މިންހަމަ ކެއުމެއް ކެއުމަކީ ހަށިގަނޑުގެ ދިފާޢި ނިޒާމް ވަރުގަދަކޮށް، ހަށިގަނޑުގެ ހުރިހާ ގުނަވަންތަކުގެ މަސައްކަތްތައް ގަވާއިދަކުން ހިނގުމަށް އެހީތެރިވާ ކަމެކެވެ. ނަމަވެސް ދުވަހުގެ މަސައްކަތް ތާވަލު ކުރެވިފައި އޮންނަ ގޮތާއި، އެކަން ނިމިގެން ދާގޮތުން ކެއުމަށް ދޭންވާ އެންމެ ފުރިހަމަ ސަމާލުކަން އޮންނަނީ ނުދެވިފައެވެ. އަދި މިހެން ބުރަކޮށް ދުވަސް ދަނިކޮށް ހިނގާ ކޮންމެވެސް ކަމެއްގެ ސަބަބުން މީހާ މާޔޫސްވެސް ދެރަވާ ގޮތް ވެސް ވެދާނެއެވެ. މާބޮޑަށް ވަރުބަލިވެ ދިރިއުޅުން މަތިން ފޫހިވާ ފަހަރުވެސް އައިސްފާނެއެވެ. ނަމަވެސް ބައެއް ކާއެއްޗެއްސަކީ އެ ކެއުމުން މީހާގެ ނަފުސަށް އުފާވެރިކަން ގެނައުމަށް އެހީވާ މާއްދާތައް ހިމެނޭ ތަކެއްޗެވެ. އެހެންކަމުން މީގެ ލިސްޓެއް ހިމަނާލާނަމެވެ. އަޅެ އަޖުމަ ބަލާލަމާ ބަހީއެވެ.

ޗޮކްލެޓް

ޗޮކްލެޓޭ ބުނުމުން ނުވަތަ ޗޮކްލެޓް ހިތަށް ގެނައުމުންވެސް ވަރަށް ގިނަ މީހުންގެ ހިތަށް އުފާވެރިކަން ގެނެސްދޭނެއެވެ. ނަމަވެސް ޗޮކްލެޓް ކައިގެން ވާނީ ފަލައޭ ހިތަށް އަރާފައި މި ވިސްނުން ދޫކޮށްލާ މީހުން ގިނައެވެ. މިއީ މުޅިން ރަގަޅު ވިސްނުމެއް ނޫނެވެ. ޗޮކްލެޓްގައި މެގްނީޒިއަމް އާއި އެހެންވެސް ވަރަށް ގިނަ އެންޓިއޮކްސިޑެންޓް ހިމެނެއެވެ. މެގްނީޒިއަމްގެ ސަބަބުން ލޭނާރުތައް ހަމަޖައްސާލާ ލޭގެ ޕްރެޝަރު ދަށްކޮށްލުމާއި އެކު ލޭހިނގުން ރަގަޅުކޮށްދެއެވެ. 70 އިންސައްތަ ކޮކޯ ހިމެނޭ ޗޮކްލެޓެއް ކައިގެން ހާސްކަމާއި ޑިޕްރެޝަން ދުރުކޮށް ހަށިގަނޑުގައިވާ ލޮޑުކަން ފިލުވާލުމަށް އެހީތެރިކަން ލިބޭނެއެވެ. ހަފްތާއަކު 3 ދުވަހު ޗޮކްލެޓެއް ކާލުމަކުން ގޯހެއް ނެތެވެ.

