މަސްޖިދުއްނަބަވީގައި ގިނަ ވަގުތު ހޭދަކޮށް، ޤުރުއާން ކިޔަވަން އިންނަ މީހާ ނިޔާވެއްޖެއެވެ. މުޙުޔިއްދީން ޙަފީޒު ﷲ ނަމަކަށް ކިޔާ މި މީހާ ނިޔާވީ ހުކުރު ދުވަހު ހުކުރު ވަގުތުގައެވެ. އޭނާގެ ލަގަބެއްގެ ގޮތުން ބައެއް މީސްމީހުން އޭނާއަށް "މިސްކިތު ކޮތަރު" ގެ ނަމުން ވެސް މުހާތަބުކޮށް ހަދައެވެ. އެއީ އޭނާ ގިނަވަގުތު މިސްކިތުގައި ހޭދަކުރާތީއެވެ.
އޭނާއަކީ އެކަނި އުޅެމުން އައި މީހެކެވެ. އޭނާގެ އާއިލާގެ މީހަކު ނުވަތަ އަނބިދަރިންނެއްވެސް ނުތިބޭކަމަށް ރިޕޯޓުތައް ބުނެއެވެ. އޭނާގެ އެ ހާލު ފެނި، ހެޔޮ އެދޭ ފަރާތަކުން އޭނާއަށް ދީފައިވާ ކޮޓަރިއެއްގައި އެކަހެރިކަމާއެކު އޭނާ އުޅެމުން ދިޔައީ މަދީނާގައެވެ.
ރިޕޯޓުތައް ބުނާގޮތުގައި ހުރިހައި ނަމާދެއްގައިވެސް އޭނާ އިންނާނީ މަސްޖިދުއްނަބަވީގައެވެ. އަދި ގިނަވަގުތު ހޭދަކުރާނީވެސް މިސްކިތުގައެވެ. މަސްޖިދުއްނަބަވީގައި އޭނާ 50 އަހަރު މެދު ނުކެނޑި ހޭދަކޮށްފައިވާ ކަން އެމިސްކިތުގެ ތާރީޚާބެހޭ ގޮތުން ވާހަކަ ދައްކާ މީހުންނާ ހަވާލާ ރިޕޯޓުތައް ބުނެއެވެ.
އޭނާ ނިޔާވުމުގެ ހަބަރު މީސްމީޑިޔާގައި ދައުރުވުމުން، ސައޫދީ އަރަބިއްޔާގައި އޭނާ ދަންނަ ގިނަ ބަޔަކު ވަނީ އޭނާއަށް ތަޢްޒިޔާ ކިޔާ ހެޔޮ ދުޢާ ކޮށްފައެވެ.
އޭނާ މީގެ ކުރިން ބައެއް މީޑިއާތަކާއި ހިއްސާކުރި މައުލޫމާތުތަކުން އޭނާ އަކީ އިމާމް ބުޚާރީގެ އުފަން ވަޒަން ބުޚާރާގެ މީހެއްކަން އިނގެއެވެ. ނަމަވެސް އޭނާ އެންމެ ކުރީއްސުރެ އުޅެމުން ދިޔައީ މަދީނާގައެވެ.