައަށް ބާކީ ހުރި މެޗުތަކުގައި ކުޅެންޖެހޭކަމަށެވެ. އަދި ޗެމްޕިއަންސްލީގާ ނުލާ ލިވަޕޫލު ސީޒަނަކާ ކުރިމަތިލާން ޖެހުމަކީ ގަބޫލުކުރާކަމެއްނޫންކަމަށެވެ.
މި މޭރުމުން ސްލޮޓް ވާހަކަ ދައްކާފައިވާއިރު، ލިވަޕޫލުން އެންމެ ފަހުން ލީގުގައި ކުޅުނު ދެމެޗުންވެސްވަނީ ބަލިވެފައެވެ. އެންމެފަހު މެޗުގައި ސޮބޯސްލާއިގެ ހިތްގައިމު ހިލޭޖެހުމުން ކުރި ހޯދާފައިވަނިކޮށް ފަހު 15 މިނެޓު ތެރޭގައި ފަހަތުން އަރައި ސިޓީވަނީ މޮޅުވެފައެވެ. އަދި ލިވަޕޫލު ދެން ކުޅޭ މެޗުގައި ނުކުންނަ ސަންޑަލޭންޑް އަމިއްލަ ދަނޑުގައި އަދި މި ސީޒަނުގައި ބަލިވެފައެއްނުވެއެވެ.