ސްޕެއިންގެ އެންމެ ދުވަސްވީ ފުޓްބޯޅަ މުބާރާތް، ސްޕެނިޝްކަޕް ނުވަތަ ކޮޕަޑެލްރޭގެ ސެމީފައިނަލުގެ ފުރަތަމަ ލެގު ރެއާލް ސޮސިއެޑާޑް ކާމިޔާބު ކޮށްފިއެވެ.
ސެމީފައިނަލުގައި ރެއާލް ސޮސިއެޑާޑް އެތުލެޓިކް ކުލަބު ކައިރިން މޮޅުވީ 1-0 ގެ ނަތީޖާއިންނެވެ. މެޗުގެ ހަމައެކަނި ލަނޑު 62 ވަނަ މިނެޓުގައި އެޓީމަށް ކާމިޔާބު ކޮށްދިނީ ގޮންސާލޯ ގޭޑިސް ތަނަވަސްކޮށްދިން ފުރުސަތެއްގައި ޓްރިއެންޓެސްއެވެ. މިމެޗުގައި ދެޓީމަށްވެސް ލަނޑުޖަހާނެ ރަނގަޅު ފުރުސަތުތަކެއް ލިބި ބޭކާރުވެގެންދިޔައެވެ. އެގޮތުން އެތުލެޓިކް ކުލަބަށް ހުސްކޮށް ލިބުނު ފުރުޞަތެއްގައި ފޮނުވާލި ބޯޅަ އަމާޒުވީ ގޯލުގެ އަރިމަތީ ދަނޑިއަށެވެ. ސޮސިއެޑާޑްގެ ގޭޑިސް ދެފަހަރެއްގެ މަތިން ނުރައްކާތެރި ހަމަލާތަކެއް އުފެއްދިއެވެ. އަރިމަތިން ބޯޅަ ހިފައިގެން ޕެނަލްޓީ އޭރިއާ ތެރެއަށް ވަދެގަތް ވަގުތު ޑިފެންޑަރުގެ ފައިގައި އަޅައިގަނެފައި ވެއްޓުމުން އެއީ ޑައިވްއެއްކަމަށް ނިންމާ އޭނާއަށް ރީނދޫ ކާޑު ދެއްކިއެވެ. އޭގެފަހުން ލިބުނު ފުރުޞަތެއްގައި ކީޕަރު ކައިރިން ނައްޓާލަން ހިއްލާލި ބޯޅަ ގޯލުގެ ތެރެއަށް ފޮނުވާލީ ޓްރިއެންޓެސްއެވެ.
ސެމީ ފައިނަލުގެ ދެވަނަ ލެގު ކުޅެވޭނީ 5 މާރިޗު ގައި ސޮސިއެޑާޑްގެ އަމިއްލަ ސްޓޭޑިއަމްގައެވެ.
ކޮޕަޑެލްރޭގެ ދެވަނަ ސެމީގައި މިރޭ ބާސެލޯނާ ނުކުންނާނީ އެޓްލެޓިކޯ މެޑްރިޑާ ދެކޮޅަށެވެ.