ލިވަޕޫލާއި ސަންޑަލޭންޑް ބައްދަލުކުރި މެޗު 1-0 އިން ލިވަޕޫލް ކާމިޔާބުކޮށް، މި ސީޒަނުގައި އަމިއްލަ ދަނޑުގައި މެޗަކުން ބަލިނުވެ ސަންޑަލޭންޑުން ދަމަހައްޓަމުން އައި ރެކޯޑަށް ނިމުން ގެނެސްފިއެވެ.
ލިވަޕޫލުން ޖެހި ހަމައެކަނި ލަނޑު އެޓީމުގެ ޑިފެންޑަރ ވެންޑައިކް ޖެހީ 61 ވަނަ މިނެޓުގައި ސަލާހް ނަގައިދިން ކޯނަރަކުންނެވެ. ވެންޑައިކް ބޮލުން ފޮނުވާލި ބޯޅަ ގޯލަށްވަނީ ސަންޑަލޭންޑްގެ ޑިފެންޑަރުގެ ބޮލުގައި ޖެހިފައެވެ. ސަންޑަލޭންޑަށްވެސް ނަތީޖާ ބަދަލުކޮށްލުމަށް ރަނުގެ ފުރުސަތުތަކެއް ލިބި ބޭނުން ހިފޭގޮތެއްނުވިއެވެ.
ލިވަޕޫލް ފަހަކަށް އައިސް ނެރެމުންދާ ދަށް ނަތީޖާތަކަށް ބަލާ، މި މެޗުގެ ކުރިން ގިނަ ބަޔަކު އުއްމީދުކޮށްގެން ތިބީ ސަންޑަލޭންޑުން ލިވަޕޫލް ބަލިކުރާނެކަމަށް ވިސްނައިގެންނެވެ. ނަމަވެސް، މިމޮޅާއެކު ލިވަޕޫލުންވަނީ ގަދަ ހަތަރަކަށް އެރުމަށް ކުރަމުން އަންނަ މަސައްކަތަށް އިތުރު ކުރި އެރުން ހޯދާފައެވެ. ކުޅުނު 26 މެޗުން ލިބުނު 42 ޕޮއިންޓާއެކު އެޓީމު މިވަގުތު އޮތީ ތާވަލުގެ ހަވަނާގައެވެ.