އެފްއޭކަޕްގެ ހަތަރުވަނަ ބުރުގައި ރޭ ނިއުކާސަލް ޔުނައިޓެޑާއި އެސްޓަންވިލާ ބައްދަލުކުރި މެޗު ނިއުކާސަލް ކާމިޔާބު ކޮށްފިއެވެ.

މިމެޗު ނިއުކާސަލް ޔުނައިޓެޑު ކާމިޔާބުކުރީ 3-1 ގެ ނަތީޖާއިންނެވެ. މިމެޗުގެ ފުރަތަމަ ލަނޑުޖަހައި ކުރި ހޯދީ އެސްޓަންވިލާއިންނެވެ. އެ ލަނޑު ޖަހައިދިނީ ދާދިފަހުން އެޓީމަށް ބަދަލުވި ޑަގްލަސް ލުއިޒް ދިން ޕާހަކުން ޓެމީ އެބްރަހަމްއެވެ. އޮފްސައިޑުގައި ހުރެ ގޯލުގެ ތެރެއަށް ފޮނުވާލިނަމަވެސް އެއީ ލަނޑެއްކަމަށްވަނީ ނިންމާފައެވެ. ރިޕްލޭއިންވެސް އެ ކުޅުންތެރިޔާ އޮފްސައިޑުކަން ސާފުކޮށް އެނގެއެވެ. ނަމަވެސް ވީއޭއާރު ނުބަލާތީ ރެފްރީގެ ނިންމުމަށް ބަދަލު ގެނެސްފައެއްނުވެއެވެ.

މެޗުގެ ދެވަނަ ހާފު އެސްޓަންވިލާއިން ކުޅެންޖެހުނީ އެއް ކުޅުންތެރިއަކު މަދުކޮށެވެ. އެއީ ފުރަތަމަހާފުގެ އިތުރުވަގުތުގައި މާކޯ ބިޒޮއަށް ރަތްކާޑު ދައްކާ ދަނޑުން ފޮނުވާލުމުންނެވެ.

ނިއުކާސަލްއަށް މެޗުގެ ނަތީޖާ ހަމަހަމަ ކޮށްދިނީ 63 ވަނަ މިނެޓުގައި ސަންޑްރީ ޓޮނާލީ ޖެހި ލަނޑުންނެވެ. އޭގެ މާގިނަ އިރުތަކެއްނުވެ ބާން ފަހިކޮށްދިން ފުރުޞަތެއްގައި ޓޮނާލީވަނީ އިތުރު ލަނޑެއްޖަހައި އެޓީމަށް ލީޑު ނަގައިދީފައެވެ. އަދި ފަހު ލަނޑު ޖަހައިދިނީ ފަހަކަށް އައިސް ލަނޑެއް ނުޖެހި އެކަމުގެ ފާޑުކިޔުން އަމާޒުވެފައިވާ ނިކް ވޯލްޓަމާޑާއެވެ. 

މިމެޗުގައި ރެފްރީންގެ ނިންމުންތަކާމެދު ދެޓީމުގެ ކޯޗުންވެސްވަނީ ކަންބޮޑުވުންފާޅުކޮށްފައެވެ. އެގޮތުން ނިއުކާސަލް ޔުނައިޓެޑުގެ ކޯޗު ވީއޭއާރާ ނުލާ ފުޓްބޯޅަ މާ ފޯރިގަދަވާނެކަމަށް ގަބޫލުކުރާކަމަށާއި، އެހެންނަމަވެސް ނިންމުންތަކުގައި ޓެކްނޮލޮޖީގެ ބޭނުންކުރުމުން ނިންމުންތައް މާ އިންސާފުވެރިވެފައި ޔަގީންވެސްވާނެކަމަށް ދެކޭކަމަށެވެ. އެސްޓަންވިލާގެ ކޯޗު އުނެއި އެމެރީވެސް ބުނެފައިވަނީ މިމެޗުގެ ނިންމުންތަކުންވެސް ވީއޭއާރުގެ ބޭނުން ހިފަންޖެހޭކަން އެނގިގެން ހިގައްޖެކަމަށެވެ. އެއީ ނިންމުންތައް ނިންމާއިރު ރެފްރީންނަށް އެހީތެރިވުމަށްކަމަށްވެސް އޭނާ ބުނެފައިވެއެވެ.

މި މެޗުގައި އެސްޓަންވިލާއިން ޖެހި އޮފްސައިޑު ލަނޑާއި، އޭރިއާ ތެރެއިން އަތުގައ ޖެހުމުން ޕެނަލްޓީއެއް ދޭންޖެހޭ ހާލަތެއްގައި އޭރިއާ ބޭރުން ހިލޭޖެހުމެއް ދިނުމާއި، ރަތްކާޑު ދައްކަން ޖެހޭ ހާލަތެއްގައި ކާޑުން ކުޅުންތެރިއަކު ސަލާމަތްވުމާއި، ނަތީޖާއަށް ބަދަލު އަންނާނެ ކަހަލަ އިތުރު ތިން ނިންމުމެއް ރެފްރީންގެ ނިންމުންތަކުން ފެނިގެންދިޔައެވެ.

އެފްއޭކަޕްގައި ވީއޭއާރު ބޭނުންކުރަން ފަށަނީ ގަދަ ސޯޅަ ނުވަތަ ފަސްވަނަ ބުރުން ފެށިގެންނެވެ.