ޤައުމެއް ފަހުރުވެރިކަމާއެކު، މިނިވަން ޝަހުސެއްގެ ގޮތުގައި ކުރިއަރައިގެންދާނީ އެޤައުމެއްގައި ތަޢުލީމީ، ޤާބިލު ޒުވާނުން އުފެދިގެންނެވެ. ހަރުދަނާ އީމާނަކާއި ނުގުޑާފަދަ އަޒުމެއް އުފެދިފައިތިބި ޒުވާނުން އެޤައުމެއްގައި އިތުރުވެގެންނެވެ.

މުދައްރިސުންނަކީ ޤައުމު ބިނާކުރުމުގެ މޭސްތިރިންނެވެ. ޤައުމުގެ ހުންގާނެވެ. ޤައުމަށްބޭނުންވާ ޒުވާނުން ތައްޔާރުކުރުމުގައި އެންމެ މުހިއްމު ދައުރެއް އަދާކުރާ އެއް ބަޔަކީ މުދައްރިސުންނެވެ. މިކަން މުޖުތަމަޢުގެ ހުރިހާ ފަރުދުން ހެޔޮހިތުން ގަބޫލުކޮށް ބަލައިގަންނަން ޖެހެއެވެ. އެބައިމީހުންނަށް އިޙްތިރާމާއި ލޯބިދޭން އެބަ ޖެހެއެވެ. އެބައިމީހުންގެ ބޭނުންތެރިކަން ވިސްނި އިހުސާސް ކުރެވެންވެސް ޖެހެއެވެ.

ގިނަ ދަރިވަރުންގެ ނަޒަރުގައި މުދައްރިސުންނަކީ ވަރަށްމޮޅު ބައެކެވެ. އެކުދީންނަށް އަޅާލައި ހެޔޮނުބައި އޮޅުންފިލުވައިދޭ މީހުންނަކީ މުދައްރިސުންނެވެ. އެކުދިން ދެކޭގޮތުގައި މުދައްރިސުންނަކީ ވަރަށް ޤަދަރުވެރި މާތްބައެކެވެ. ޙަޤީގަތަކީ މިއީކަމުގައިވިޔަސް ބައެއް މުދައްރިސުންގެ އުޅުމާއި އަޚްލާޤް ހުންނަގޮތުން އެހެންގޮތަކަށް މުދައްރިސުންނާމެދު ދެކޭންޖެހެއެވެ. އެއީ ބައެއްމީހުންނެވެ. މަދުފަހަރަކު ނޭދެވޭ ޢަމަލުތަކުގައި ބައިވެރިވަނީއެވެ. އެހެނަސް ހުތުރުނަން ލިބިގެންދަނީ އެންމެނަށެވެ. ބަދުނާމްވަނީ ހުރިހާ މުދައްރިސުންނެވެ. އިތުބާރުގެއްލެނީ ހުރިހާ މުދައްރިސުންގެއެވެ.

މުދައްރިސާއި ދަރިވަރާ ދެމެދު އޮންނަންވާނީ ވަރަށްމާތް މަތިވެރި ގުޅުމެކެވެ. މިގުޅުން ކަނޑާލާފަދަ ބާރުތަކާއި ދެކޮޅަށް ތެދުވާން ޖެހޭނެއެވެ. އެހެނީ އެއީވެސް ދަރިންނެވެ. ކޮންމެވެސް އާއިލާއަކަށް ނިސްބަތްވާ އެމީހުންގެ ދެލޮލުގެ ނޫރެވެ. ދިރިއުޅުމުގެ އުއްމީދެވެ. މުދައްރިސުން ހެޔޮހިތުން މިކަން ޤަބޫލުކުރަންވާނެއެވެ.

މުދައްރިސުން ކުދިންނަށް އަޅާލާ ކަމޭހިތާނީ ފަހުން އެމީހުންގެ ފަރާތުން ހެވެއްލިބޭނެކަމަށް އުއްމީދުކޮށްގެންނެއް ނޫނެވެ. ޤައުމީ ވާޖިބެއް އަދާކުރުމުގެ ބޭނުމުގައެވެ. ޤައުމަށް އެކަމުގެ ސަބަބުން މަންފާކުރާނެކަމުގެ އުއްމީދުގައެވެ. މުޖުތަމަޢުގައި ތަޢުލީމީ ރޫޙު އުފެދިގެން ދިއުމަށް އެދިއެވެ. މިކަމުގެ ސަބަބުން ހަރުދަނާ މުޖުތަމަޢެއް ބިނާވެގެން ދާނެތީއެވެ. ސުލްޙަ މަސަލަސްކަން އުފެދި މިވެށީގައި ދިރިއުޅޭ އެންމެންނަށް ހެވެއް ލިބިގެން ދާނެތީއެވެ. މާދަމާގެ ޖީލު އިސްލާޙް ކުރުމުގައި އެމީހުންގެ ޙިއްސާ ފުރިހަމައަށް ލިބިގެން ދިއުމަށް އެދެވޭތީއެވެ.

