އިނގިރޭސި ޕްރިމިއަރލީގު ތާވަލުގެ އެއްވަނާގައި އޮތް އާސެނަލް ރޭ ބްރެންފާޑާ ދެކޮޅަށް ކުޅުނު މެޗު އެއްވަރުވެއްޖެއެވެ.
ބްރެންފާޑު ދަނޑުގައި ކުޅުނު މިމެޗު ނިމުނީ 1-1 އިން އެއްވަރުވެގެންނެވެ. މެޗުގެ ފުރަތަމަ ލަނޑުޖަހާ ކުރިހޯދީ އާސެނަލުންނެވެ. އެޓީމަށް ދާދިފަހުން ބަދަލުވި ނޯނީ މަޑުއޭކޭ ޖެހި މިލަނޑުގެ ލީޑު އާސެނަލަށް ހިފަހައްޓާލެވުނީ 10 މިނެޓު ވަންދެނެވެ. މެޗުގެ 71 ވަނަ މިނެޓުގައި ބްރެންފާޑުގެ ކީން ލުވި ޕޮޓާ ލަނޑުޖަހައި އާސެނަލް ހުއްޓުވާލިއެވެ.
މި ނަތީޖާއާއެކު ލީގު ހޯދުމަށް އާސެނަލް ކުރަމުން އަންނަ މަސައްކަތަށް އަނެއްކާވެސް މިވަނީ ހިޔަނި އެޅެން ފަށާފައެވެ. ލީގުގެ އެއްވަނާގައި 4 ޕޮއިންޓުގެ ލީޑަކާއެކު އެޓީމު އޮތަސް، ދެވަނާގައި އޮތް ސިޓީން ފަހަކަށް އައިސް ނެރެމުންދާ ނަތީޖާތަކަށް ބަލާއިރު އެއީ މާބޮޑު ލީޑެއްކަމަކަށް ނުފެންނަކަމަށް ކުޅިވަރު ޚަބަރު ދިރާސާ ކުރާ ފަރާތްތަކުން ހާމަކުރެއެވެ.
އަނެއްކޮޅުން ބަލާއިރު، އާސެނަލް ލީގު ހޯދުމާ ގާތަށް ގޮސް އޮއްވާ ލީގު ގެއްލުން މިވަނީ ފަހަކަށް އައިސް އާންމުވެފައެވެ. މިކަހަލަ ހާލަތެއްގައި އާސެނަލްވަނީ ޖެހިޖެހިގެން 3 ސީޒަނެއްގައި ތަށީގައި އަތްލެވޭ ހިސާބުގައި އޮއްވާ ސިޓީން ނަތީޖާތައް ރަނގަޅުކޮށް ތަށި ހޯދާފައެވެ. އެހެންކަމުން އާސެނަލްއަށް މިވަގުތު ގެއްލޭ ކޮންމެ ޕޮއިންޓަކާއެކު ސިޓީން އޭގެ ފައިދާ ނަގާނެއެވެ.
އާސެނަލް ދެން ނުކުންނާނީ ވުލްވްސްއާ ދެކޮޅަށެވެ.