ގޯލްޑެން ފުޓްސަލް އެސޯސިއޭޝަންއިން އިންތިޒާމްކޮށްގެން މިހާރު ކުރިޔަށްދާ ހިއުންޑައި ގޯލްޑެން ފުޓްސަލް ޗެލެންޖްގެ ފުރަތަމަ ސެމީފައިނަލުގައި ޕެނަލްޓީ ޖަހައިގެން ބ.އޭދަފުށި ބަލިކޮށް ހދ. ނައިވާދޫ ފައިނަލަށް ދަތުރުކޮށްފިއެވެ.
މިރޭ ކުޅުނު މި މެޗުގެ ފުރަތަމަ ލީޑު ނެގީ ނައިވާދޫއިންނެވެ. މިލަނޑު ކާމިޔާބު ކޮށްދިނީ ގައުމީ ފުޓްސަލް ޓީމުގެވެސް އެންމެ މުހިންމު އެއްކުޅުންތެރިޔާ އަބްދުﷲ ޝާފިއު (ޝާއްޕެ)އެވެ. މިލަނޑަކީ އަރިމަތިން ކުޅުނު ބޯޅައެއް އައްމަޑޭ ޔާމިންއަށް ދިނުމުން ޝާއްޕެއަށް ބައިންދާލުމުން ގޯލުގެ މަތީކަނަށް ފޮނުވާލި ބާރު ހަމަލާއެކެވެ. މި ލަނޑާއެކު މެޗުގެ ފުރަތަމަ ހާފު ނިމެންދަނިކޮށް އޭދަފުށިން ނަތީޖާ ހަމަހަމަކުރީ ނައިވާދޫ ޓީމުން ހަމަލާއެއް އުފައްދަން ކުރި މަސައްކަތެއް ހުއްޓުވައި، އޭދަފުށީ ޓީމުގެ ސައްޓު ބޯޅަ ހޯދައި ތަނަވަސްކޮށްދިން ފުރުޞަތެއްގައި މުޙައްމަދު ފާސިރު (ފާއްޓޭ) ޖެހި ލަނޑުންނެވެ.
ފުރިހަމަ ވަގުތު ހަމަވިއިރު ނަތީޖާއަކީ 1-1 ނަމަވެސް ދެޓީމަށްވެސް ރަނގަޅު ފުރުސަތުތަކެއް ލިބުނެވެ. މުޅި މެޗުގައިވެސް ފެނިގެންދިޔައީ ނައިވާދޫ ޓީމުގެ އަވަސް އަދި ރޭވުންތެރި ކުޅުމެވެ. އެއާ ޚިލާފަށް އަނިޔާގެ މައްސަލަތަކާ ކުރިމަތިވެފައިވާ އޭދަފުށި ޓީމުން ފަހު ހާފުގެ ވަރަށް ކުރީކޮޅު ޕެނަލްޓީއަށް ދިޔުމަށް މަސައްކަތްކުރިތަން ފެނުނެވެ. ހަމަލާތައް ހުއްޓުވުމަށް ދެޓީމުން ކުރި މަސައްކަތުން މެޗުގެ ފުރިހަމަ ވަގުތު ހަމަވިއިރު ދެޓީމުންވެސް އޮތީ ފަސް ފައުލް ހަމަވެފައެވެ. ޕެނަލްޓީ ޖަހައިގެން ނައިވާދޫ ކުރި ހޯދީ 5-4 ގެ ނަތީޖާއިންނެވެ. މެޗުގެ މޮޅު ކުޅުންތެރިޔާގެ މަގާމު ހޯދީ ނައިވާދޫ ޓީމުގެ ކެޕްޓަން ޖާޒީ ނަމްބަރ 10 ޔާމީން މުޙައްމަދު (ޔާންޓޭ)އެވެ.
މިއީ ނައިވާދޫ މިމުބާރާތުގެ ފައިނަލަށް ޖެހިޖެހިގެން ދަތުރުކުރި ދެވަނަ ފަހަރެވެ. މިދިޔަ އަހަރު އެޓީމު ފައިނަލުގައި ވާދަކުރީ ކ.ކާށިދޫއާއެވެ.