އިނގިރޭސި ޕްރިމިއަރ ލީގުގައި ރޭ ފުލަމް ކައިރިން ފަސޭހަކަމާއެކު މެންޗެސްޓަރ ޔުނައިޓެޑް މޮޅުވެއްޖެއެވެ.
ސިޓީގެ އަމިއްލަ ދަނޑުގައި ކުޅެވުނު މިމެޗު އެޓީމުން ކާމިޔާބު ކުރީ 3-0 ގެ ނަތީޖާއަކުންނެވެ. މުޅި މެޗުގައިވެސް ބޯޅަ ހިފަހައްޓައިގެން ގިނަ ވަގުތުކުޅުނު ސިޓީން މެޗުގެ ލީޑު ނެގީ 24 ވަނަ މިނެޓުގައި އެޓީމަށް ދާދިފަހުން ބަދަލުވި އެންޓޮނީ ސެމެންޔޯ ޖެހި ލަނޑުންނެވެ. އޭގެ މާގިނައިރުތަކެއްނުވެ ސެމެންޔޯ ފަހިކޮށްދިން ފުރުޞަތެއްގައި ލީޑު ފުޅާކޮށްދިނީ ނިކޯ އޮރެއިލީއެވެ. ފުރަތަމަ ހާފު ނިމުމުގެ ކުރިން ފިލް ފޮޑެން ދިން ބޯޅައަކުން ހާލަންޑް ލަނޑުޖަހައި މުޅި މެޗުގެ ނަތީޖާ ސިޓީކޮޅަށް އަނބުރާލަދިނެވެ. މެޗުގައި ފުލަމްއަށްވެސް ލަނޑު ޖަހާނެ ފުރުސަތު ލިބުނު ނަމަވެސް ހުރަހަކަށް ވެގެންދިޔައީ ޑޮންނަރުމާއެވެ.
މި ނަތީޖާއާއެކު ސިޓީންވަނީ ޓޭބަލުގެ އެއްވަނާގައި އޮތް އާސެނަލްއާ ތިން ޕޮއިންޓާ ގާތަށް ޖެހިލާފައެވެ. ނަމަވެސް އެއީ އިތުރަށް އެއް މެޗު ކުޅެގެންނެވެ. އާސެނަލް މިރޭ ބްރެންފަޑާ ދެކޮޅަށް ކުޅޭ މެޗުން ނުކުންނަ ނަތީޖާއަކުން ސިޓީއިން ލީގު ހޯދުމަށް ކުރާ މަސައްކަތަށް އަސަރުތަކެއް ކުރާނެއެވެ.
ރޭ ކުޅެވުނު އެހެން މެޗުތަކަށް ބަލާއިރު، ބްރައިޓަން އަތުން އެޝްޓަންވިލާ 1-0 އިން މޮޅުވިއިރު، ކްރިސްޓަލް ޕެލަސްވަނީ ބާންލީއަތުން 3-2 އިން މޮޅުވެފައެވެ. އަދި ލިވަޕޫލުވަނީ ސަންޑަލޭންޑްގެ މައްޗަށް 1-0 އިން ކުރި ހޯދާފައެވެ. ނޮޓިންގހަމް ފޮރެސްޓާ ވުލްވްސް ބައްދަލުކުރި މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރު ވެގެންނެވެ.