މެންޗެސްޓަރ ސިޓީއާއި ޗެލްސީގެ ކުރީގެ ކުޅުންތެރިޔާ ރަހީމް ސްޓާލިން ސީޒަންގެ ބާކީބަޔަށް ނެދަރލޭންޑްގެ ފައިނޫޑަށް ބަދަލުވެއްޖެއެވެ.
ސްޓާލިންގ ފައިނޫޑަށް ބަދަލުވެފައިވަނީ މި ސީޒަންގެ ނިޔަލަށެވެ. ޗެލްސީއާ ސްޓާލިންގެ ދެމެދުގައި ވެވުނު އެއްބަސްވުމުގެ ދަށުން ކޮންޓްރެކްޓުގައި ބާކީ 18 މަސްދުވަސް އޮއްވާ ކޮންޓްރެކްޓް އުވާލީ މި ޖެނުއަރީމަހުއެވެ. އޭގެ ފަހުން އެކި ކުލަބުތަކަށް ބަދަލުވުމަށް ސްޓާލިން މަސައްކަތްކުރިއެވެ. އުމުރުން 31 އަހަރުގެ ސްޓާލިން، މެންޗެސްޓަރ ޔުނައިޓެޑާއި އާސެނަލްގެ ކުރީގެ ކުޅުންތެރިޔާ ރޮބިން ވެންޕާސީގެ ކޯޗުގަމުގެ ދަށުން ކުޅެމުން އަންނަ ފައިނޫޑަށް ބަދަލުވުމަށްފަހު ބުނީ، ފްރީ އެޖެންޓަކަށް ވުމަށްފަހު ވަރަށް ގިނަ ގޮތްގޮތަށް ބެލިކަމަށާއި، ކުލަބެއް ކަނޑައެޅުމުގެ ކުރިން އެކުލަބުގެ ކޯޗާ ކުލަބާމެދު މަޝްވަރާކުރެވި އޭނާގެ ފުށުން އެކުލަބަކަށް ކޮށްދެވިދާނެކަންތަކާއި އެޓީމަކަށް ކުރާނެ ފައިދާތަކުގެ މައްޗަށް ވިސްނަން ޖެހުނުކަމަށެވެ. އަދި ގައުމުން ބޭރުގައި ކުޅެން ޖެހުމަކީ ބޮޑު ގޮންޖެހުމަކަށްވާނެކަމަށާއި، އެހެންނަމަވެސް އޭނާ ދެކޭ ގޮތުގައި ފައިނޫޑަކީ އޭނާ ހިތްހަމަޖެހިގެން ކުޅުމުގެ ފުރުޞަތު އޮންނާނެ ކުލަބެއްކަމަށް ދެކޭކަމަށެވެ. އަދި ގާތްގަނޑަކަށް 18 ކުލަބަކުން އޭނާ ހޯދުމަށް ޝައުގުވެރިކަންފާޅުކުރިކަމަށްވެސް ހާމަކޮށްފައިވެއެވެ.
ސްޓާލިން ކެރިއަރު ފެށީ ކުއީންޕާކް ރޭންޖާސްއިންނެވެ. އަދި 2010 ވަނަ އަހަރު ލިވަޕޫލަށް ބަދަލުވެ 2014 ވަނަ އަހަރު ގޯލްޑެން ބޯއީ އެވޯޑްވެސް ހޯދިއެވެ. އޭނާވަނީ މެންޗެސްޓަރ ސިޓީ، އާސެނަލް އަދި ޗެލްސީއަށްވެސް ކުޅެފައެވެ.