ބޯ ކޮށާނީ މެންޗެސްޓަރ ޔުނައިޓެޑު ޖެހިޖެހިގެން ފަސް މެޗު ކާމިޔާބު ކުރީމާކަމަށްބުނެ ނަދުރުބުނި ސަޕޯޓަރުގެ ބޯކޮށުމަށް އިތުރު އިންތިޒާރެއް ކުރަން ޖެހިއްޖެއެވެ.
މައިކަލް ކެރިކްގެ އިރުޝާދުގެ ދަށުން ލީގުގައި އެންމެފަހުން ކުޅުނު ހަތަރު މެޗު ކާމިޔާބުކޮށްފައި ޔުނައިޓެޑް ހަމަބިމަށް ތިރިކޮށްލީ ރެލިގޭޝަނާ ހަނގުރާމަކުރަމުން އަންނަ ވެސްޓްހޭމް ޔުނައިޓެޑުންނެވެ. މެޗަށް ނުކުތްއިރުވެސް ތާވަލުގެ 18 ވަނައިގައި އޮތް ވެސްޓްހޭމްގެ އަމިއްލަ ދަނޑުގައި ކުޅުނު މިމެޗު ނިމުނީ 1-1 އިން އެއްވަރުވެގެންނެވެ.
މެޗުގެ ފުރަތަމަ ހާފު އެއްވެސް ޓީމަކަށް ލަނޑެއް ނުޖެހި އެއްވަރުވިއިރު، ދެވަނަ ހާފު ފަށައިގެން މާގިނަ އިރުތަކެއްނުވެ، ވެސްޓްހޭމްއަށް ލީޑު ނަގައިދިނީ ނެގި ކެޕްޓަން ޖަރޮޑް ބޮވެން ނަގައިދިން ހުރަހަކުން އެޓީމުގެ މިޑްފީލްޑަރު، ސޫޗެކް އެވެ. މިނަތީޖާއާއެކު މެޗު ނިމެންދަނިކޮށް ޔުނައިޓެޑަށް އެއްވަރު ކޮށްދިނީ ބަދަލު ކުޅުންތެރިއެއްގެ ގޮތުގައި ނުކުތް ބެންޖަމިން ސެސްކޯއެވެ. މި ލަނޑުގެ ކުރިންވެސް ޔުނައިޓެޑްގެ ފޯވާޑް ޒާކްޒީ އަށް ލަނޑުޖަހާނެ ރަނގަޅު ފުރުސަތެއްލިބި ބޭނުމެއް ނުކުރެވުނެއެވެ. އޭނާ ބޮލުން ފޮނުވާލި ނުރައްކާތެރި ހަމަލާ ދިޔައީ އަރިމަތި ދަނޑި ކައިރިންނެވެ.
މި ނަތީޖާއާއެކު ޔުނައިޓެޑު ވަނީ ތާވަލުގެ ފަސްވަނައަށް ވެއްޓިފައެވެ. ޗެލްސީއާ ޕޮއިންޓްގެ ގޮތުން އެއްވަރުވެ، ފައިދާ ގޯލުގެ ތަފާތުން ތާވަލުގެ ހަތަރު ވަނައަށް ޗެލްސީ ވަނީ ޖެހިލާފައެވެ.
މެޗުގެ ކުރިން ގިނަ ބައެއްގެ ސަމާލުކަން ހުއްޓިފައި އޮތީ ޔުނައިޓެޑް މިމެޗުން މޮޅު ވެއްޖެނަމަ، ބޯ ކޮށާނެކަމަށް ބުނެފައިވާ ފްރޭންކް ލެޓްއަށެވެ. ގިނަ ބަޔަކު މިކަމަށް ހަޖޫ ޖަހާފައިވާއިރު، އެއްބަޔަކު ބުނާ ގޮތުގައި އޭނާއަށްޓަކައިވެސް ޔުނައިޓެޑު މޮޅުވާން ޖެހޭނެކަމަށެވެ. ފްރޭންކް ލެޓް ނުވަތަ މީސްމީޑިއާގައި މަޝްހޫރު ނަމުންނަމަ، ޔުނައިޓެޑް ސްޓްރޭންޑް، ޔުނައިޓެޑް ފަސް މެޗުން މޮޅުވީމާ ނޫނީ ބޯ ނުކޮށަން ވަޢުދުވީ ލީގުގައި ޔުނައިޓެޑު ދައްކަމުން އަންނަ ދަށް ކުޅުމުގެ ސަބަބުން ޓީމު މަތިން ފޫހިވެފައިވާ ސަޕޯޓަރުންގެ މެދުގައި އައު ރޫޙެއް އުފެއްދުމަށެވެ.
ފްރޭންކް ލެޓް ބޯ ނުކޮށާތާ 493 ދުވަސް ވެފައިވާއިރު، އަނެއްކާވެސް މިވަނީ ޔުނައިޓެޑު ޖެހިޖެހިގެން ފަސް މެޗުން މޮޅުވާން އަލުން ސުމަކުން ފަށަން ޖެހިފައެވެ.