ނިއުކާސަލް ޔުނައިޓެޑުގެ ކެޕްޓަން ބްރެޒިލްގެ ބްރޫނޯ ގިމަރޭސް ލިބުނު އަނިޔާއަކާ ގުޅިގެން ދެމަހަށް ކުޅުމާ ދުރަށްދާން ޖެހިއްޖެއެވެ.
ގިމަރޭސްގެ ފައިގެ މަސްގަނޑަށް އަނިޔާވީ ޓޮޓެންހަމް ކައިރިން ނިއުކާސަލް މޮޅުވި މެޗުގައެވެ. މި އަނިޔާއާ ގުޅިގެން އެ މެޗުގެ ފަހުކޮޅު އޭނާވަނީ ދަނޑުން ބާލާފައެވެ. އޭނާއަށް އެ މެޗުގައި އަނިޔާވެފައިވާއިރު، އެއީ ކަކުލަށް ލިބުނު އަނިޔާއިން ރަނގަޅުވެގެން ކުޅެން ނުކުތް ދެވަނަ މެޗުކަން ފާހަގަކޮށްލަންޖެހެއެވެ. ނިއުކާސަލްގެ ކޯޗު ބުނެފައިވާ ގޮތުގައި ގިމަރޭސްއަށް ލިބުނު އަނިޔާއާ ގުޅިގެން އެކުޅުންތެރިޔާ ވަރަށް ކަންބޮޑުވެފައިވާކަމަށާއި ސަބަބަކީ ކުރިން އަނިޔާ ނުވާ ތަނަކަށް އަނިޔާވެފައިވުންކަމަށެވެ.
ގިމަރޭސް އަންނަނީ ނިއުކާސަލް ޔުނައިޓެޑުގައި ތަފާތު ދައްކަމުންނެވެ. އެގޮތުން އޭނާ ކުޅޭ މެޗުތަކުގައި އެޓީމު މޮޅުވާ އިންސައްތަވަނީ 53.1 އިންސައްތައަށް ޖެހިލާފައެވެ. މިހެންކަމުން އޭނާ ނުލާ ނިއުކާސަލް މެޗުތަކަށް ނުކުންނަން މިވަނީ އިތުރު ފާލެއް ބޭނުންވެފައެވެ.