ކޮފީ

އެންމެ ކޮފީ ތައްޓެއް ބޯލުމުން ވެސް މުޅި ހަށިގަނޑުތާޒާވެ، ކަންކަމުގައި ފުރިހަމައަށް ގޮތް ނިންމަން ފަސޭހަވެ މޫނުމަތިންވެސް އުފާވެރިކޮށް ފެންނާނެއެވެ. ކޮފީއަކީ އޭގައި ގިނަ އަދަދަކަށް ޑޮޕަމިން އަދި ސެރޮޓޮނިން ހިމެނޭ އެއްޗެކެވެ. މި ދެ މާއްދާގެ ސަބަބުން ހަށިގަނޑުގައި ހުންނަ އުފާވެރި ނޫން އިޙްސާސްތައް މަދުކޮށްލައެވެ. މިއީ ދުވަހުގެ ފެށުމަށް ރަގަޅު ބުއިމެކެވެ. ހަށިގަނޑުގެ ބައްޓަމަށް ސަމާލުވާން ބޭނުންވާ ފަރާތްތަކުން ހަކުރު ނާޅާ ކަޅު ކޮފީވެސް ބޯން ވީއެވެ. ކޮފީގެ ފައިދާ ހުންނާނީ އެއްވަރަށެވެ.

ބިސް

ބިހަކީ ވަރަށް ގިނަ ގޮތްގޮތަށް ހަދައިގެން ކެވޭ އެއްޗެކެވެ. ބިހަކީ ހަށިގަނޑުގެ މަސްތައް އުފައްދަން ބޭނުންވާ ޕްރޮޓީން ލިއްބައިދިނުމުގައި ވަރަށް މުހިންމު އެއްޗެކެވެ. ހަމަ އެފަދައިން ދިފާޢީ ނިޒާމް ވަރުގަދަކޮށްދޭ ވިޓަމިން-ޑީ ހިމެނޭ ބިހަކީ އޭގެ ސަބަބުން އާންމު އަރިދަފުސް ރޯގާއިން ސަލާމަތްވުމަށް ވަރަށް މުހިންމު ދައުރެއް އަދާ ކުރާ އެއްޗެކެވެ. މީގެ އިތުރުން ވިޓަމިން-ޑި އަކީ ބަރުދަން ލުއިކޮށް ދިނުމާއި އެކު މާޔޫސްވާ ފަދަ ވިސްނުންތަކުން ދުރުކޮށްދޭ ކާނާއެކެވެ.

އެވަކާޑޯ

އެވަކާޑޯއަކީ މީހާގެ މޫޑް ބަދަލުކޮށްލުމުގައި އެންމެ މުހިންމު ދައުރެއް އަދާ ކުރާ ހޯމޯން ކަމަށްވާ ސެރޮޓޮނިން ގިނަ އަދަދަކަށް ހިމެނޭ މޭވާއެކެވެ. އެވަކާޑޯގެ ސަބަބުން ހަށިގަނޑުގެ ލޮޑުކަން އަވަހަށް ފިލުވާލުމުގެ އިތުރުން ހަންގަނޑަށް ދިހުން ގެނެސްދީ ހަޖަމްކުރުމުގެ ނިޒާމް ހަމައަކަށް އަޅުވާދޭނެއެވެ. މިއަށް ވުރެ މީހާގެ މިޖާޒަށް އުފާވެރިކަން ގެންނާނެ އެހެން ކަމެއް ކޮބައިތޯއެވެ؟

ދޮންކެޔޮ

ޕޮޓޭސިއަމް އިން މުއްސަނދިވެފައިވާ، ހަކަތަ ލިއްބައިދިނުމުގައި އެންމެ މަޤްބޫލު އެއް މޭވާ ކަމަށްވާ ދޮންކޭލަކީ ސްމޫތީ ފަދަ ބުއިންތަކަށް އެންމެ ފުރަތަމަ އިޚްތިޔާރު ކުރެވޭ މޭވާ ވެސް މެއެވެ. ޕޮޓޭސިއަމް ހިތުގެ ވިންދު ލަސްކޮށް، ސްޓްރޯކް ޖެހުމުން ދުރުކޮށް ހުޅުހުޅުގައި ރިއްސުމުގެ ބައްޔަށް ލުއި ލިބިދިނުމުގައި ބޮޑު ދައުރެއް އަދާކުރެއެވެ. އަދި ދޮން ކޭލަކީ ޑިޕްރެޝަން ދަށްކޮށްދިނުމަށް އެހީތެރިވެދޭ މޭވާއެކެވެ. ދުވަސް ފެށުމުގެ ގޮތުން ދޮންކެޔޮވަކެއް ކާލައިގެން ތަފާތު ބަލާލާށެވެ.