މިހާރު ކުރިޔަށްދާ ޕްރެޒިޑެންޓްސްކަޕްގެ ސެމީފައިނަލަށް އޮޑި ސްޕޯޓްސް ކުލަބު ދަތުރުކޮށްފިއެވެ.
އޮޑި ސެމީފައިނަލަށް ދަތުރުކުރީ މިއަދު ހަވީރު ކުޅެވުނު މެޗުގައި ކުލަބު އީގަލްސް ކައިރިން ފަހަތުން އަރައި މޮޅުވެގެންނެވެ. މިމެޗު އޮޑި ކާމިޔާބުކުރީ 4-2 ގެ ނަތީޖާއިންނެވެ. މެޗުގެ ފުރަތަމަ ލަނޑުޖަހައި ކުރި ހޯދީ އީގަލްސްއިންނެވެ. އެލަނޑު މެޗުގެ 19 ވަނަ މިނެޓުގައި ޖަހައިދިނީ ފޭދޫ އިއްބެ ދިން ބޯޅައަކުން އިސްމާއިލް އީސާ (މެސީ)އެވެ. އޭނާ އެބޯޅަ ފޮނުވާލީ ޕެނަލްޓީ އޭރިއާ ތެރޭގައި ހުރެފައި ގޯލުގެ ދުރުކަނަށެވެ. ފުރަތަމަ ހާފު މި ނަތީޖާއިން ނިމުނުނަމަވެސް، ދެވަނަ ހާފު ފަށައިގެން މާ ގިނަ އިރުތަކެއްނުވަނީސް 59 ވަނަ މިނެޓުގައި އޮޑިއަށް އޭރިއާ ބޭރުގައި ހުރެ ފޮނުވާލި ބޯޅަ ގޯލަށް ވައްދާލައިގެން އަހުޒަމް ރަޝީދު (އަހޫ) މެޗުގެ ނަތީޖާ ހަމަހަމަކޮށްދިނެވެ.
އޮޑިއިން ޖެހި ތިންވަނަ ލަނޑަކީ އަހުމަދު އައިހަމް (އައިހު) ޖަހައިދިން ލަނޑެކެވެ. އަދި ހަތަރުވަނަ ލަނޑު އޭގެ މިނެޓެއްފަހުން އަހޫ ދިން ބޯޅައަކުން ޖަހައިދިނީ އަހުމަދު އަޔާޒު (އަޔާ) އެވެ.
ފުރަތަމަ ޑިވިޒަނުގައި މުޅިން އަލަށް މިސީޒަނުގައި ވާދަކުރަންފެށި އޮޑިން މިއަދުގެ މެޗަކީ މި މުބާރާތުގައި ކާމިޔާބުކުރި ފުރަތަމަ މެޗެވެ. ފުރަތަމަ މެޗުގައި ނިއުރޭޑިއަންޓާ ބައްދަލުކޮށް ވީ އެއްވަރެވެ. އަނެއްކޮޅުން އީގަލްސް ކުޅުނު ދެ މެޗުންވެސް ބަލިވެ މިވަނީ މި މުބާރާތުން އަލްވަދާޢު ކިޔަން ޖެހިފައެވެ.