މި ނިމުނު ޖެނުއަރީ މަހު ޕްރިމިއަރލީގުގެ އެންމެ މޮޅު ކޯޗަކަށް މެންޗެސްޓަރ ޔުނައިޓެޑުގެ ވަގުތީ ކޯޗު މައިކަލް ކެރިކް އަދި އެންމެ މޮޅު ކުޅުންތެރިއަކަށް ބްރެންފާޑުގެ ފޯވާޑު އައިގަ ތިޔާގޯ ހޮވައިފިއެވެ.
ކޮންމެ މަހަކުވެސް ހޮވާ މި މަގާމުތައް ހޮވަނީ ކުޅިބެލުންތެރިންގެ ވޯޓާއި އެކަމަށް ކަނޑައަޅާފައިވާ ޚާއްޞަ ޕެނަލަކުން އެންމެ ރަނގަޅު ކޯޗުންނާއި ކުޅުންތެރިން ޝޯޓްލިސްޓް ކުރެވިގެންނެވެ. ރުބެން އަމޮރިމް ކޯޗުކަމުން ވަކިކުރުމުން ސީޒަންގެ ނިޔަލަށް ް ޔުނައިޓެޑުގެ ކޯޗުކަމާ ކެރިކް ހަވާލުވިފަހުން އެޓީމު އަދި ބައްޔެއްނުވެއެވެ. ކެރިކްގެ އިރުޝާދުގެ ދަށުން ޖެނުއަރީމަހުގެ 13 ވަނަ ދުވަހު ޓީމާ ހަވާލުވިފަހުން، މެންޗެސްޓަރ ސިޓީ އާއި އާސެނަލް މައްޗަށްވަނީ ކުރި ހޯދާފައެވެ. ސިޓީ ކައިރިން 2-0 އިން އަމިއްލަ ދަނޑުގައި މޮޅުވިއިރު، އާސެނަލްއަށް މިސީޒަނުގައި އެޓީމުގެ އަމިއްލަ ދަނޑުގައި ވީ ފުރަތަމަ ބައްޔަކީ 3-2 އިން ޔުނައިޓެޑު އަތުންވީ ބައްޔެވެ.
ކެރިކަށް މި އެވޯޑް ލިބުމާއެކު، ވެގެން ގޮސްފައިވަނީ ވަގުތީ ކޯޗަކަށް ހުއްޓާ މި މަގާމު ލިބުނު ޔުނައިޓެޑުގެ ފުރަތަމަ ކޯޗަށެވެ. މީގެ ކުރިން އެ އެވޯޑު ލިބިފައިވަނީ އޮލެގަނަ ސޯލްޝަޔަ ޓީމާ ހަވާލުވެގެން ހުރި ދުވަސްވަރުއެވެ.
ޖެނުއަރީމަހުގެ އެންމެ މޮޅު ކުޅުންތެރިޔާގެ މަގާމު ހޯދި އައިގަ ތިޔާގޯ އަންނަނީ ބްރެންފާޑުގައި މޮޅު ކުޅުމެއް ދައްކަމުންނެވެ. އުމުރުން 24 އަހަރުގެ ބުރެޒިލް ފޯވާޑު މިހާތަނަށްވަނީ ލީގުގައި 26 މެޗުން 17 ލަނޑު އެޓީމަށް ކާމިޔާބު ކޮށްދީފައެވެ. އެއާއެކު އެކުޅުންތެރިޔާ މިވަގުތު އޮތީ ޕްރިމިއަރލީގުގެ ލަނޑު ލިސްޓުގެ ދެވަނާގައެވެ. 2024 ވަނަ އަހަރު އެޓީމާ ގުޅުނު ތިޔާގޯ ޖެނުއަރީމަހު އެވަޓަންކޮޅަށްވަނީ ހެޓްރިކް ހަދައި، ޖެހިގެން އައި މެޗުގައި ސަންޑަލޭންޑުކޮޅަށްވަނީ ދެ ލަނޑު ޖަހައިދީފައެވެ.
ތިޔާގޯ ދައްކަމުން އަންނަ ކުޅުމުގެ ސަބަބުން އެޓީމުންވަނީ އޭނާގެ ކޮންޓްރެކްޓް މިއަދު އައު ކޮށްފައެވެ. އެޓީމުން މިއަދު ހާމަކުރި ގޮތުގައި ކުޅުންތެރިޔާއާ ވެވުނު އެއްބަސްވުމުގެ ދަށުން ތިޔާގޯވަނީ 2031 ނިޔަލަށް ކުލަބުގައި މަޑުކުރުމަށް ނިންމާފައެވެ.