މުދައްރިސުންނަކީ މޮޅުބައެކޭބުނަނީ ސަބަބުތަކެއް ނެތިއެއް ނޫނެވެ. ކުއްޖާގެ އުގެނުމަށްބޭނުންވާ ބޭސް ތައްޔާރުކޮށް އެބޯންދީ، ކާންދީ، އުނގުޅައިދީ އަދި ހާނައިދީ ވާނުވާބަލަނީ މުދައްރިސުންނެވެ. ބޭހަކާއި ނުގުޅޭކުއްޖަކު އުޅޭނަމަ، އެކުއްޖަކަށް ހާއްސަ، އާބޭހެއް ތައްޔާރުކޮށް ފަރުވާދެނީ މުދައްރިސުންނެވެ. ކުއްޖާ ނުބޯން އުޅުނަސް މޮޅު އުކުޅުތައް ބޭނުންކޮށްގެން ކުއްޖާއާ ހަމައަށް އެބޭހެއް ފޯރުކޮށްދެއެވެ. މުދައްރިސުންނަކީ ތައުލީމީ ދާއިރާގެ "ސައިންސުވެރިންނެވެ". އެ ދާއިރާގެ ޑަކްޓަރުންނާއި ނަރުހުންނަކީވެސް ހަމަ އެއީއެވެ.

މުދައްރިސުންނަކީ ކުއްޖާގެ ދެވަނަ ބެލެނިވެރިންގެ ލަގަބު، އަބަދުމެ ދެވޭ ބައެކެވެ. ދަރިވަރުންގެ އިޙްސާސްތައް ދެނެގަނެ ކުއްޖާގެ މިޒާޖާގުޅޭގޮތުން ކަންތައް ރާވައިގެން އެހީތެރިވެދެއެވެ. ކުއްޖާގެ ހެދިބޮޑުވުމާއި، ދުޅަހެޔޮކަމަށް ބާރުއަޅައިދެއެވެ. ގާތްކަމާއި ލޯބިދެއެވެ. ރަގަޅު އެކުވެރިން ހޯދުމުގައި އެހީތެރިވެދެއެވެ. އަމިއްލަ ނަފްސަށް އިތުބާރު ކުރާށާއި، ނަފްސުގެ އަގުވަޒަން ކުރަން ދަސްކޮށްދެއެވެ. ރީތިއަދަބުތަކަށް މަގުފަހިކޮށްދެއެވެ. ހެވާއިނުބައި އަމުދުން ދަސްކޮށްދެއެވެ.

މުސްލިމަކަށްވީތީ ކޮންމެހެން އަދާކުރަންޖެހޭ ކަންތައްތައް އޮޅުންފިލުވައިދެއެވެ. މުޢާމަލާތް ކުރުމުގެ ހުނަރުތަކާއި، ސާފުދިވެހިބަހުން ކުށެއްނެތި މުއާސަލާތު ކުރަންދަސްކޮށްދެއެވެ. ދިރިއުޅުމުގައި ދިމާވާ މައްސަލަތައް ޙައްލުކުރުމަށާއި، ވަޒީފާއެއް އަދާކުރުމަށް ބޭނުންވަނީނަމަ އެކަންކަމަށް މަގުފަހިކުރުވައެވެ. އަދާކުރަންޖެހޭ ވާޖިބުތައް ދަސްކޮށްދީ އެކަންކަމުގެ މުހިއްމުކަން ވިސްނައިދެއެވެ. ދުނިޔެއާއި އާޚިރަތުގެ ޙަޔާތް ބާއްޖަވެރިކުރުމަށް ބޭނުންވާ ހުރިހާމަގެއް ކޮށައިދީ އަމާންކޮށްދެއެވެ.

ހަގީގީ މުދައްރިސުންނަކީ މިއީއެވެ. ދަރިވަރުން ގަދަރު ކުރާ އަދި ލޯބިކުރާ މުދައްރިސުންނަކީވެސް މިއީ އެވެ. އެމީހުންނަކީ އެމީހުންގެ ހިތާއި ނަފްސު، ހިތްހެޔޮ ކަމާއި އެކީ ހުޅުވާލައިގެން ތިބޭ އޯގާތެރި އަޅުގަނޑުމެންގެ ދެވަނަ ބެލެނިވެރިންވެސް މެއެވެ.