މިހާރު ކުރިޔަށްދާ ހިޔުންޑައި ގޯލްޑެން ފުޓްސަލް ޗެލެންޖް 2026 ގެ ސެމީފައިނަލު މެޗުތައް މިރޭ ކުޅެވޭނެއެވެ.
މިރޭ ހުޅުމާލޭ ރެހެންދި ފުޓްސަލް ދަނޑުގައި ކުރިޔަށްދާ މި މެޗުތަކުގެ ތެރެއިން 8 ޖަހާއިރު ގްރައުންޑް 1 ގައި ކުޅެވޭ މެޗުގައި ބައްދަލުކުރާނީ ހދ. ނައިވާދޫއާއި ބ. އޭދަފުއްޓެވެ. މީގެ ތެރެއިން ހދ. ނައިވާދޫއަކީ މިދިޔަ އަހަރުގެ މުބާރާތުގެ ފައިނަލުގައި އެއްކޮޅުން ކުޅުނު ޓީމެކެވެ. އަދި ބ. އޭދަފުއްޓަކީ 2024 ވަނަ އަހަރުގެ މުބާރާތް ކާމިޔާބުކުރި ޓީމެވެ. މި ދެޓީމުގައިވެސް ފުޓްސަލްގައި ގައުމީ ފެންވަރުގެ މޮޅެތި ގިނަ ކުޅުންތެރިންތަކެއް ހިމެނުމާއި، ދާދި މިދާކަށްދުވަހު ނިމުނު ސާފް ފުޓްސަލް ޗެލެންޖް ރާއްޖެއަށް ކާމިޔާބު ކުރުމުގައި ބޮޑު ދައުރެއް އަދާކުރި ގިނަ ކުޅުންތެރިން މި ދެޓީމުގައިވެސް ހިމެނޭތީ، މި މެޗު ވެގެންދާނީ ވަރަށް ފޯރިގަދަ އަދި ވާދަވެރި މެޗަކަށެވެ.
މިދިޔަ އަހަރު ނައިވާދޫ ފައިނަލަށް ދަތުރުކުރި ނަމަވެސް، ފައިނަލުގައި ބަލިވީ އެވަގުތު އެންމެ ރަނގަޅު ފޯމުގައި ކުޅެމުންދިޔަ ކ.ކާށިދޫ އަތުންނެވެ. މިއަހަރު ނައިވާދޫ ފައިނަލަށް ދަތުރުކޮށްފިނަމަ، ވެގެންދާނީ ޖެހިޖެހިގެން ދެ ފައިނަލަށް ދަތުރުކުރި 3 ވަނަ ޓީމުގެ ގޮތުގައެވެ. މި ޝަރަފު ކުރިން ހޯދާފައިވަނީ ލ.ގަމާއި ތ.ތިމަރަފުއްޓެވެ. ނައިވާދޫ ސެމީއަށް ދަތުރުކުރީ ހދ. އަތޮޅު ބުރާއި، ޒޯން ބުރުގެ ޗެމްޕިއަންކަން ހޯދައި، ގަދަ 16 ގައި ދިއްގަރު ބަލިކޮށް އަދި ކުއާޓާގައި މަތިވެރި ކައިރިން ކުރި ހޯދައިގެންނެވެ.
ބ. އޭދަފުށި ނުކުންނަނީ 2024 ވަނަ އަހަރުގެ ކާމިޔާބީ ތަކުރާރުކުރާށެވެ. 2019 ވަނަ އަހަރާއި 2024 ގެ ފައިނަލުގައި ކުޅުނު އޭދަފުށި މިފަހަރުގެ މުބާރާތުގައި އަންނަނީ ތަފާތު މޮޅު ކުޅުމެއް ދައްކަމުންނެވެ. އެޓީމު ސެމީއަށް ދަތުރުކުރީ އަތޮޅާއި ޒޯން ބުރުގެ ޗެމްޕިއަންކަން ހޯދައި، ގަދަ 16 ގައި މައްޗަންގޮޅި މައްޗަށް ކުރި ހޯދައި، ކުއާޓާ ފައިނަލުގައި ޕެނަލްޓީ ޖަހައިގެން ރ.ދުވާފަރު ބަލިކޮށްގެންނެވެ.
ދެވަނަ ސެމީގައި، 10 ޖަހާއިރު ކުޅެވޭ މެޗުގައި ބައްދަލުކުރާނީ ގއ. ދެއްވަދޫއާއި ވިލިމާލެއެވެ. މިއީ މި ދެޓީމަށްވެސް މިމުބާރާތުގެ ފައިނަލަށް ދަތުރުކުރުމަށް ލިބޭ ފުރަތަމަ ފުރުޞަތެވެ. މިއިން ކޮންމެ ޓީމެއް މޮޅުވިޔަސް، އެޓީމެއް ތާރީޚުގެ ތެރެއަށް ވަދެގެންދާނެއެވެ.
މި ސެމީ ފައިނަލުވެސް ވަކި ފޯރިދަށެއް ނުވާނެއެވެ. ސާފް ފުޓްސަލް މުބާރާތުގެ ކާމިޔާބީގެ ބޮޑު ހިއްސާއެއް އޮތް ދެއްވަދޫ ޓީމު ދައްކަނީ އާދަޔާ ޚިލާފު ހިތްވަރެކެވެ. މިމުބާރާތުގެ އެންމެ ކާމިޔާބު އެއް ޓީމު ތ.ތިމަރަފުށި ކަޓުވާލުމަށްފަހު ސެމީއަށް ދަތުރުކުރި ދެއްވަދޫ، މުބާރާތުގެ ސެމީއާ ހިސާބަށްވެސް ދަތުރުކުރި މިއީ ފުރަތަމަ ފަހަރެވެ. އެޓީމު ސެމީއަށް ދަތުރުކުރީ އަތޮޅާއި ޒޯންވެސް ކާމިޔާބުކޮށް ގަދަ 16 ގައި ކެޔޮދޫ ބަލިކޮށް އަދި ކުއާޓާގައި ތިމަރަފުށި ހަމަބިމަށް ތިރިކޮށްފައެވެ.
އަނެއްކޮޅުން ވާދަކުރާ ވިލިމާލެ ޓީމަށްވެސް މިމުބާރާތުގެ މިހާ ހިސާބަށް ދަތުރުކުރުމަކީ ކާމިޔާބެކެވެ. ހުނަރުވެރި އަދި މަޝްހޫރު ތަރިން ގިނަ މިޓީމު ސެމީއަށް ދަތުރުކުރީ ގަދަ 16 ގައި ޕެނަލްޓީ ޖަހައިގެން ގާފަރު ބަލިކޮށް އަދި ކުއާޓާ ފައިނަލުގައި ތަފާތު ބޮޑުކޮށް 5-1 އިން ކުޑަހުވަދޫ ބަލިކޮށްގެންނެވެ. އެހެންކަމުން މިވަގުތު ފޯމުގައި އޮތް ވިލިމާލެ ބަލިކުރުމަކީ ދެއްވަދޫއަށް ފަސޭހަ ކަމަކަށް ނުވާނެއެވެ.
ގޯލްޑެން ފުޓްސަލް ޗެލެންޖްއަކީ މުޅި ރާއްޖެއަށް ހުޅުވާލައިގެން ކޮންމެ އަހަރަކުވެސް ގޯލްޑެން ފުޓްސަލް އެސޯސިއޭސަންއިން ބާއްވަމުން ރާއްޖޭގެ އެންމެ ބޮޑު އަދި ދުވަސްވީ ފުޓްސަލް މުބާރާތެވެ.