ދާދިފަހުން ހުސްވި ޓޮޓޮންހަމް ހޮޓްސްޕަރގެ ކޯޗުކަމުގެ މަޤާމަށް އީގޯ ޓޫޑާ ހަމަޖައްސައިފިއެވެ. ޓޫޑާ އެ މަޤާމަށް ހަމަޖެއްސީ މި ސީޒަނުގެ ނިޔަލަށެވެ.
ރެލިގޭޝަންގެ ބިރު ހީވެފައި އޮތް ޓޮޓޮންހަމްގެ ކޯޗުކަމުން ތޯމަސް ފްރޭންކް ވަކިކުރީ މި ހަފުތާގެ ކުރީކޮޅުގައެވެ. ޓޮޓޮންހަމްގެ ކޯޗުކަމާ ހަވާލުވި އުމުރުން 47 އަހަރުގެ ޓޫޑާ މީގެ ކުރިން ބޮޑެތި ބައެއް ކުލަބުތަކުގައި މަސައްކަތްކޮށްފައިވެއެވެ. އޭގެ ތެރޭގައި ލާޒިއޯ، މާސޭ، ގަލަޓަސަރާއީ އަދި އުދުނެޒޭ ހިމެނެއެވެ. އެންމެ ފަހުން ޓޫޑާ މަސައްކަތްކުރީ ޔުވެންޓަސްގައެވެ. ނަމަވެސް، އެއްވެސް މެޗަކުން މޮޅުނުވެ 8 މެޗު ދިއުމުން، ޔުވެންޓަސްއިން ވަނީ އޭނާ މިދިޔަ އަހަރުގެ އޮކްޓޫބަރު މަހު މަޤާމުން ވަކިކޮށްފައެވެ. އޭގެ ފަހުން އެއްވެސް ކުލަބެއްގައި އޭނާ މަސައްކަތް ކޮށްފައެއް ނުވެއެވެ.
ޓޫޑާގެ ކޯޗިން ކެރިއަރުގައި މިހާތަނަށް ތައްޓެއް ލިބިފައިވަނީ އެންމެ ފަހަރަކުއެވެ. އެއީ 2013 ވަނަ އަހަރު ހައިޖުކް ސްޕްލިޓަށް ހޯދައިދިން ކްރޮއޭޝިއަން ކަޕް ތައްޓެވެ.
ބީބީސީއިން ރިޕޯޓުކުރާ ގޮތުގައި، ޓޮޓޮންހަމްގެ ކޯޗަކަށް އަންނަ ސީޒަނުގައި ގެންނާނެ ކަމަށް އެންމެ ބޮޑަށް ބެލެވެނީ ކުރިން އެ ޓީމަށް ކޯޗުކޮށްދިން މޮރީސިއޯ ޕޮޗެޓީނޯއެވެ. އޭނާ މިވަގުތު ހުރީ އެމެރިކާގެ ޤައުމީ ޓީމާ ހަވާލުވެއެވެ. ނަމަވެސް، ވޯލްޑް ކަޕް ނިމުމާއެކު އޭނާގެ ކޮންޓްރެކްޓް ހަމަވާތީ، ޓޮޓޮންހަމްގެ ކޯޗުކަމަށް އަނބުރާ ގެންނާނެ ކަމަށް ވަރަށް ބޮޑަށް ބެލެވެއެވެ. މީގެ އިތުރުން، އެ ލިސްޓުގައި ދެން ހިމެނެނީ ދާދިފަހުން ފްރާންސްގެ އޮލިމްޕިކް މާސޭގެ ކޯޗުކަމުން ވަކިވި ރޮބާޓޯ ޑި ޒާބީއެވެ.