އިސްލާމްދީނުގައި ކައިވެންޏަކީ ހަމައެކަނި ދެމީހަކު ގުޅިގެން އުޅޭ އުޅުމެއް ނޫނެވެ. އެއީ ވަރަށް މުގައްދަސް، ސީރިއަސް އަދި އެހާމެ ޒިންމާދާރު ބިނާކުރުވަނިވި ގުޅުމެކެވެ. ކައިވެންޏަކީ ވަގުތީ އުފަލަކަށް ނުވަތަ ހަމައެކަނި ޖަޒުބާތީ ކަމެއްގެ މައްޗަށް ބިނާވެފައިވާ ކަމެއް ނޫނެވެ. އެއީ ވަފާތެރިކަމާއި، އެކަކު އަނެކަކަށް ރައްކާތެރިކަން ފޯރުކޮށްދިނުމުގެ މަތިވެރި އަހުދެކެވެ. އިސްލާމްދީން ކައިވެންޏަށް ބާރުއަޅަނީ، އޭގެ ސަބަބުން މުޖުތަމައުގައި ހަމަޖެހުން ގާއިމުވެ، ދެމީހުން އެކުގައި ކުރިއަރައިދިއުމަށް އަމާން މާހައުލެއް ބިނާވެގެންދާނެތީއެވެ.
އިސްލާމީ ކައިވެނީގެ އެންމެ ބޮޑު މަގްސަދަކީ ހިތްތަކަށް އަމާންކަމާއި ހަމަޖެހުން ގެނެސްދިނުމެވެ. އެއީ ބިރުވެރިކަމާއި ނަފްސާނީ އަނިޔާގެ ތަނެއް ނޫނެވެ. ކީރިތި ގުރުއާނުގައި މާތްﷲ ވަނީ ކައިވެނީގެ މަގްސަދު ވަރަށް ފުރިހަމައަށް ބަޔާންކޮށްދެއްވާފައެވެ.
وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكުންُوا إِلَيْهَا وَجَعَلَ بَيْنكُمْ مَوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِقَوْمٍ يَتَفَكَّرُونَ
”ތިޔަބައިމީހުންނަށްޓަކައި ހަމަ ތިޔަބައިމީހުންގެ ނަފްސުތަކުން އަނބިން ހެއްދެވިކަމީ، އެކަލާނގެ ކުޅަދުންވަންތަކަމުގެ ހެކިތަކުގެ ތެރެއިންވާ ކަމެކެވެ. އެއީ ތިޔަބައިމީހުން އެކަނބަލުންގެ ފަރާތުން ހަމަހިމޭންކަން ލިބިގަތުމަށްޓަކައެވެ. އަދި އެކަލާނގެ ތިޔަބައިމީހުންގެ މެދުގައި ލޯތްބާއި، އޯގާވެރިކަން ލެއްވިއެވެ. ހަމަކަށަވަރުން، ފިކުރު ހިންގާ ބަޔަކަށް އެކަމުގައި ހެކިތަކެއްވާކަން ކަށަވަރެވެ."
މި އާޔަތުން އެނގޭ ގޮތުގައި، އިސްލާމްދީނުގައި ލޯތްބަކީ ހަމައެކަނި ރޮމޭންޓިކް އިހުސާސްތަކެއް ނޫނެވެ. އެއީ ރަހުމްކުރުމެވެ. ރަހުމްކުރުމަކީ ބައިވެރިޔާ ބަލިކަށިވާ ވަގުތުތަކުގައި އޭނާއަށް އޯގާތެރިވެ، އޭނާގެ ކުށްތަކަށް މާފުކޮށް، ބައިވެރިޔާ ދަށްކޮށްލައި އިހާނެތިކޮށް ނުހިތުމެވެ. އެއީ އަނިޔާލިބޭ ތަނަކަށް ވުމުގެ ބަދަލުގައި، ރައްކާތެރިކަމާއި ހިމާޔަތް ލިބޭ އަމާން މަންޒިލަކަށް ވުމެވެ.
ކީރިތި ގުރުއާނުގައި ދެމަފިރިންގެ ގުޅުން ސިފަކުރައްވާފައިވަނީ ވަރަށް ފުން މާނައެއްގައެވެ. ސޫރަތުލް ބަގަރާގެ 187 ވަނަ އާޔަތުގައި ދެމަފިރިން ސިފަކުރައްވާފައިވަނީ އެކަކު އަނެކަކުގެ ފޭރާމުގެ ގޮތުގައެވެ. ފޭރާމަކީ އިންސާނާގެ ހަށިގަނޑު ނިވާކޮށްދީ، ހޫނާއި ފިންޏާއި އެކި ކަހަލަ ގެއްލުންތަކުން އޭނާ ރައްކާތެރިކޮށްދޭ އެއްޗެކެވެ. ހަމައެފަދައިން، ދެމަފިރިންނަކީ އެކަކު އަނެކަކުގެ އަބުރާއި އިއްޒަތް ރައްކާތެރިކޮށްދޭ ބަޔަކަށް ވާންޖެހެއެވެ. ކައިވެނީގެ ތެރޭގައި ހުންނަ އަމިއްލަ ސިއްރުތައް ބޭރު ނުކުރުމާއި، ބައިވެރިޔާ ބަދުނާމު ކުރުމުގެ ބަދަލުގައި އޭނާގެ އުނިސިފަތައް ފޮރުވައިދީ، އިޖުތިމާއީ ގޮތުންނާއި ނަފްސާނީ ގޮތުން އޭނާއަށް އައްޑަނައަކަށް ވުމަކީ ކައިވެނީގެ މުހިންމު ސިފައެކެވެ.
