މިހާރު ކުރިޔަށްދާ ރައީސުލްޖުމްހޫރިއްޔާގެ ވާދައިގެ ތައްޓަށްކުޅެވޭ ފުޓްބޯޅަ މުބާރާތް، ޕްރެޒިޑެންޓްސްކަޕުގެ ސެމީފައިނަލުން ނިއުރޭޑިއަންޓް ސްޕޯޓްސް ކުލަބު ޖާގަ ހޯދައިފިއެވެ.
ސެމީފައިނަލުން ނިއު ޖާގަ ހޯދީ މިއަދު ހަވީރު ކުޅެވުނު މެޗުގައި ކުލަބު އީގަލްސް މައްޗަށް 2-1 ގެ ނަތީޖާއަކުން ކުރި ހޯދައިގެންނެވެ. މި ދެޓީމާއެކު އެއް ގުރޫޕުގައި ދެން ހިމެނުނީ އޮޑި ސްޕޯޓްސް ކުލަބެވެ. އޮޑި ސްޕޯޓްސް ކުލަބާއި ނިއުރޭޑިއަންޓް ސްޕޯޓްސް ކުލަބު ބައްދަލުކުރި މެޗު 1-1 އިން އެއްވަރުވެފައިވުމުގެ ސަބަބުން މިއަދުގެ މެޗު ކާމިޔާބުކޮށް ލިބުނު ހަތަރު ޕޮއިންޓާއެކު ނިއު މިވަނީ ސެމީ ފައިނަލް ޔަގީންކޮށްފައެވެ. ސެމީއަށް މި ގުރޫޕުން ދާނެ އަނެއް ޓީމު ޔަގީންވާނީ އޮޑިއާ އީގަލްސް ބައްދަލުކުރާ މެޗުގެ ނަތީޖާ ނުކުންނަ ގޮތަކުންނެވެ. އީގަލްސްއަކީ 2016 ވަނަ އަހަރު މި މުބާރާތް ކާމިޔާބުކުރި ޓީމެވެ. އޮޑި މިމުބާރާތުގައި ވާދަކުރަނީ މުޅިން އަލަށެވެ.
ގަލޮޅު ދަނޑުގައި މިއަދު ހަވީރު ކުޅެވުނު މިމެޗުގައި ނިއުރޭޑިއަންޓު މޮޅުވި ލަނޑުޖަހައިދިނީ މެޗުގެ މޮޅު ކުޅުންތެރިޔާގެ މަގާމު ހޯދި ޑަސިލްވާއެވެ. އީގަލްސްގެ މާވިން ލެބީ އަތުން ބައިކޮޅަށް ވަތް ގޯލަކުން ނިއު ފުރަތަމަ ލީޑު ނެގިނަމަވެސް، ފުރަތަމަ ހާފު ނިމުމުގެ ކުރިން އީގަލްސްއިން ކުޅުން ރަނގަޅުކޮށް ނަތީޖާ ހަމަހަމަކުރިއެވެ. މިލަނޑު އެޓީމަށް ކާމިޔާބު ކޮށްދިނީ ފޭދޫ އިއްބެ ނަގައިދިން ކޯނަރަކުން ހިސާމް ސަލީމް (ކޮކީ)އެވެ.