ގޯލްޑެން ފުޓްސަލް ޗެލެންޖް 2026 ގެ ޗެމްޕިއަންކަން ހޯދި ހދ. ނައިވާދޫ ފުޓްސަލް ޓީމު ރަށަށް އައުމުން ހޫނު މަރުހަބާއެއް ކިޔައިފިއެވެ.
ފައިނަލުގައި ގއ. ދެއްވަދޫ ބޮޑު ތަފާތަކުން ބަލިކޮށް ގޯލްޑެން ފުޓްސަލްގެ ޗެމްޕިއަންކަން ހޯދި ނައިވާދޫ ޓީމު ރަށަށް އައީ މިއަދު ހަވީރުގެ ވަގުތެއްގައެވެ. ޓީމު އެންމެ ފުރަތަމަ ހަނިމާދޫ މަގުން މާލެއައިސް، ތަށި ހިފައިގެން ދިޔައީ ހދ. ފިނޭއަށެވެ. ފިނޭއަކީ ނައިވާދޫ ޓީމުގެ އެކިކަންކަމުގައި އަބަދުވެސް ވަރަށް ބޮޑު އެހީތެރިކަމެއް ފޯރުކޮށްދެމުންއަންނަ ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރ ޢަބްދުލްޢަފޫރު މޫސާ (ގަޕޯ) ގެ ރަށެވެ. އެރަށަށް މެންދުރުފަހު ޓީމު ދިޔުމުން އެރަށުންވެސް ވަރަށް ހޫނު މަރުހަބާއެއްވަނީ ކިޔާފައެވެ.
ނައިވާދޫ ޓީމު މިއަދު ހަވީރު އެރަށަށް ދިޔައިރު އަތޮޅުގެ ވަރަށް ގިނަ ރަށްރަށުން މީހުންވަނީ ޓީމަށް މަރުހަބާ ކިޔުމަށް އެރަށަށް ގޮހެވެ. އަދި ރަށުގެ ކުދިބޮޑު ހުރިހާ އެންމެން ރަށުގެ ބަނދަރަށް ނުކުމެ ޓީމަށްވަނީ ހޫނު މަރުހަބާއެއް ކިޔާފައެވެ. ރަށާ ލޯންޗު ކައިރިވުމުން ގިނަ އަދަދެއްގެ ލޯންޗުތަކާއި ޑިންގީތައް ގައުމީ ދިދަ ބޭނުން ކޮށްގެން ޓީމާއެކު ނައިވާދޫ ބަނދަރަށްވަނެވެ. މި މަންޒަރުތައް ޔޫޓިއުބް މެދުވެރިކޮށް ވަގުތުންވަނީ ދައްކާފައެވެ.
ނައިވާދޫ ޓީމު ރަށަށް އައީ އެންމެފަހުން ނިމުނު ސާފް ފުޓްސަލް ޗެލެންޖްގެވެސް ތައްޓާއެކުއެވެ. ނައިވާދޫ ޓީމުގައި ރާއްޖޭގެ ގައުމީ ފުޓްސަލް ޓީމުގެ 3 ކުޅުންތެރިން ހިމެނެއެވެ. އަބްދުﷲ ޝާފިއު (ޝާއްޕެ)، އަހުމަދު ހަމީދު (އަންމަޑޭ) އާއި ކީޕަރު ނާޖިހު އަކީ ރާއްޖެއަށް ރަންމެޑަލް ހޯދައިދިނުމުގައި އެންމެ ބޮޑު ދައުރެއް އަދާކުރި ތިން ކުޅުންތެރިންނެވެ.
ނައިވާދޫ ގޯލްޑެންގެ ތަށި އުފުލާލީ ކުޅުނު އެއްވެސް މެޗަކުން ބަލި ނުވެއެވެ. އެޓީމު ދެ މެޗުން އެއްވަރުވިއިރު، ބާކީ ހުރިހާ މެޗެއްވަނީ ކާމިޔާބު ކޮށްފައެވެ. ހދ. އަތޮޅު ތައްޓާއި، ޒޯން ތައްޓާއި މުޅި މުބާރާތުގެ ތަށި ހޯދީ ފުޓްސަލްގެ މޮޅެތި އެތައް ރަށެއްބަލިކޮށްފައެވެ. މުބާރާތުގެ ކިންގަކަށްވެސް ހޮވިފައިވަނީ ނައިވާދޫ ޓީމުގެ ކެޕްޓަން ޔާމީން މުޙައްމަދު (ޔާންޓެ)އެވެ. އަދި މުބާރާތުގެ ގަދަ 5 ކުޅުންތެރިންގެ ތެރޭގައި ޔާންޓެގެ އިތުރުން އަހުމަދު ހަމީދު (އަންމަޑޭ) ހިމެނުނުއިރު ބެސްޓު ސަޕޯޓާސް އަށްވެސް ހޮވުނީ ނައިވާދޫ ސަޕޯޓަރުންނެވެ.