ބޮލީވުޑްގެ ކުޅަދާނަ އެކްޓަރު ރަންވީރު ސިންގު، މަޝްހޫރު ފިލްމު ސީރީޒް 'ޑޮން 3' އިން ވަކިވެއްޖެ ކަމަށް މީޑިއާ ރިޕޯޓުތައް ބުނަން ފަށައިފިއެވެ. މީގެ ދެ އަހަރެއްހާ ދުވަސް ކުރިން ޑައިރެކްޓަރު ފަރުހާން އަހްތަރު ވަނީ މި ރޯލަށް ރަންވީރު ހަމަޖައްސާފައިވާކަން ރަސްމީކޮށް އިއުލާންކޮށްފައެވެ. ނަމަވެސް، ފިލްމުގެ މަސައްކަތް ފެށުން ލަސްވުމުގެ ސަބަބުން ރަންވީރު މިހާރު ވަނީ މި ޕްރޮޖެކްޓް ދޫކޮށްލަން ނިންމާފައެވެ.
މި ފިލްމު ދޫކޮށްލަން ޖެހުނު މައިގަނޑު ސަބަބެއް ކަމަށް ވަނީ، ރަންވީރު ސޮއިކޮށްފައިވާ އެހެން ބޮޑު ފިލްމަކާ ތާރީހުތައް ފުށުއެރުމެވެ. ރިޕޯޓުތައް ބުނާގޮތުން، 'ޑޮން 3' ގެ ސްކްރިޕްޓް ފުރިހަމަ ކުރުމަށް ފަރުހާން އިތުރު ވަގުތު ބޭނުންވުމުން، ޝޫޓިން ފެށޭނެ ދުވަހެއް ނޭނގި ދިގުލައިގެން ދިއުމަކީ ރަންވީރު މި ނިންމުން ނިންމަން މެދުވެރިވި ސަބަބެވެ. އޭނާ ވަނީ ދެކުނު އިންޑިއާގެ ޑައިރެކްޓަރެއްގެ ބޮޑު ފިލްމަކަށް ތާރީހުތައް ދީފައި ކަމަށްވެއެވެ.
މިކަމާ ގުޅޭގޮތުން ފިލްމުގެ ޕްރޮޑަކްޝަން ޓީމާ ގާތް ފަރާތަކުން ބުނެފައިވަނީ، "ރަންވީރު ހުރީ މި ފިލްމަށް ވަރަށް ބޮޑަށް ތައްޔާރުވެގެން. ނަމަވެސް އޭނާގެ ވަގުތުތައް އެހެން ޕްރޮޖެކްޓްތަކަށް ބަހާލަން ޖެހުމުން، އިތުރަށް އިންތިޒާރު ކުރެވެން ނެތީ،" ކަމަށެވެ.
މީގެ އިތުރުން، ފިލްމުގެ ބަޖެޓާ ގުޅޭގޮތުން ވެސް ބައެއް ހިޔާލު ތަފާތުވުންތައް ޕްރޮޑިއުސަރުންނާއި އެކްޓަރާ ދެމެދު ހުރި ކަމަށް އަޑުތައް ފެތުރިފައިވެއެވެ.
ރަންވީރު މި ފިލްމުން ވަކިވުމާއެކު، ދެން ޑޮންގެ ރޯލުން ފެންނާނީ ކާކުތޯ ބެލުމަށް ގިނަ ބަޔަކު ވަނީ ޝައުގުވެރިވެފައެވެ. ބައެއް ފޭނުން އުއްމީދު ކުރަނީ އަލުން ޝާހް ރުކް ހާން މި ރޯލަށް ގެނައުމަށެވެ. ނަމަވެސް، އެކްސެލް އެންޓަޓެއިންމަންޓުން މިހާރު މަސައްކަތް ކުރަމުން ދަނީ ޒުވާން އެހެން އެކްޓަރަކު ހޯދުމަށް ކަމަށް ވެސް ބޮލީވުޑްގެ ހަބަރުތައް ގެނެސްދޭ ނޫސްތަކުން ބުނެއެވެ.