އިންޑޮނޭޝިއާގެ ރައްޔިތެއްގެ ގައިގައި 30 ކިލޯގެ ބޮޑު ޓިއުމަރެއް އެބައިނެވެ. އަންދްރިއަދީ ޕުޓްރާ ނަމަކަށް ކިޔާ އުމުރުން 34 އަހަރު މި ފިރިހެން މީހާގެ މޫނާއި މޭމައްޗާއި އަދި ބަނޑުގައިވެސް ޓިއުމަރުވަނީ އުފެދިފައެވެ. މި ޓިއުމަރުތައްގުޅި ބޮޑު އެއް ޓިއުމަރަށް ވަނީ ބަދަލުވެފައެވެ. އޭނާ ބަލާ ޑަކްޓަރުންނާއި ހަވާލާދީ ރިޕޯޓުތައް ބުނާގޮތުން އޭނާގެ ގައިގައި އެވަނީ ނުރައްކާތެރި ޓިއުމަރެއް ނޫނެވެ.
އޭނާއަކީ އުފަންވުމުގައިވެސް ބައްޔެއް ހުންނަ މީހެކެވެ. އެއީ ނިއުރޯފައިބްރޮމަޓޯސިސް ނަމަކަށް ކިޔާ ޖެނެޓިކް ޑިސްއޯޑާއެކެވެ. މި ބަލީގެ ސަބަބުން ޓިއުމަރު އުފެދުމުގެ ފުރުސަތު ބޮޑުވެއެވެ. އޭނާ ބަލާ ޑަކްޓަރުންނާއި ހަވާލާ ދީ އޭނާގެ އާއިލާ މީހަކު ބުނާ ގޮތުގައި އޭނާގެ ގައިން ޓިއުމަރު ނެގިޔަސް އަނެއްކާވެސް އުފެދޭނެއެވެ. އެހެންވެ އެހާ ބޮޑު ހަރަދެއް ކޮށްގެން އެ ޓިއުމަރު ނަގަން ބޭނުން ނުވަނީކަމަށްވެސް އޭނާ ވަނީ ބުނެފައެވެ.
ޕުޓްރާގެ އާއިލާއަކީ މާބޮޑު ތަނަވަސްކަމެއް ލިބިފައި ނުވާ އާއިލާއެއް ކަމުން ޓިއުމަރު ނެގުމަށް ކުރަންޖެހޭ ހަރަދު ކުރުމުގައި ނުކުޅެދިފައި ވެއެވެ. ޓިއުމަރުގެ ބޮޑުކަމުން މިހާރު އޭނާގެ ދިރިއުޅުމަށް އުނދަގޫވެފައިވާ ކަމަށާއި ދިރިއުޅުމުގައި ކުރަންޖެހޭ ކަންކަމަށް އުނދަގުވާކަމަށްވެސް އޭނާ ބުނެއެވެ. މިހާރު އޭނާ ބޭނުން ވަނީ ކޮންމެވެސް ގޮތަކުން ވިޔަސް އެ ޓިއުމަރު ނެގޭނޭ ގޮތެއް ހެދުމެވެ. އަދި އޭނާ ވަނީ އެކަމަށް އެހީ އަށްވެސް އެދިފައެވެ.
ޕުޓްރާގެ ހުރިހާވެސް އުއްމީދެއް ގުޅިފައިވަނީ އޭނާގެ އީމާންތެރި ކަމަށެވެ. އޭނާ ބުނާގޮތުގައި މިއީ މާތް ﷲ އޭނާއަށް ކުރެއްވި އިމްތިހާނެއް ކަމަށާއި މި އިމްތިހާނުން އޭނާ ފާސްވާން ވަރަށްބޭނުން ކަމަށެވެ. އަދި އެހާލުގައިވެސް އެއްވެސް ނަމާދެއް ނާޅާ ކަމަށާއި ހުރިހާ ނަމާދެއް ބަރާބަރަށް ކުރާކަމަށް އޭނާ ވަނީ ބުނެފައެވެ. އަދި މިހާލުގައިވެސް ހިތްވަރާއި ސާބިތުކަމާއި އެކު ހުރެވެނީ ނަމާދު ކުރާތީކަމަށްވެސް އެނާ ވަނީ ބުނެފައެވެ.
މިފަދަ ތަފާތު ބަލިތައް ހުންނަ މީހުން ދުނިޔޭގައި މަދެެއް ނޫނެވެ. ނަމަވެސް ހަބަރު ތަކަށާއި ނޫސްތަކަށް ތިލަ ވަނީ މީގެ ތެރެއިން ވަރަށްވެސް މަދު ބައެކެވެ.