މިހާރު ކުރިޔަށްދާ ހިޔުންޑައި ގޯލްޑެން ފުޓްސަލް ޗެލެންޖް 2026 ގެ ޗެމްޕިއަންކަން ހދ. ނައިވާދޫ ކާމިޔާބުކޮށްފިއެވެ.
ނައިވާދޫ ޗެމްޕިއަންކަން ހޯދީ ރޭ ކުޅުނު ފައިނަލުމެޗުގައި ގއ. ދެއްވަދޫ ބޮޑު ތަފާތަކުން ބަލިކޮށްގެންނެވެ. މި މުބާރާތުގެ ފައިނަލެއްގައިވެސް މިހާތަނަށް ފެނުނު އެންމެ ތަފާތު ބޮޑުކޮށް ނައިވާދޫ މިމެޗު ކާމިޔާބުކުރީ 9-3 އިންނެވެ.
މެޗުގެ ފުރަތަމަ ލަނޑު މެޗު ފެށިގޮތަށް ފުރަތަމަ ފަނަރަ ސިކުންތުގެ ތެރޭގައި ދެއްވަދޫއިން ލަނޑެއްޖަހައި ނައިވާދޫ ސިއްސުވާލިއެވެ. ނަމަވެސް، ހިތްވަރު އެލުވާނުލައި ކުޅުންތެރިން ކުރިއަށް ޖައްސައިގެން ކުޅެމުންދިޔަ އަވަސް ކުޅުމުގެ ނަތީޖާއަކަށް ވެގެންދިޔައީ އޭގެ ތިންވަރަކަށް މިނެޓުފަހުން ދެއްވަދޫ ޕެނަލްޓީއޭރިއާ ބޭރުން ނައިވާދޫއަށް ލިބުނު ހިލޭ ޖެހުމަކުން އަހުމަދު ހަމީދު (އައްމަޑޭ) ލަނޑުޖެހުމެވެ. މި ލަނޑާއެކު ނައިވާދޫގެ ކުޅުން ހަލުވިކޮށްލުމާއެކު ކައިރިކައިރީގައި ދެއްވަދޫއިން ހަތަރު ފައުލު ކުރިތަން ފެނުނެވެ.
ފުރަތަމަ ހާފުގެ ފަހު 8 މިނެޓަކީ ބެލުންތެރިން ނޭވާ ހިފަހައްޓާލަން އުނދަގޫ ވަގުތުކޮޅެކެވެ. ދެޓީމުންވެސް ލަނޑެއް ޖެހުމަށްކުރަމުން އައި މަސައްކަތުގެ ތެރެއިން ގިނަ ފައުލްތަކެއް ދެއްކުމާއި، ރެފްރީން ނިންމުންތައް ނިންމުމަށް ވީޑިއޯ ސަޕޯޓުގެ އެހީ ބޭނުންކުރި މަންޒަރު ފެނިގެންދިޔައެވެ.
ނައިވާދޫގެ ދެވަނަ ލަނޑު އެޓީމަށް ޖަހައިދިނީ ވިޝާމް (ވިޝަންޓޭ) ދިން ޕާހަކުން އަބްދުﷲ ޝާފިއު (ޝާއްޕެ) އެވެ. ތިންވަނަ ލަނޑަކީ އަހުމަދު ހަމީދު އެޓީމުގެ ހާފުތެރެއިން ބޯޅަ ހިފައިގެން ނެގި ރަންއެއްގައިގޮސް މުހައްމަދު އަސްލަމަށް ޖައްސާލުމުން ހުރަސްކޮށްލި ބޯޅަ ޔާމިން މުޙައްމަދު (ޔާންޓެ) ޖެހި ލަނޑެކެވެ. ފުރަތަމަ ހާފު ނިމެންދަނިކޮށް ނައިވާދޫގެ ފަސް ފައުލު ހަމަވުމުގެ ސަބަބުން ދެއްވަދޫއަށް ދެ ދުރު ޕެނަލްޓީއެއް ލިބުނު ނަމަވެސް، ދެ ހަމަލާވެސްވަނީ ނައިވާދޫ ގޯލް ކީޕަރު ދިފާޢުކޮށްފައެވެ.
ނައިވާދޫއިންވަނީ ފުރަތަމަ ހާފު ނިމުމުގެ ކުރިން ނަތީޖާ 4-1 އަށް ބަދަލުކޮށްލާފައެވެ. އެ ލަނޑަކީ، ޔާމިން ބޯޅަ ހިފައިގެން ދެއްވަދޫގެ ޕެނަލްޓީ އޭރިއާ ތެރެއަށް ވަދެވަދެ އޮއްވާ ކީޕަރު ކުރި ފައުލަކަށް ދިން ޕެނަލްޓީއަކުން ޖެހި ލަނޑެކެވެ. އެލަނޑު ޖަހައިދިނީ އަހުމަދު ހަމީދެވެ.
ދެވަނަ ހާފުގައި ފުރަތަމަ ލަނޑު ޖެހީ ދެއްވަދޫއިންނެވެ. އެލަނޑު ކާމިޔާބު ކޮށްދިނީ އަރިމަތިން ހުޒެއިފަތުﷲ ފޮނުވާލި ބޯޅައަކުން އެޓީމްގެ ރާހިލްއެވެ. ނަމަވެސް ދެއްވަދޫއިން ކުޅުން ރަނގަޅުކޮށްލި ވަގުތު އަނެއްކާވެސް ނައިވާދޫއިން ލަނޑެއްޖަހައި ފަރަގު ބޮޑު ކުރިއެވެ. އެޓީމުގެ ފަސްވަނަ ލަނޑަކީ ދެއްވަދޫ ޕެނަލްޓީ އޭރިއާ ބޭރުން ލިބުނު ހިލޭ ޖެހުމަކުން އެޓީމުގެ މައިޝާން (ޓޯނޫ) ޖެހިލަނޑެކެވެ. ހަވަނަ ލަނޑު ޖަހައިދިނީ ޝާއްޕެ ހުސްކޮށްލާފައި ދިން ޕާހަކުން ވިޝާންޓެއެވެ. އެހިސާބުން ދެއްވަދޫއިން ޕަވަރޕްލޭގެ ބޭނުން ކުރަން ދެއްވަދޫން ފެށިއެވެ. ނައިވާދޫއިން ބާކީ ޖެހި 3 ލަނޑަކީ ދެއްވަދޫއިން ޕަވަރޕްލޭގައި ކީޕަރު ކުރިޔަށް އަރުވައިގެން ކުޅެނިކޮށް ލިބުނު ހުސް ފުރުޞަތުތަކުގައި ޖެހި ލަނޑުތަކެކެވެ. އެގޮތުން ޝާއްޕެ ދެލަނޑާއި ޓޯނޫވަނީ ލަނޑެއްޖަހައި ތަފާތު ބޮޑުކޮށްދީފައެވެ.
މިއީ ނައިވާދޫ ޖެހިޖެހިގެން ފައިނަލަށް ދަތުރުކުރި ދެވަނަ ފަހަރެވެ. އަދި މި މުބާރާތް ކާމިޔާބުކުރި ފުރަތަމަ ފަހަރެވެ. ނައިވާދޫ މިއަހަރުގެ މުބާރާތް މި ކާމިޔާބުކުރީ ކުޅުނު އެއްވެސް މެޗަކުން ބަލިނުވެ، އަތޮޅު ބުރާއި ޒޯން ބުރުވެސް ކާމިޔާބުކޮށްގެންނެވެ.