އަންނަ އަހަރު އޮންނަ ނޭޝަންސްލީގުގައި އެއް ގުރޫޕަކަށް އިންގްލެންޑް، ސްޕެއިން، ކްރޮއޭޝިއާ އަދި ޗެކް ރިޕަބްލިކް ލައްވާލައިފިއެވެ.
ބުރާސްފަތި ދުވަހު ބެލްޖިއަމްގައި ކުރިޔަށްދިޔަ ގުރުލުމުގައި އެންމެ ގިނަ ބައެއްގެ ސަމާލުކަން ލިބުނީ ނޭޝަންސްލީގު އެއް ގުރޫޕަކަށް އިންގްލެންޑް، ސްޕެއިން، ކްރޮއޭޝިއާ އަދި ޗެކް ރިޕަބްލިކް ލައްވާލުމުންނެވެ. އެ ހަތަރު ޓީމު ލައްވާލާފައިވަނީ ލީގު އޭގެ ގުރޫޕް ތިނަކަށެވެ. ގުރޫޕް 1 ގައި ވާދަކުރަން ޖެހެނީ ފްރާންސް، އިޓަލީ، ބެލްޖިއަމް އަދި ތުރުކީއެވެ. ގުރޫޕް 2 ގައި ޖަރމަން، ނެދަލެންޑް، ސާބިއާ އަދި ގްރީސް ހިމެނުނުއިރު ގުރޫޕް 4 ގައި ވާދަކުރަން ޖެހެނީ ޕޯޗުގަލް، ޑެންމާކް، ނޯވޭ އަދި ވޭލްސްއެވެ.
ޔޫރަޕް ގައުމުތަކުގެ މެދުގައި ލީގު އުސޫލުން ކުޅޭ މި މުބާރާތް ކުރިޔަށްދާނީ 2026 ގެ ސެޕްޓެމްބަރ މަހުން ފެށިގެން 2027 ވަނަ އަހަރުގެ ޖޫންމަހުގެ ނިޔަލަށެވެ.
ޖުމްލަ ހަތަރު ލީގަކަށް ޓީމުތައް ބަހާލެވިގެން ކުޅެވޭއިރު، ކޮންމެ ލީގެއްގައިވެސް ގުރޫޕް ސްޓޭޖުގައި ކޮންމެ ޓީމެއް ކޮންމެ ޓީމަކާ ހޯމް އެންޑް އަވޭ އުސޫލުން ކުޅޭނެއެވެ. އެގޮތުން ލީގު އޭގެ ކޮންމެ ގުރޫޕަކުންވެސް އެއްވަނަ އަދި ދެވަނަ ހޯދާ ޓީމުތައް ކުއާޓާ ފައިނަލަށް ދަތުރުކުރާއިރު، ލީގު ބީ،ސީ އަދި ޑީ ގެ ގުރޫޕްތަކުގެ އެއްވަނަ ޓީމު ޖެހިގެން އޮންނަ ލީގަށް ޕްރޮމޯޓް ވެގެންދާނެއެވެ. އަދި ލީގު އޭ، ބީ، އަދި ސީ ގެ ގުރޫޕް ސްޓޭޖުގައި އެންމެ ފުލަށްދާ ޓީމުތައް އެއް ލީގު ފަހަތަށް ރެލިގޭޓު ވެގެންދާނެއެވެ.
މިއީ ނޭޝަންސްލީގުގެ ފަސްވަނަ މުބާރާތެވެ. އެންމެ ފަހު މުބާރާތުގެ ޗެމްޕިއަންކަން ޕޯޗުގަލް ހޯދީ ފައިނަލުގައި ސްޕެއިންއާ ދެކޮޅަށްކުޅެ ޕެނަލްޓީ ޖަހައިގެންނެވެ.