ހިއުންޑައި ގޯލްޑެން ފުޓްސަލް ޗެލެންޖް ގެ ސެމީފައިނަލް ދެވަނަ މެޗުގައި ވިލިމާލެއާއި ގއ. ދެއްވަދޫ ބައްދަލުކުރި މެޗު 4-3 އިން ކާމިޔާބުކޮށް ދެއްވަދޫ މުބާރާތުގެ ފައިނަލަށް ފުރަތަމަ ފަހަރަށް ދަތުރުކޮށްފިއެވެ.
މެޗުގެ ފުރަތަމަ ހާފު ނިމުނީ 2-1 އިން ދެއްވަދޫ ކުރީގައި އޮވެގެންނެވެ. ދެއްވަދޫއިން ޖެހި ދެލަނޑަކީވެސް ކޯނަރުން އުފެއްދި ދެ ހަމަލާއިން ޖެހި ލަނޑުތަކެކެވެ. ފުރަތަމަ ލަނޑަކީ އެޓީމުގެ ތަޖުރިބާ ކާރު ކުޅުންތެރިޔާ އަލީ ހައިޝަމް ކޯނަރު ނަގައިދިނުމަށްފަހު ހުސްތަނަށް ދުވެފައި ގޮސް ޖެހި ބާރު ހަމަލާއަކުން ޖެހި ލަނޑެކެވެ. ދެވަނަ ލަނޑަކީ ހައިޝަމް ނަގައިދިން ކޯނަރަކުން އެޓީމުގެ ހުޒައިފަތުﷲ (ހުޒޭ) ޖެހި ލަނޑެކެވެ. ވިލިމާލެއިން ޖެހި ލަނޑަކީ، ވިލިމާލޭ ޓީމުގެ އިސްމާއިލް ވިފާގު އެނބުރިލާފައި ގޯލަށް ޖަހަން އުޅުމުގެ ތެރޭގައި ޕެނަލްޓީ އޭރިއާ ލައިން މަތިން ކަހަލަ ގޮތަކަށް ދެއްވަދޫ ޓީމުގެ އަލީ ހައިޝަމް (ޗުމްޕު) ކުރި ފައުލަކަށް ލިބުނު ހިލޭޖެހުމަކުން އަލީ ޝިޔާހު (ޝިޔަޅޭ) ޖެހި ލަނޑެކެވެ. އޭނާ ފޮނުވާލި ބާރު ހަމަލާ އަމާޒުވީ ގޯލުގެ ކަނާތު މަތީ ކަނަށެވެ.
ދެއްވަދޫ ޓީމުގެ ތިންވަނަ ލަނޑަކީ މެޗުގެ ދެވަނަ ހާފު ފެށިގެން މާގިނައިރު ތަކެއްނުވެ ލިބުނު ހިލޭ ޖެހުމަކުން ތަނަވަސްކުރި ފުރުޞަތެއްގައި އިމްރާން (އިންމި) ޖެހި ލަނޑެކެވެ. އެޓީމުގެ ހުޒޭ ދަނޑުގެ މެދު ރޮނގާ ހިސާބުން ބޯޅަ ހިފައިގެން ގޮސް ހަމަލާއެއް އުފައްދަން މަސައްކަތް ކުރަނިކޮށް ޕެނަލްޓީ އޭރިއާ ބޭރުން ކަހަލަ ގޮތަކަށް ފައުލު ކުރުމުން ލިބުނު މި ހިލޭ ޖެހުން އަލީ ހައިޝަމް މަޑުމަޑުން ޖައްސާލީ އަރިމަތިން ހުސްކޮން ހުރި އިންމިއަށެވެ. އިންމި ވަރަށް ހަމަޖެހިލާފައި ހުސްކޮށް އޮތް ގޯލުތެރެއަށް ފޮނުވާލައިގެން އެޓީމުގެ ލީޑު ފުޅާކުރިއެވެ. މިލަނޑާއެކު ވިލިމާލެއިން ކުޅުން ރަނގަޅުކުރިއެވެ. ނަތީޖާއަކަށް ވެގެން ދިޔައީ އިސްމާއިލް ވިފާގް (އިއްސެ) ބޯޅަ ހިފައިގެން އަރިމަތިން ދުވެފައި ގޮސް އަނެއް އަރިމަތިން ހުސްކޮން އަރާހުރި ސަމީހުއަށް ޖައްސާލުމުން ތިރިން ގޯލުގެ ދުރުކަނަށް ބޯޅަ ފޮނުވާލައިގެން ޖެހި ލަނޑެކެވެ.
ދެވަނަ ހާފުގެ ފަހު ދިހަ މިނެޓަށް ވީއިރު ދެޓީމަށްވެސް ފަސް ފައުލް ހަމަވެފައިވުމުން ކުޅެމުންދިޔައީ ފައުލްތަކަށް ވިސްނައިގެންނެވެ. ދެއްވަދޫ ޕެނަލްޓީ އޭރިއާ ބޭރުން ކުރި ފައުލްއަކަށް ލިބުނު ދުރު ޕެނަލްޓީ ވިލިމާލޭ ޓީމުގެ ސަމީހް ފޮނުވާލުމުން ކީޕަރުވަނީ ދިފާއުކޮށްފައެވެ. އޭގެ މާގިނަ އިރުތަކެއްނުވެ އިންމިއަށް އަލީ ޝިޔާހް ކުރި ފައުލަކަށް ދެއްވަދޫއަށް ލިބުނު ދުރު ޕެނަލްޓީ އެޓީމުގެ ވިޝާހް އަބްދުލްމަޖީދު (ވިއްޓު) ގޯލަށް ވައްދާލައިގެން ދެއްވަދޫގެ ލީޑު ފުޅާކުރިއެވެ. އަދި މެޗު ނިމެން 2 މިނެޓަށް ވެފައިވަނިކޮށް ވިލިމާލެއަށް ލިބުނު ދުރު ޕެނަލްޓީ އަލީ ޝިޔާހް ގޯލަށް ވައްދާލައިގެން ތަފާތު ކުޑަކުރިއެވެ. މެޗު ނިމިނިމި އޮއްވާ ދެއްވަދޫގެ ހުޒޭ ފޮނުވާލި ބޯޅަ ގޯލު ތެރެއަށް ވަތްނަމަވެސް، އޭރު އޮތީ ރެފްރީ ކަށިގަނޑު ފުމެލާފައެވެ.
މި ނަތީޖާއާއެކު ގޯލްޑެން ފުޓްސަލް ޗެލެންޖް މިއަހަރުގެ ފައިނަލުގައި ވާދަކުރާނީ ހދ. ނައިވާދޫ އާއި ގއ. ދެއްވަދޫއެވެ.