ރެއާލް ސޮސިއެޑާޑާ ބައްދަލުކުރި މެޗު 4-1 ގެ ތަފާތުބޮޑު ނަތީޖާއަކުން ކާމިޔާބުކޮށް ލަލީގާގެ އެއްވަނައަށް ރެއާލްމެޑްރިޑް ޖެހިލައިފިއެވެ.
ރޭ ރެއާލްގެ އަމިއްލަ ދަނޑު އެސްޓާޑިއޯ ބާނަބައުގައި 74،176 ސަޕޯޓަރުންގެ ކުރިމަތީގައި ކުޅުނު މިމެޗުގެ ފުރަތަމަ ހާފު ނިމުންއިރު ރެއާލްވަނީ 3-1 ގެ ލީޑަކުން މެޗުގެ ކޮންޓްރޯލް ހޯދާފައެވެ. ރެއާލްގެ ފުރަތަމަ ލަނޑު މެޗުގެ 5 ވަނަ މިނެޓުގައި ޖަހައިދިނީ އަނިޔާއިން އެނބުރިއައި ޓްރެންޓް އެލްޒެންޑަރ އާނޯލްޑް ނަގައިދިން ހުރަހަކުން ގޮންޒާލޯ ގާސިއާއެވެ. އޭގެފަހުން ސޮސިއެޑާޑުން ލަނޑެއްޖަހައި މެޗުގެ ނަތީޖާ ހަމަހަމަކުރިއެވެ. އެލަނޑު 21 ވަނަ މިނެޓުގައި ޖަހައިދިނީ ލިބުނު ޕެނަލްޓީއަކުން މިކޭލް އޮޔާޒަބަލްއެވެ. ނަމަވެސް މާގިނައިރުތަކެއްނުވެ 25 ވަނަ މިނެޓުގައި ރެއާލަށް ލިބުނު ޕެނަލްޓީއަކުން ވިނިސިއަސް ޖޫނިއަރ ލަނޑުޖަހައި ރެއާލަށް ލީޑު ނަގައިދިނެވެ. ފުރަތަމަ ހާފު ނިމުމުގެ ކުރިން ވަލްވާޑޭ އިތުރު ލަނޑެއްޖަހައި ރެއާލްގެ ލީޑު ފުޅާކޮށްދިނެވެ. ރެއާލުގެ ހަތަރުވަނަ ލަނޑު މެޗުގެ ދެވަނަ ހާފު ފެށިތާ ތިންވަނަ މިނެޓުގައި ޖެހީ ލިބުނު ޕެނަލްޓީއަކުން ވިނިސިއަސް ޖޫނިއަރއެވެ.
މިމެޗަކީ އެލެކްޒެންޑަރ އާނޯލްޑް ލިބުނު އަނިޔާއަކާ ގުޅިގެން ދެމަސްދުވަހު ކުޅުމާ ދުރުގައި ހުރެފައި ނުކުތް ފުރަތަމަ މެޗެވެ.
މި ނަތީޖާއާއެކު ވާދަވެރި ބާސެލޯނާއަށްވުރެ އެއްމެޗު އިތުރަށް ކުޅެ، ރެއާލް މިވަގުތު އޮތީ ލަލީގާގެ އެއްވަނާގައެވެ. އެއީ ކުޅުނު 24 މެޗުން ލިބުނު 60 ޕޮއިންޓާއެކުއެވެ. ބާސެލޯނާ ދެވަނާގައި އޮތީ 23 މެޗުން ލިބުނު 58 ޕޮއިންޓާއެކުއެވެ. ބާސެލޯނާ ޖިރޯނާއާ ބައްދަލުކުރާނީ 17 ފެބުރުވަރީވާ އަންގާރަ ދުވަހުއެވެ.