އިސްލާމީ އުންމަތަށް މިއަދު ކުރިމަތިވެފައިވާ މައްސަލަތަކަށް ހައްލު ހޯދުމުގައި އެންމެން އެކަތިގަނޑަކަށްވުން ވަރަށްވެސް މުހިންމެވެ. ކޮންމެ މީހަކުވެސް ފަރުދީ ޒިންމާ އަދާކޮށްގެންނެވެ. އެއީ ﷲ ތަޢާލާގެ މަގަށް ރުޖޫޢަވުމެވެ. މިއަދު ކުރަން ޖެހޭ ކަންކަން މިއަދު ކުރަން ފެށުމެވެ. މާދަމާއަކީ އަތުވެދާނެ ދުވަހެއް ކަމަށް ނުބެލުމެވެ. މާދަމާއިން ފެށިގެން އެއްވެސް ނުބައި އަމަލެއް ނުކުރަން ނިޔަތް ގަނެގެން މިރޭ މަސްތުވi ކިތަށް މީހުން އެ މަސްތުގައި ތިބެ ދުނިޔެ ދޫކޮށްފި ހެއްޔެވެ؟ މިރޭ ފާހިޝް އަމަލުކުރި ކިތައް މީހުން އިރުއެރުމުގެ ކުރިން މަރުވެއްޖެ ހެއްޔެވެ؟ މިހިރަ މިހިރަ ކަންކަން އިންޒާރަކަށް ނުފުދެނީ ހެއްޔެވެ؟ 

ކޮންމެ މީހަކުވެސް އޭނާގެ ނަފްސު ނަރަކައިން ސަލާމަތްކުރުމަށް މަސައްކަތް ކުރަންޖެހޭނީ އެމީހަކު އަމިއްލައަށެވެ. ދީނީ ޢިލްމުވެރިންނަށް އަންގައިދެވޭނީ އަމަލުކުރަންވީ ގޮތެވެ. ޢަމަލުކުރުމަކީ އެމީހަކު ކުރަންޖެހޭ ކަމެކެވެ. ނަރަކައިން ސަލާމަތްވުމަށް އެދޭ މީހާ މާދަމާއަކަށް ލަހެއް ނުކުރާނެއެވެ. އެމީހަކު ބަލާނީ ވީހާވެސް ގިނަ ހެޔޮ އަމަލުތަކެއް މިއަދު ކުރެވޭތޯއެވެ! 

އިންސާނާ ދުނިޔޭގެ އެދުމަށް މިއަދު ދަހިވެތިވެފައި މިތިބީ ވަކިވަރަކަށް ނޫނެވެ. ތިމާ ކުރަން ޖެހޭ ހެޔޮ އަމަލުތައް ނޭނގޭ މުސްލިމަކު ނުހުންނާނެއެވެ. ކުރަން ޖެހޭ ހުރިހާ އަޅުކަމެއް އެންމެ ފުރިހަމަ ގޮތުގައި ކުރަން ނޭނގޭ މީހަކު ހުރި ނަމަވެސް އިސްލާމް ދީނުގައި މަނާވެގެންވާ ކަންކަން ނޭނގޭ މުސްލިމަކުވެސް ނުހުންނާނެއެވެ. ބޮޑެތި ފާފަތަކާއި ކުދި ފާފަތަކަކީ ކޮބައިކަން ނޭނގޭ މީހަކުވެސް ނުހުންނާނެއެވެ. 

ނަމަވެސް ހިތާމައަކީ ދުނިޔޭގެ އެދުމަށް މީސްތަކުން ދަހިވެތިވެފައިވާވަރު ބޮޑުކަމުން ހުރިހާ ކަމެއް މާދަމާ ކުރަން ފަސްކުރަމުން ގެންދާ ކަމެވެ. ހެޔޮ އަމަލުތައް ކުރުން ވެސް މާދަމާއަށް ފަސްކުރަނީއެވެ. ނުބައި އަމަލުތައް ކުރުން ހުއްޓާލުންވެސް މާދަމާއަށް ފަސްކުރަނީއެވެ. ކޮންމެހެން ކޮންމެ ދުވަހަކު ކުރަންޖެހޭ ފަރުޟު 5 ނަމާދުކުރުން ވެސް މާދަމާއަށް ފަސްކުރަނީއެވެ. ނަމަވެސް އެ މާދަމާ އަންނާނޭ ކަމުގެ ޔަގީންކަން ތިބާއަށް އޮތީ ކިހާވަރަކަށްތޯއެވެ؟

މިގޮތަށް ކަންކަން ފަސްކުރާ މީހަކު ގިނަ ފަހަރު ނިމިގެންދާނީ ވެސް އެނާ އެބުނާ މާދަމާއަށް އިރު ނާރައެވެ. އެ މީހަކު އެބުނާ މާދަމާ، އެމީހެއްގެ ހަޔާތުގައި އަންނަ މަންޒަރެއް ނުފެނެއެވެ.

މިހުރިހާ މައްސަލަތަކެއްގެ އަސްލަކީ އަހަރެމެންގެ އީމާންތެރިކަން ކުޑަވުމެވެ. ﷲ ތައާލާއަށް ބިރުވެތިވުން ކުޑަވުމެވެ. ޙަޤީޤީ ޝަރަފްވެރިންނަކީވެސް އަދި ޙަޤީޤީ ޢިއްޒަތް ލިބިގެންވާ މީހުންނަކީ ﷲ ތަޢާލާއަށް އީމާންވެ ﷲ ތަޢާލާ އަންގަވާފައިވާ ގޮތަށް އަމަލުކުރާ މީހުންނެވެ. އެކަލާނގެ ވަޙީކުރައްވާފައިވާ ބަސްފުޅު ތަކަށް ޣާފިލުވެ ތިބެ އަމިއްލައަށް ޢިއްޒަތާއި ޝަރަފާއި މުއްސަނދިކަން ލިބިގަންނަން މި އިންސާނާ ތެޅިފޮޅެވެނީ އެކަލާނގެ ހަނދުމަކުރުން މަދުވާތީއެވެ. ހުރިހާ ކަމެއް މާދަމާކުރަން ފަސްކުރެވޭ ސަބަބަކީ ދުނިޔޭގެ އުފާ ލިބިގަންނަން ދަހިވެތިވެފައި ތިބުމެވެ.

މަރަށް ބިރުވެތިވާމީހާ އެހެން ހުރިހާކަމެއްގެ މައްޗަށް އެމީހާ ކުރަންޖެހޭ ހެޔޮ ޢަމަލުތައް އިސްކުރާނެއެވެ. ދުނިޔޭގެ އެދުންތަކުގެ ފަހަތުން ދުވާނީ ކުރަންޖެހޭ ހެޔޮ އަމަލުތައް ކުރުމަށް ފަހުގައެވެ. ނޫންނަމަ އެމީހާއަކީ މަރަށް ބިރުވެތިވާ މީހެކޭ ބުނުމުގެ އެއްވެސް ހައިސިއްޔަތެއް ނޯންނާނެއެވެ!