ގދ. ވާދޫ އާއި ރ. ދުވާފަރު އަތޮޅު ފައިނަލަށް، ށ. އަތޮޅު ފައިނަލްގައި ކުޅޭނީ ފޯކައިދޫ އާއި ކަނޑިތީމު

މިހާރު ކުރިއަށްދާ ގޯލްޑަން ފުޓްސަލް ޗެލެންޖްގައި ރޭ ކުޅުނު މެޗުތަކަށްފަހު ގދ. ވާދޫ އާއި ރ. ދުވާފަރު އަތޮޅު ބުރުގެ ފައިނަލުން ޖާގަ ހޯދިއިރު، ށ. އަތޮޅުގެ ފައިނަލްގައި ކުޅޭނީ ށ. ފޯކައިދޫ އާއި ށ. ކަނޑިތީމެވެ.

ގދ. އަތޮޅުގެ ލީގު ބުރުގައި ރޭ މަޑަވެލި އަތުން 11-2 އިން ވާދޫ މޮޅުވިއިރު، ރ. އަތޮޅުގެ ލީގު ބުރުގައި ރ. އަލިފުށި އަތުން ރ. ދުވާފަރު މޮޅުވީ 1-0 އިންނެވެ.

ހުޅުމާލެ ރެހެންދި ފުޓްސަލް ދަނޑުގައި ރޭ މަޑަވެއްޔާ ދެކޮޅަށް ކުޅުނު މެޗުގައި ވާދޫން ޖެހި 11 ލަނޑުގެ ތެރެއިން ހަތަރު ގޯލްޖަހައިދިނީ މުހައްމަދު އިޔާދު އަލީ އެވެ. އެ ޓީމުގެ އިބްރާހިމް ޝައުފް އަހުމަދު އާއި މުހައްމަދު ނާއިލް ކުރެން ކޮންމެ ކުޅުންތެރިއަކު ދެ ލަނޑުޖެހިއިރު، އަނެއް ލަނޑުތައް ޖަހައިދިނީ އަޔާޒް އަހުމަދު (އަޔާ) އާއި ޒައިން މުހައްމަދު އަދި ޔަޒްދާން އިބްރާހިމް އެވެ. މަޑަވެލީގެ ލަނޑުތައް ޖަހައިދިނީ މުހައްމަދު މުއާދު އާއި މުހައްމަދު ސާއިފު އެވެ. މި މެޗުގެ މޮޅު ކުޅުންތެރިއަކަށް ހޮވުނީ ވާދޫގެ އިޔާދު އެވެ.

ގދ. ހޯނޑެއްދޫ އަތުން 2-0 އިން ހޯދީ މޮޅާއެކު ގދ. ގައްދޫން ފައިނަލަށް ދިއުމުގެ އުއްމީދު ވަނީ ބޮޑުކޮށްފައެވެ. މި މެޗުގައި ގައްދޫން ޖެހި ލަނޑުތައް ކާމިޔާބުކުރީ އަންނު އަބްދުﷲ އާއި ޝާރިގް އިބްރާހިމް ރަޝީދު އެވެ.

ރ. އަތޮޅުގައި ރޭ އަލިފުށި އަތުން ދުވާފަރު މޮޅުވި މެޗުގައި އެ ޓީމުގެ ލަނޑުޖަހައިދިނީ އާދަމް އިލްޔަސައު އެވެ. އެ އަތޮޅުގައި ރޭ އިންނަމާދޫ އަތުން 9-2 އިން މީދޫ މޮޅުވި މެޗުގައި އެ ޓީމުގެ ރަޝާދު އަބްދުލް މަތީން 8 ލަނޑުޖެހިއެވެ. މީދޫގެ އަނެއް ލަނޑުޖަހައިދިނީ މުހައްމަދު އަނާން އެވެ. އިންނަމާދޫގެ ގޯލްތައް ކާމިޔާބުކޮށްދިނީ އަހުމަދު މިޝްފާހު އާއި މުސާ ނިމާލް އެވެ.

ށ. އަތޮޅުގެ ސެމީގައި ރޭ ކަނޑިތީމުން ވަނީ 5-0 އިން ފީވަކު ބަލިކޮށްފައެވެ. މި މެޗުގައި ކަނޑިތީމުން ޖެހި ފަސް ލަނޑުގެ ތެރެއިން އަހުމަދު ރިޒާން ދެ ގޯލްޖެހިއެވެ. އެ ޓީމުގެ އަނެއް ލަނޑުތައްޖަހައިދިނީ އަބްދުﷲ އިރުފާން އާއި މުހައްމަދު ޝާން އަދި އިބްރާހިމް ނަދާދު އެވެ. އެ އަތޮޅުގެ ސެމީގެ ދެވަނަ މެޗުގައި ބިލެތްފަހި އަތުން ފޯކައިދޫ މޮޅުވީ 4-1 އިންނެވެ. މި މެޗުގައި ފޯކައިދޫގެ މުހައްމަދު ރިޝްވާން ހެޓްރިކް ހެދިއިރު، އަނެއް ލަނޑުޖަހައިދިނީ އަބްދުﷲ މާލިކް އެވެ. ބިލެތްފަހިގެ ހަމައެކަނި ލަނޑުޖަހައިދިނީ އާދަމް އަފްރާހު އެވެ.

ތ. އަތޮޅުގެ ގްރޫޕް އެކެއްގައި އޮމަދޫއާ ދެކޮޅަށް ކުޅުނު މެޗުން ލަނޑެއްނުޖެހި އެއްވަރުވުމާއެކު ވޭމަންޑޫ އިން ވަނީ ދެވަނަ ޓީމުގެ ގޮތުގައި ސެމީ އަށް ދަތުރުކޮށްފައެވެ. މި ގްރޫޕުގެ އަނެއް މެޗުގައި ގާދިއްފުށި އަތުން ހިރިލަންދޫ މޮޅުވީ 5-1 އިންނެވެ. ތ. އަތޮޅުގެ ގްރޫޕް ދޭއްގައި ބުރުނި 5-2 އިން ބަލިކޮށް، ކިނބިދޫން ވަނީ ސެމީ އަށް ދަތުރުކޮށްފައެވެ.

މި މުބާރާތުގައި ރޭ ކުޅުނު އެހެން މެޗުތަކަށް ބަލާއިރު ދ. އަތޮޅުގެ ބުރުގައި ގަދަފަދަ ކުޑަހުވަދޫ އަތުން މާއެނބޫދޫ މޮޅުވީ 3-2 އިންނެވެ.

ފ. އަތޮޅު ބުރުގައި ނިލަންދޫން ވަނީ 5-0 ގެ ތަފާތު ބޮޑު ނަތީޖާއަކުން ބިލެތްދޫ ބަލިކޮށްފައެވެ. މި މެޗުގައި އެ ޓީމުގެ ކެޕްޓަން ފާރޫޤް އިސްމާއިލް އާއި އަކްރަމް އިސްމާއިލް ކުރެން ކޮންމެ ކުޅުންތެރިއަކު ދެ ލަނޑުޖެހިއިރު، އަނެއް ލަނޑުޖެހީ އަހުމަދު ވާފިރު އެވެ. އެ އަތޮޅުގެ އަނެއް މެޗުގައި މަގޫދޫ އަތުން ދަރަނބޫދޫ ބަލިވީ 1-0 އިންނެވެ. މި މެޗުގެ ހަމައެކަނި ލަނޑުޖަހައިދިނީ މޫސާ މާހިލް މިގުދާދު އެވެ.