ސްޕެއިންގެ ގަދަބާރު، ރެއާލް މެޑްރިޑުގައި ބޭނުން ނުހިފި، ލޯނު އުސޫލުން ފްރެންޗް ލީގުގެ ލިޔޯންއަށް ދޫކޮށްފައިވާ ބުރެޒިލްގެ ޒުވާން ފޯވާޑު އެންރިކް ފިލީޕޭ މޮރެއިރާ ލިޔޯންގައި ދައްކަމުން އަންނަ މޮޅު ކުޅުމާއެކު ބުރެޒިލްގެ ގައުމީޓީމުން ފެނިދާނެކަމަށް އުއްމީދު ކުރެވެން ފަށައިފިއެވެ.
ބުރެޒިލްގެ ޕަލްމެއިރާސްއިން 2024 ވަނަ އަހަރު ރެއާލް މެޑްރިޑަށް ބަދަލުވި އެންރިކް ރެއާލް މެޑްރިޑްގައި އެންމެ އެދެވޭ ކުޅުމެއް ނުދެއްކުނެވެ. ޕަލްމެއިރާސްގައި އެންރިކް ދެއްކި ކުޅުމުގެ ސަބަބުން 2023 ވަނަ އަހަރުގެ އޮކްޓޯބަރ 11 ވަނަ ދުވަހު އިނގިރޭސި ނޫސް މަޖައްލާއެއްކަމަށްވާ ދަ ގާޑިއަންއިން ވަނީ އެންރިކަކީ 2006 ވަނަ އަހަރު އުފަންވި ކުޅުންތެރިންގެ ތެރެއިން ދުނިޔޭގެ އެވަގުތު އެންމެ މޮޅު ޒުވާން ކުޅުންތެރިޔާކަމަށް ހާމަކޮށްފައެވެ. އެއާއެކު އުމުރުން އެންމެ 18 އަހަރުގައި ރެއާލްއިން އެންރިކްގެ ސޮއި ހޯދިއެވެ. އެންރިކް ރެއާލްއަށް ބަދަލުވި ފީ އެކުލަބުން ހާމަކޮށްފައި ނުވިނަމަވެސް، ކުޅިވަރު ޚަބަރުތައް ގެނެސްދޭ ނޫސް މަޖައްލާތަކުން ހާމަކޮށްފައިވާ ގޮތުގައި، އެންރިކް ރެއާލަށް ބަދަލުވީ 60 މިލިއަން ޕައުންޑްގެ ފީއަކަށެވެ.
ރެއާލަށް ބަދަލުވެ، ކުޅުނު ފުރަތަމަ މެޗުގައި ލަނޑުޖަހައި، ލަލީގާގެ ތާރީޚުގައިވެސް ރެއާލްއަށް ލަނޑުޖެހި ގައުމުން ބޭރުގެ އެންމެ ހަގު ކުޅުންތެރިޔާގެ ޝަރަފު ހޯދިއެވެ. އެލަނޑު ޖެހިއިރު، އޭނާގެ އުމުރަކީ 18 އަހަރާއި 35 ދުވަހެވެ. އެހެންނަމަވެސް، ރެއާލްގެ އައު ކޯޗު ޒަބީ އޮލޮންސޯގެ އިރުޝާދުގެ ދަށުން މާ އެދެވޭ ކުޅުމެއް ނުދެއްކި، 23 ޑިސެމްބަރ 2025 ގައި ލޯނެއްގެ ދަށުން ލިޔޯނަށް ބަދަލުވިއެވެ.
ލިޔޯންއަށް އެންރިކް ދިޔަ ދަނޑިވަޅަކީ، އެޓީމުގައި ރަސްމީ ފޯވާޑެއް ނެތް ދުވަސްކޮޅެކެވެ. ކުލަބަށް ދިމާވެފައިވާ މާލީ ނުތަނަވަސްކަމާ ގުޅިގެން ކުލަބުގެ ސްޕޯޓިންގ ޑިރެކްޓަރަކަށް ހުރި މެތިއު ލުވި ޖީން އޭރު ދިޔައީ ކުލަބަށް އެންމެ ބޭނުންވާ ކުޅުންތެރިން ހޯދުމުގެ މަސައްކަތްކުރަމުންނެވެ. ޚާއްސަކޮށް އެހެން ކުލަބުތަކުން މާބޮޑު އަޅާލުމެއްނެތް، ޝައުޤުވެރިކަން ނެތް ކުޅުންތެރިންނަށް އަމާޒު ހިފައިގެން ކުލަބުގެ މަގާމުތަކަށް ކުޅުންތެރިންނަށް ފާރަލަމުންނެވެ. އެހެންކަމުން ރެއާލުން ސަލާމަތްވުމަށް ބޭނުންވެފައި ހުރި އެންރިކަށްވެސް އެންމެ ރަނގަޅު ގޮތެއްކަމަށް ފެނުނީ ލޯނެއްގެ ދަށުންވިޔަސް ލިޔޯނަށް ބަދަލުވުމެވެ.
