އިންގްލެންޑް އަދި ބެޔާން މިއުނިކްގެ ފޯވާޑް ހެރީކޭން ކެރިއަރުގައި ޖެހި 500 ވަނަ ލަނޑާއެކު އަނެއްކާވެސް އައު ރެކޯޑެއް ހަދައިފިއެވެ.
ޖަރުމަނުގެ ބެޔާން މިއުނިކުގައި މިހާރު ކުޅެމުން އަންނަ ކޭން އޭނާގެ ކެރިއަރުގައި ޖެހި 500 ވަނަ ލަނޑު ހަމަކުރީ ހޮނިހިރުދުވަހު ބުންޑަސްލީގާގައި ވާޑާ ބްރެމެން އަތުން ބެޔާން 3-0 އިން މޮޅުވި މެޗުގައި ޖެހި ދެލަނޑާއެކުއެވެ. މިއާއެކު ކޭން ވެގެން ގޮސްފައިވަނީ ރަސްމީ މެޗުތަކުގައި 500 ލަނޑު ކާމިޔާބުކުރި އިނގިރޭސިވިލާތަށް ނިސްބަތްވާ ފުރަތަމަ ކުޅުންތެރިޔާއަށެވެ.
ކުރިން ޓޮޓެންހަމް ހޮސްޕަގައިވެސް މޮޅު ކުޅުމެއް ދެއްކި ކޭން ބެޔާން މިއުނިކަށް ބަދަލުވުމަށްފަހު އެޓީމުގައި އަންނަނީ ގޯލު ޖެހުމުގެ ހުނަރު ސާބިތުކޮށްދެމުންނެވެ. އެގޮތުން ލީގުގެ 22 މެޗުން 26 ލަނޑު އޭނާވަނީ މިހާތަނަށް ޖަހައިދީފައެވެ.
ހެރީކޭންގެ ފުޓްބޯޅަ ކެރިއަރަށް ބަލާއިރު، އޭނާ އެންމެ ފުރަތަމަ ލަނޑު ޖަހާފައިވަނީ އުމުރުން އެންމެ 17 އަހަރުގައި ލެޓަން އޮރިއެންޓުގެ ޖާޒީގައި ޝެފީލްޑް ވެނިސްޑޭއާ ދެކޮޅަށެވެ. މިހާތަނަށް ފަސް ކުލަބަކަށް ކުޅެފައިވާ ކޭން ލެސްޓަރ ސިޓީއަށް 2 ލަނޑު، މިލްވޯލްއަށް 9 ލަނޑު، ބެޔާން މިއުނިކަށް 126 ލަނޑު އަދި ޓޮޓެންހަމްއަށް 280 ލަނޑު ޖަހައިދީފައިވެއެވެ. މީގެ އިތުރުން އިންގްލެންޑުގެ ގައުމީ ޓީމަށް 78 ލަނޑުވަނީ ކާމިޔާބު ކޮށްދީފައެވެ.
ކޭންގެ ގޯލު ޖެހުމުގެ ތަފާސް ހިސާބުތަކަށް ބަލާއިރު، ކުރީގެ ބައެއް މަޝްހޫރު ކުޅުންތެރިންގެ ރެކޯޑުތަކަށް އޭނާވަނީ ނިމުން ގެނެސްފައެވެ. އެގޮތުން 6 ދަހަރު ވަންދެން ގްރީވްސް ހަދާފައިވާ އެންމެ ގިނަ ލަނޑުޖެހި އިނގިރޭސިވިލާތަށް ނިސްބަތްވާ ކުޅުންތެރިޔާގެ ރެކޯޑު ކޭންވަނީ މީގެ ދެމަހެއްހާ ކުރިން މުގުރާލާފައެވެ. އިނގިރޭސި ޕްރިމިއަރލީގު ދޫކޮށް ކޭން ބެޔާންއަށް ބަދަލުވިއިރު، އޭނާއަކީ ލީގުގައި ދެވަނައަށް އެންމެ ގިނަ ލަނޑުޖެހި ކުޅުންތެރިޔާއެވެ. 260 ލަނޑާއެކު އަދިވެސް އެއްވަނާގައި އޮތީ ނިއުކާސަލް ޔުނައިޓެޑުގެ ލެޖެންޑް އެލަން ޝިއަރައެވެ. އިންޓަނޭޝަނަލް ފެޑެރޭޝަން އޮފް ފުޓްބޯލް ހިސްޓޮރީ އެންޑް ސްޓެޓިސްޓިކްސްގެ ތަފާސް ހިސާބުތަކަށް ބަލާއިރު، ކޭންއާއި ގްރީވްސްއަށްފަހު، އިނގިރޭސިވިލާތަށް ނިސްބަތްވާ ކުޅުންތެރިންގެ ތެރެއިން މިހާތަނަށް އެންމެގިނަ ލަނޑުޖެހި ލިސްޓުގެ ތިންވަނާގައި އޮތީ ސްޓީވް ބްލޫމަރ އެވެ. ހަތަރުވަނާގައި އޮތީ އެލަން ޝިއަރައެވެ.