އިނގިރޭސި ޕްރިމިއަރ ލީގުގައި ރޭ ނިއުކާސަލް ޔުނައިޓެޑު އަތުންވެސް ބަލިވެ ޓޮޓްނަމް ހޮޓްސްޕަ ރެލިގޭޓުވުމުގެ ބިރާ ކުރިމަތިލާން ޖެހިއްޖެއެވެ.
އަމިއްލަ ދަނޑުގައި ޓޮޓްނަމް ބަލިވީ 2-1 ގެ ނަތީޖާއަކުންނެވެ. މި މެޗުގެ 44 ވަނަ މިނެޓުގައި ނިއުކާސަލް ޔުނައިޓެޑުގެ ވިލޮކް ލަނޑެއް ޖެހިނަމަވެސް، ވީއޭއާރް އިން ބެލުމަށްފަހު ލަނޑެއް ނޫންކަމަށް ރެފްރީ ނިންމިއެވެ. ނަމަވެސް، ފުރަތަމަ ހާފު ނިމުމުގެ ކުރިން، އިތުރު ވަގުތުގައި އެޓީމުގެ މާލިކް ތިއާއޯ ލަނޑެއް ޖަހައި ނިއުކާސަލްއަށް ލީޑު ނަގައިދިނެވެ. ޓޮޓްނަމް އަށް ނަތީޖާ ހަމަހަމަކޮށްދިނީ މެޗުގެ 64 ވަނަ މިނެޓުގައި އާޗީ ގްރޭ އެވެ. ނަމަވެސް، އެގޮތުގައި މާގިނައިރު ހިފަހައްޓާ ނުލެވި އުޅެނިކޮށް ޖޭކޮބް ރަމްސީ ލަނޑެއް ޖަހައި ދެވަނަ ފަހަރަށް ނިއުކާސަލްއަށް ލީޑު ނަގައިދިނެވެ.
މިނަތީޖާއާއެކު ޓޮޓްނަމް އޮތީ ތާވަލުގެ 16 ވަނައިގައެވެ. އެއީ ކުޅުނު 26 މެޗުން ލިބުނު 29 ޕޮއިންޓާއެކުގައެވެ. ނިއުކާސަލްގެ މިމޮޅާއެކު ވަނީ ތާވަލުގެ 10 ވަނައަށް ޖެހިލާފައެވެ.
މި ސީޒަނުގައި ޓޮޓްނަމް ދައްކަމުންދާ ދަށްކުޅުމާ ގުޅިގެން އެޓީމުގެ ކޯޗު ތޯމަސް ފްރޭންކްގެ ވަޒީފާ ގެއްލިދާނެކަމަށް މީޑިއާ ރިޕޯޓުކުރިނަމަވެސް، އޭނާވަނީ ވަޒީފާ ގެއްލުމުގެ ބިރެއް އަދި ނެތްކަމަށާއި، ނަތީޖާތައް ރަނގަޅުކުރުމަށް ރެއާ ދުވާލު މަސައްކަތްކުރާ ކަމަށާއި، މިއީ އެކަކު އެކަނި ބަދަލުކުރެވޭނޭ ހާލަތެއް ނޫންކަމަށާއި ކަންކަން ރަނގަޅުކޮށް ނަތީޖާތައް ރަނގަޅު ކުރަން ޖެހޭކަމަށް ގަބޫލުކުރާކަމަށްވެސް އޭނާ ބުނެފައިވެއެވެ.
ރޭގެ ބައްޔަކީ، މި ސީޒަނުގައި ޓޮޓްނަމް، ލީގުގައި ބަލިވި 11 ވަނަ މެޗެވެ. މިއާއެކު އެޓީމު މިހާރު އޮތީ ރެލިގޭޝަން ޒޯނާ 5 ޕޮއިންޓުގެ ތަފާތެއްގައެވެ.