ލިޔޯނަށް ބަދަލުވެ، އެންރިކް ކުޅުނު ފުރަތަމަ މެޗުގައި ލިލް ކޮޅަށް މެޗުގެ 42 ވަނަ މިނެޓުގައި ލަނޑުޖެހިއެވެ. އެއާއެކު ކުޅުނު 5 މެޗުން 4 ލަނޑު ލިޔޯންއަށް އެންރިކް ޖަހައިދިނެވެ. މީގެ ތެރޭގައި މެޒް ކޮޅަށް ހެދި ހެޓްރިކް ހިމެނެއެވެ. މި ހެޓްރިކް ހިމެނިގެން ދިޔައީ ފްރެންޗް ލީގުގެ މެޗެއްގައި ލިޔޯންގެ ޖާޒީގައި ހެޓްރިކެއް ހެދި އެންމެ ޒުވާން ކުޅުންތެރިޔާއަށެވެ. އެއީ ބާނާޑް ލަކޮމްބެ މީގެ 54 އަހަރު ކުރިން ހެދި ރެކޯޑެކެވެ.
ލިޔޯންއަށް ބަދަލުވުމުގައި ބްރެޒިލްގެ ލޫކަސް ޕެކުއެޓާ އާއި ބްރޫނޯ ގިމަރޭސްގެ ދައުރު ބޮޑުކަމަށާއި، ބަދަލުވުމުގެ މަރުހަލާގައި ބުރެޒިލްގެ މިހާރުގެ ކޯޗު އަދި ރެއާލްގެ ކުރީގެ ކޯޗު ކާލޯ އެންޗެލޯޓީގެ ލަފައަށްވެސް އެދުނުކަމަށް އެންރިކްވަނީ ބުނެފައެވެ. އޭނާ ބޭނުންވީ ހިތްހަމަޖެހިގެންހުރެ، ކުޅޭނެ ވަގުތު ލިބިގެން ހުނަރު ދައްކައިގެން ކުރިޔަށް އޮތް ވޯލްޑްކަޕަށްދާ ބުރެޒިލް ޓީމުގައި ހިމެނުމެވެ.
އެންރިކް ބަދަލުވުމުގެ ކުރިން ފްރެންޗް ލީގުން ރެލިގޭޓުވުމުގެ ބިރު ހީވެފައި އޮތް ލިޔޯން މިހާރު އޮތީ ރަނގަޅު ފޯމެއްގައެވެ. މިވަގުތު ޔުރޮޕާ ލީގުގެ ލީގު މަރުހަލާގައި އެންމެ ކުރީގައި ނިންމާލާފާއިވާއިރު، ފްރެންޗް ކަޕުގެ ކުއާޓާ ފައިނަލަށް އެ ޓީމުވަނީ ދަތުރުކޮށްފައެވެ. އަދި އަންނަ ސީޒަނުގައި ޗެމްޕިއަންސްލީގުގައި ކުޅުމުގެ ފުރުޞަތުވަނީ ވަރަށް ބޮޑަށް ތަނަވަސްކޮށްފައެވެ. އެހެންކަމުން، ރެއާލުން އެންރިކްގެ ކުޅުމާމެދު ހިތްހަމަ ނުޖެހުނަސް، އޭނާ ދެކެމުން އަންނަ ހުވަފެނަކީ ލިޔޯންއާއެކު ތާރީޚުގެ ތެރެއަށް ވަންނާށެވެ. އެއާއެކު ވޯލްޑްކަޕުގައިވެސް ކުޅުމުގެ ފުރުޞަތު ހޯދުމެވެ.