އުރީދޫ ރާއްޖެއިން ކުރިއަށް ގެންދާ އެ ކުންފުނީގެ 20 ވަނަ އަހަރީ ދުވަހުގެ ހާއްސަ ކެމްޕެއިންގެ ދަށުން، 15 ވަނަ އުމްރާ ދަތުރު ލިބޭ ނަސީބުވެރިޔަކަށް ބ. ކެންދޫ، އަލީ ރިޒާ ހޮވިއްޖެއެވެ. މިކަން އިއުލާންކޮށްފައިވަނީ އުރީދޫއިން ބޭއްވި ހާއްސަ ހަރަކާތެއްގައެވެ. އަލީ ރިޒާއަށް ލިބުނު މި އުމްރާ ދަތުރުގެ އިނާމާ، އޭނާގެ ފަރާތުން ހަވާލުވެފައިވަނީ ރައީން ކިޔާ ފަރާތެކެވެ.
މި ކެމްޕެއިނަކީ އުރީދޫގެ 20 އަހަރުގެ ކާމިޔާބީ ފާހަގަކުރުމުގެ ގޮތުން، ކަސްޓަމަރުންނަށް ހާއްސަކޮށްގެން ކުރިއަށް ގެންދާ ބޮޑު ޕްރޮމޯޝަނެކެވެ. މި ހަރަކާތުގެ ދަށުން ޖުމްލަ 19 ނަސީބުވެރިޔަކަށް އުމްރާ ދަތުރެއް ދިނުމަށް ވަނީ ހަމަޖެހިފައެވެ. އަދި މި ކެމްޕެއިންގެ އެންމެ ބޮޑު އިނާމެއްގެ ގޮތުގައި، 20 ވަނަ ނަސީބުވެރިޔާއަށް ދެ މީހަކަށް ހައްޖު ދަތުރެއް ލިބިގެންދާނެ ކަމަށް އުރީދޫއިން މައުލޫމާތު ދެއެވެ.
މި ލަކީޑްރޯގައި ބައިވެރިވުމުގެ ފުރުސަތު ޕޯސްޓްޕެއިޑް، ޕްރީޕެއިޑް އަދި ސުޕަނެޓް ކަސްޓަމަރުންނަށް ވެސް ވަނީ ހުޅުވާލާފައެވެ. އުރީދޫގެ ކަސްޓަމަރެއް ނަމަ، 30 ދުވަހުގެ ތެރޭގައި 250 ރުފިޔާއަށްވުރެ މަތިން ބިލް ދައްކައިގެން، ރީޗާޖުކޮށްގެން ނުވަތަ އެޑް-އޮންއެއް ނަގައިގެން މި ފުރުސަތު ހޯދޭނެއެވެ. އަދި އަލަށް ގުޅޭ ކަސްޓަމަރުންނަށް، ހިދުމަތް ބޭނުންކުރުމަށް 400 ރުފިޔާއިން މަތިން ހަރަދުކުރުމުން ލަކީޑްރޯގައި ބައިވެރިވެވޭނެއެވެ.
ފާއިތުވި 20 އަހަރުގެ ތެރޭގައި އުރީދޫއިން ވަނީ ރާއްޖޭގެ މުވާސަލާތީ އަދި ޓެކްނޮލޮޖީގެ ދާއިރާއަށް ބޮޑެތި ކުރިއެރުންތަކެއް ގެނެސްދީފައެވެ. ކުންފުނިން ބުނި ގޮތުގައި މި ކެމްޕެއިނަކީ ކަސްޓަމަރުންގެ ފަރާތުން ލިބޭ އެއްބާރުލުމާއި، ހިދުމަތް ދިނުމުގައި މަސައްކަތްކުރާ މުވައްޒަފުންގެ އަގު ވަޒަންކުރުމުގެ ގޮތުން ކުރިއަށް ގެންދާ ހަރަކާތެކެވެ.