އިނގިރޭސި ޕްރިމިއަރލީގުގެ ޓޮޓްނަމް ހޮސްޕަގެ ކޯޗުކަމުގެ މަޤާމުން ތޯމަސް ފްރޭންކް ވަކިކޮށްފިއެވެ.
ޕްރިމިއަރ ލީގުގައި ޓޮޓްނަމް ހޯދަމުންދާ ދަށް ނަތީޖާތަކާ ގުޅިގެން ފްރޭންކް މަގާމުން ވަކިކުރީ މިއަދުއެވެ. ޓޮޓްނަމް ހޮސްޕަރ އެންމެފަހުން ކުޅުނު 17 މެޗު ތެރެއިން މޮޅުވެފައިވަނީ އެންމެ ދެ މެޗުންނެވެ. އެއާއެކު އެޓީމު މިވަގުތު އޮތީ ތާވަލުގެ ސޯޅަވަނައިގައެވެ.
އެންމެފަހުން އެޓީމު ރޭ ނިއުކާސަލް ޔުނައިޓެޑު އަތުން 2-1 ގެ ނަތީޖާއިން ބަލިވި މެޗަށްފަހު ނޫސްވެރިންނާ ވާހަކަ ދައްކަމުން ފްރޭންކް ބުނެފައިވަނީ އޭނާ އެ މަގާމުގައި ދެމިހުރެވޭނޭކަމުގެ 1000 އިންސައްތަ ޔަގީންކަން ދޭކަމަށެވެ. މި ސީޒަނުގައި ޓޮޓްނަމް ދައްކަމުންދާ ދަށްކުޅުމާ ގުޅިގެން ވަޒީފާ ގެއްލުމުގެ ބިރެއް އަދި ނެތްކަމަށާއި، ނަތީޖާތައް ރަނގަޅުކުރުމަށް ރެއާ ދުވާލު މަސައްކަތްކުރާ ކަމަށާއި، މިއީ އެކަކު އެކަނި ބަދަލުކުރެވޭނޭ ހާލަތެއް ނޫންކަމަށާއި ކަންކަން ރަނގަޅުކޮށް ނަތީޖާތައް ރަނގަޅު ކުރަން ޖެހޭކަމަށް ގަބޫލުކުރާކަމަށްވެސް އޭނާ ބުނެފައިވެއެވެ.
ނިއުކާސަލް އާ ދެކޮޅަށް ކުޅުނު މެޗު ކުޅެމުންދިޔައިރުވެސް، ޓޮޓްނަމް ސަޕޯޓަރުންދިޔައީ ކޯޗަށް ފާޑުކިޔާ ނުރުހުން ފާޅުކުރަމުންނެވެ. އަދި ހެނދުނުވާއިރު ކޯޗުކަމުން ވަކިކުރާނެކަމަށްބުނެ ދިމާކޮށްފައިވެއެވެ.
ކުރިން ބްރެންފަޑްގައި ރަނގަޅު ނަތީޖާތަކެއް ނެރުނު ފްރޭންކް ޓޮޓްނަމްއަށް ބަދަލުވިއިރު ވާހަކަ ދައްކަމުން ބުނެފައިވާ ގޮތުގައި އޭނާ އެންމެފަހުން އުޅުނު ކުލަބުގައި މަސައްކަތްކުރަނިކޮށް ޓޮޓްނަމްއިން 5 ކޯޗުން ބަދަލުކުރިކަމަށާއި، އޭނާ މީގެ ކުރިން އެއްވެސް ކުލަބަކުން ނަތީޖާ ދަށްވެގެން ވަކި ކޮށްފައި ނެތުން އެއީ ޓޮޓްނަމްގެ ކޯޗުގެ މަގާމު ޗެލެންޖެއްގެ ގޮތުގައި ނަގަން ނިންމި ސަބަބުކަމަށެވެ.
ލީގުގައި ޓޮޓްނަމްއަށް އެދެވޭ ނަތީޖާއެއް ނުނެރެވުނަސް، ޗެމްޕިއަންސްލީގުގައި އެޓީމު އޮތީ ރަނގަޅު ފޯމެއްގައެވެ. ލީގުބުރުގައި ހަތަރުވަނައިގައި އޮވެ، ގަދަ ސޯޅައަށް އޮޓޮމެޓިކުން ދިޔަ ޓީމުތަކުގެ ތެރޭގައި އެޓީމު ހިމެނެއެވެ.