وَأَنْكِحُوا الْأَيَامَىٰ مِنْكُمْ وَالصَّالِحِينَ مِنْ عِبَادِكُمْ وَإِمَائِكُمْ ۚ إِنْ يَكُونُوا فُقَرَاءَ يُغْنِهِمُ اللَّهُ مِنْ فَضْلِهِ ۗ وَاللَّهُ وَاسِعٌ عَلِيمٌ
”އަދި ތިޔަބައިމީހުންގެ ތެރެއިން މީހުންނާ ނުއިނދެ ތިބޭ މީހުން، ތިޔަބައިމީހުން (މީހުންނާ) ދެވާށެވެ! އަދި ތިޔަބައިމީހުންގެ ފިރިހެން އަޅުންނާއި، އަންހެން އަޅުންގެ ތެރެއިން ހެޔޮލަފާ މީހުންވެސްމެއެވެ. އެއުރެންނީ، ފަގީރުން ކަމުގައިވާނަމަ، އެކަލާނގެ ފަޟްލުވަންތަކަމުން، އެކަލާނގެ އެއުރެން މުއްސަނދިކުރައްވައިފާނެތެވެ. اللَّه އީ، ތަނަވަސްވަންތަ، މޮޅަށް ދެނެވޮޑިގެންވާ ރަސްކަލާނގެއެވެ."
އިސްލާމްދީން ބާރުއަޅަނީ ކައިވެންޏަކީ މާތްވެގެންވާ، އިއްޒަތްތެރި މަގަކަށް ހެދުމަށެވެ. ކައިވެނި ބިނާވާންޖެހެނީ ހަމައެކަނި ބޭރުފުށުގެ ރީތިކަމަކަށް ނޫނެވެ. ސަބަބަކީ ވަގުތާއެކު ރީތިކަން ފަނޑުވެގެންދާނެތީއެވެ. ދެމިގެންދާނީ އަޚްލާގާއި، ވަފާތެރިކަމާއި، ޒިންމާދާރުކަމެވެ. ވަރުގަދަ އިސްލާމީ ކައިވެންޏެއް ބިނާވަނީ އިތުބާރާއި އިހުތިރާމުގެ މައްޗަށެވެ. އެއީ ބިރުވެރިކަމެއް ނުވަތަ އެކަކު އަނެކަކުގެ މައްޗަށް ބާރު ފޯރުވުމުގެ މައްޗަކަށް ނޫނެވެ. ކާމިޔާބު ކައިވެންޏަކީ ދެމަފިރިންގެ މެދުގައި ދެބަސްވުމެއް ނުހިނގާ ކައިވެންޏެއް ނޫނެވެ. އެހެނަސް، އެއީ މައްސަލަ ޖެހުމުން މަޑުމައިތިރިކަމާއެކު އެކަކު އަނެކަކަށް މާފުކޮށް، ގުޅުން އިސްލާހުކޮށް ބިނާކުރަން ދަންނަ މީހުންގެ ކައިވެންޏެވެ.
އިސްލާމީ ކައިވެންޏަކީ ހިތްފަސޭހަ ގެދޮރެއް ފަދަ ތަނެކެވެ. އެތަނުގައި ހަގީގީ ލޯތްބާއި، ދާއިމީ އިހުތިރާމާއި، އަބަދުވެސް އޯގާތެރިކަން އޮންނަންޖެހެއެވެ. ކައިވެންޏަކީ އިންސާނާ ނިކަމެތިކޮށްލައި، އޭނާގެ ރޫހު ބަލިކޮށްލާ ކަމެއް ނޫނެވެ. އެއީ ދެމީހުން އެކުގައި ވަރުގަދަ ބަޔަކަށް ހަދައިދޭ މަތިވެރި ގުޅުމެކެވެ.
ރެފަރެންސް:
ކީރިތި ގުރުއާނުގެ ދިވެހި ތަރުޖަމާ: (ސޫރަތުއް ރޫމް: 21، ސޫރަތުލް ބަގަރާ: 187، ސޫރަތުއް ނޫރު: 32)
މަޞްދަރު: އިސްލާމީ ކަންތައްތަކާ ބެހޭ ވުޒާރާ، ދިވެހިރާއްޖެ.